ភ្នំពេញ៖ យុវជន៦នាក់ ចេញពីដើរលេងនៅកោះពេជ្រ គោលបំណងត្រឡប់ទៅផ្ទះ លុះម៉ូតូជិះដល់ពាក់កណ្តាលផ្លូវ ត្រូវបានជនមួយក្រុមទៀត មានគ្នាប្រហែល៧ទៅ៨នាក់ បានជិះម៉ូតូដេញតាមដេញតាមវាយ ធ្វើឲ្យពួកគេភ័យពេក បានជិះម៉ូតូជ្រុលទៅបុករបង់ផ្ទះរបស់គេ បណ្តាលឲ្យមានអ្នករងរបួសធ្ងន់ម្នាក់និងស្រាល់៥នាក់ ហេតុការណ៍នេះបានកើតឡើងនៅវេលាម៉ោង២យប់ ឈានចូលថ្ងៃទី២២ ខែសីហា ឆ្នាំ២០១៧ ទុលមុខផ្ទះលេខ១០៥Eo ផ្លូវ១៩៩ សង្កាត់ទួលស្វាយព្រៃ២ ខណ្ឌចំការមន ។
តាមសម្តីជនរងគ្រោះមិនប្រាប់ឈ្មោះ រងរបួសស្រាល បានឲ្យដឹងថា មុនពេលកើតហេតុ ពួកគេមានគ្នា៦នាក់ បានជិះម៉ូតូចេញពីដើរលេងនៅម្តុំកោះពេជ្រ គោលបំណងត្រឡប់ទៅផ្ទះនៅម្តុំទួលគោក បានជិះម៉ូតូ២គ្រឿង មានម៉ាកហុងដាឌ្រីម ពណ៌ខ្មៅ ពាក់ស្លាកលេខភ្នំពេញ 1L-7401 និងមួយគ្រឿងទៀត ម៉ាកគុបជ្រុង ពណ៌កាប់ស្ទាំង ពាក់ស្លាកលេខ ក២៤០៧ ភព១ បានធ្វើដំណើតាមផ្លូវ១៩៩ ក្នុងទិសដៅពីកើតទៅលិច ខណៈពេលនោះពួកគេបានធ្វើដំណើរតាមផ្លូវដល់ពាក់កណ្ដាលផ្លូវ ដោយមិនដឹងថាមានរឿងអ្វីនោះទេ ក៍ស្រាប់តែមានបុរស៧ទៅ៨នាក់បានជិះម៉ូតូចំនួន៣គ្រឿង មានម៉ាក PCX និង២គ្រឿងទៀត មិនចាំម៉ាកបានជិះដេញតាមវាយពួកគេ ដោយម្នាក់មានកាន់ខ្សែក្រវ៉ាត់ និងបំពង់ទីប គ្រប់ដៃ។
ប្រភពដដែលបានបន្តទៀតថា នៅពេលដែលពួកគេជាជនរងគ្រោះភ័យពេក បានបន្ថែមល្បឿនម៉ូតូ ដើម្បីរត់គេចពីក្រុមដែលដេញវាយពួកគេ ធ្វើឲ្យម៉ូតូរបស់ពួកគេមួយគ្រឿង បានជ្រុលទៅបុករបងផ្ទះរបស់ប្រជាពលរដ្ឋពេញទំហឹង បណ្តាលឲ្យម៉ូតូពួកគេដួល រងរបួសសន្លប់ស្តូកស្តឹងបុរសម្នាក់ ភ្លាមៗនោះក្រុមជនបង្កបានវាយពួកគេថែមទៀត បណ្តាលឲ្យមានអ្នកខ្លះរបួស និងខ្លះអត់មានរងរបួស រួចហើយពួកក្រុមជនបង្កបាននាំគ្នាជិះម៉ូតូរត់គេខ្លួនបាត់ស្រមោលអស់ទៅ ។
ក្រោយពេលកើតហេតុ ឃើញសមត្ថកិច្ចចុះទៅកន្លែង ព្រមទាំងរថយន្តសង្គ្រោះ បានមកដឹកជនរងគ្រោះដែលរងរបួសធ្ងន់ តែក្រុមគ្នីគ្នាពួកគេមិនឲ្យឡើងលើរថយន្តសង្គ្រោះនោះទេ គឺបាននាំគ្នាលើកជនរងគ្រោះដែលរងរបួសធ្ងន់ ដាក់លើម៉ូតូ រួចហើយនាំគ្នាធ្វើដំណើរបន្តទៅមុខទៀតទៅ៕
