បង្ក្រាបអ្នកញៀនល្បែង១៤នាក់ ដាក់ក្នុងសង្វៀន និងមាន់៨ក្បាល

ខេត្តបាត់ដំបង ៖ សង្វៀនបញ្ជល់មាន់ដុះស្លែមួយកន្លែងត្រូវបានសមត្ថកិច្ចឆ្មក់ចុះបង្ក្រាប កាលពីវេលារសៀលថ្ងៃទី១៨ ខែវិច្ឆិកា ឆ្នាំ២០១៧ នៅចំណុចភូមិអូរតាញា ឃុំតាគ្រាម ស្រុកបាណន់ ដោយក្នុងនោះ សមត្ថកិច្ចឃាត់ខ្លួនមនុស្សបានចំនួន១៤នាក់ រួមនិងមាន់៨ក្បាល។

តាមប្រភពពីសមត្ថកិច្ចស្រុកបាណន់ បានបញ្ជាក់ឱ្យដឹងថា នៅមុនពេលបើកប្រតិបត្តិការ ខាងលើ សមត្ថកិច្ចបានទទួលព័ត៌មានពីប្រជាពលរដ្ឋល្អថា នៅចំណុចភូមិសាស្ត្រខាងលើ មានសង្វៀនបញ្ជល់មាន់ធំមួយ និងមានមនុស្ស ម្នាចូលលេងភ្នាល់ស៊ីសងលុយជារៀងរាល់ថ្ងៃ។ ក្រោយពីចុះធ្វើការស្រាវជ្រាវរួចមក នៅរសៀល ថ្ងៃទី១៨ ខែវិច្ឆិកា ឆ្នាំ២០១៧ សមត្ថកិច្ចក៏បានឆ្មក់ចុះបង្ក្រាបទីតាំងខាងលើ ដោយឃាត់ខ្លួនមនុស្សចំនួន១៤នាក់ ព្រមចាប់យកវត្ថុតាង រួមមានមាន់ជល់ចំនួន៨ក្បាល ជញ្ជីងសម្រាប់ ថ្លឹងមាន់ចំនួន១ រថយន្តចំនួន១គ្រឿង និងម៉ូតូ ចំនួន១៩គ្រឿង ព្រមទាំងសម្ភារៈមួយចំនួនទៀត។

សមត្ថកិច្ចបានបញ្ជាក់ថា ក្រុមអ្នកញៀនលេងល្បែងស៊ីសងបញ្ជល់មាន់ទាំង១៤នាក់ រួមនឹងវត្ថុតាងដែលដកហូតបានត្រូវសមត្ថកិច្ច បញ្ជូន និងឃាត់ខ្លួននៅការិយាល័យនគរបាល ព្រហ្មទណ្ឌកំរិតស្រាលនៃស្នងការដ្ឋាននគរបាល ខេត្តបាត់ដំបង ដើម្បីធ្វើការសាកសួរ និងកសាង សំណុំរឿង បញ្ជូនបន្តទៅតុលាកាចាត់ការតាមនីតិវិធី៕