នៅថ្ងៃទី២៦ ខែសីហា ឆ្នាំ២០១៧ ស្អែកនេះព្រឹត្តិការណ៍ប្រណាំងម៉ូតូថ្នាក់ជាតិ CMSF PRESIDENT CUP នឹងចាប់ផ្ដើមប្រកួតហើយ នៅលើទីលានប្រណាំងម៉ូតូ KING TRACK នៅក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញដែលព្រឹត្តិការណ៍នេះមានការសហការជាមួយសហព័ន្ធកីឡាយានយន្តកម្ពុជា និងមានការផ្សាយផ្ទាល់លើកញ្ចក់ទូរទស្សន៍ MYTV ផងដែរ។
លោក គង់ ធារ៉ា អ្នករៀបចំព្រឹត្តិការណ៍ និងជាអ្នកគ្រប់គ្រងទីលានប្រណាំងម៉ូតូ ឃីងត្រាក់ បានថ្លែងប្រាប់ក្នុងពិធីសន្និសីទកាសែតកាលពីរសៀលថ្ងៃទី២៥ ខែសីហា ឆ្នាំ២០១៧នៅអាគារ NOCC ថា កីឡាករដែលចូលរួមប្រណាំងក្នុងឆ្នាំនេះមានចំនួន៦៦នាក់ ដែលត្រូវបានចែកជា៤ពូល ដោយក្នុងនោះ ប្រភេទការប្រណាំង ១១០CC, ១២៥CC, ១៥០CC, និង Open Racing ១៥០cc ។ ការប្រណាំងលើកនេះសុទ្ធតែជាប្រភេទម៉ូតូតូច ដែលកំណត់ត្រឹមម៉ូតូប្រភេទ អូតូ និង អឹមម្យ៉ា ទៅតាមលក្ខខណ្ឌនៃកម្មវិធីប្រណាំងបានកំណត់។ ព្រឹត្តិការណ៍នេះរៀបចំឡើងដែលមានការសហការឧបត្ថម្ភពីក្រុមហ៊ុន SK ZIC, ភេសជ្ជៈ WURKZ និង ម៉ូតូ KAWAZAKI ជាមួយការសហការរបស់សហព័ន្ធ ដោយបានចំណាយប្រមាណ១០ម៉ឺនដុល្លារ អាមេរិកដើម្បីជួយជម្រុញទាំងកីឡាករកម្ពុជា និង ពង្រឹងកីឡាករមិនមែនអាជីពវិវឌ្ឍន៍ទៅជាកីឡាករទៅប្រណាំងនៅក្រៅប្រទេសនាពេលខាងមុខនេះផងដែរ។ លោកថាការប្រកួតទាំងមូលនឹងចាប់ផ្ដើមតាំងពីម៉ោង៩ព្រឹក រហូតដល់ល្ងាច ពេញរយៈពេល២ថ្ងៃតែម្ដង គឺថ្ងៃទី២៦ និង២៧ សីហា ដើម្បីឲ្យកីឡាករទាំងអស់ធ្វើការដណ្ដើមពានជើងឯក។
អ្នកដឹកនាំរៀបចំកម្មវិធីនេះបញ្ជាក់ថា “ព្រឹត្តិការណ៍នេះធ្វើឡើងក៏ដើម្បីជួយជម្រុញសមត្ថភាពកីឡាករទំាំងអស់ក្លាយកីឡាកររបស់សហព័ន្ធកីឡាយានយន្តកម្ពុជា ឬ អាចជាកីឡាករបស់ជាតិ។ កីឡាករដែលបានចូលរួមក្នុងព្រឹត្តិការណ៍ក៏ទទួលបានប័ត្រពីសហព័ន្ធដែលអាចជាតំណាងកម្ពុជាទៅប្រកួតនៅក្រៅប្រទេសផងដែរ”។ លោក គង់ ធារ៉ា បានបន្ថែមថា ព្រឹតិ្តការណ៍នេះមិនបានអនុញ្ញាតឱ្យកីឡាករបរទេសចូលរួមនោះទេដោយសារតែជាការប្រណាំងម៉ូតូលក្ខណៈថ្នាក់ជាតិប៉ុណ្ណោះ។ រង្វាន់សម្រាប់កីឡាករដែលប្រណាំងតាមប្រភេទម៉ូតូនីមួយៗឈ្នះជាជើងឯកនោះ នឹងទទួលបាន១ពាន់ដុល្លារ ហើយនឹងក្លាយជាកីឡាករជម្រើសជាតិកម្ពុជារបស់សហព័ន្ធយានយន្តកម្ពុជា ។
លោក ខៃ វណ្ណៈ អគ្គលេខាធិការសហព័ន្ធកីឡាយានយន្តកម្ពុជាបានថ្លែងឲ្យដឹងដែរថា នេះជាព្រឹត្តិការណ៍ប្រណាំងម៉ូតូធំមួយនៅក្នុងប្រទេសកម្ពុជា ដើម្បីស្វែងរកជើងខ្លាំងជាជើងឯកផ្នែកប្រណាំងម៉ូតូ ក្រោយពីកម្ពុជាត្រូវបានស្ថាបនាជាទីលានប្រណាំងម៉ូតូឈ្មោះ King Track Circuit នៅខ័ណ្ឌសែនសុខ។ លោកថាក្រោយការប្រកួតនេះ កីឡាករផ្នែកប្រណាំងម៉ូតូនឹងមានការទទួលស្គាល់កម្រិតជាតិសម្រាប់អ្នកឈ្នះ ហើយមិនភ័យរឿងខ្វះទីលានហ្វឹកហាត់ទៀតទេ ក្នុងពេលដែលទីលានមួយនេះក៏នឹងត្រូវស្ថាបនាឲ្យធំហើយបំពាក់ការប្រណាំងម៉ូតូឲ្យត្រូវស្ដង់ដា ដើម្បីលើកកម្ពស់វិស័យប្រណាំងម៉ូតូនៅកម្ពុជាឲ្យបានស្មើមុខស្មើមាត់នឹងប្រទេសជិតខាង៕
