ព្រាបសុវត្ថិ ៖ ល្បីល្បាញតាំងពីឆ្នាំ១៩៩៧ តាមរយៈបទ ”អូនជាបេះដូងបង” រហូតមកដល់ពេលនេះ ថតចម្រៀងបានជាង៣ពាន់បទ នៅផលិតកម្មរស្មីហង្សមាស ហើយកំពូលតារាចម្រៀងរូបនេះច្រៀងដោយគ្មានការកុងត្រាឡើយជាមួយផលិតកម្មរស្មីហង្សមាស។ ព្រាប សុវត្ថិ ដែលរក្សាភាពល្បីឈ្មោះបានយូរជាងគេ ដោយជាង២ទសវត្សន៍នេះ គ្មានតារាណាអាចផ្ដួលលោកបានឡើយ ស្របពេលដែលតារាប្រុសដែលជាស្នូលរបស់ផលិតកម្មរស្មីហង្សមាស រូបនេះ បានយកកូនប្រុសទាំង៣របស់លោក ចូលហង្សមាស ជាស្វ័យប្រវត្តិ គឺសុវត្ថិ មុនីវណ្ណ, សុវត្ថិ មុនីនាគ និងសុវត្ថិ សិរីវុឌ្ឍ។ បទចម្រៀងល្បីចុងក្រោយរបស់ព្រាប សុវត្ថិ គឺបទ ”មាន់ស្រែ បន្លែស្រស់” និងបទដែលច្រៀងរួមគ្នាជាមួយកូនប្រុសទាំង៣ គឺបទ ”ចង្វាក់ប៉ឺតៗ”។
មាស សុខសោភា ៖ អតីតអ្នកចម្រៀងរបស់ផលិតម្មរស្មីស្ទឹងសង្កែ, U2, M, សាន់ដេ និងចុងក្រោយទើរនៅផលិតកម្មថោន បានប្រាប់អ្នកកាសែតថា នាងច្រៀងនៅថោន ពេលនេះដោយគ្មានការចុះកុងត្រាឡើយ ។ ការថ្លែងរបស់មាស សុខសោភា ស្របពេលដែលមានព័ត៌មានថា សោភា ត្រូវបានផលិតកម្មរស្មីហង្សមាស ព្យាយាមទាក់ទងនាងឲ្យចូលធ្វើជាសមាជិករបស់ខ្លួនជាច្រើនឆ្នាំមកហើយ តែចុងក្រោយ សោភា អះអាងថា នាងនៅតែច្រៀងឲ្យថោន និងផលិតកម្មផ្ទាល់ខ្លួន Camtrax ដដែល។ មាស សុខសោភា ថែមទាំងប្រកាសថា នាងនឹងត្រៀមចូលថតភាពយន្ដភាគឲ្យទូរទស្សន៍មួយក្នុងពេលឆាប់ៗនេះហើយ ខណៈដែលបទចម្រៀងល្បីរបស់នាងចុងក្រោយ គឺបទ ”ចង្កេះទន់ទោ”។
ពេជ្រ សោភា ៖ តារាស្រីលំដាប់ជួរមុខគេរបស់ផលិតកម្មហង្សមាស រូបនេះ ហាក់មានរឿងចម្រូងចម្រាសច្រើនរឿងច្រៀងបទឆ្កែ សម្រាប់ចូលឆ្នាំខ្មែរនេះ ព្រោះមានអ្នករិះគន់តាមបណ្ដាញសង្គម។ យ៉ាងណា ពេជ្រ សោភា ដែលឈរជើងនៅផលិតកម្មរស្មីហង្សមាស ១៥ឆ្នាំមកហើយ នឹងជួបព្យុះភ្លៀងបក់បោកជាច្រើននោះ នាងមិនតតបអ្នកដែលវាយប្រហារលើនាងឡើយ។ ពេជ្រ សោភា ធ្លាប់ប្រាប់ថា ជាង៦ឆ្នាំមកហើយ ដែលនាងច្រៀងនៅហង្សមាស ដោយមិនមានការកុងត្រាជាមួយគ្នាទេ ព្រោះថាសំខាន់លើបេះដូង និងការមានទំនុកចិត្តលើគ្នាប៉ុណ្ណោះ ការកុងត្រាគ្រាន់តែក្រដាសទេ។ ពេជ្រ សោភា កំពុងតែធ្វើឲ្យគេចាប់អារម្មណ៍ផងដែរ តាមរយៈការឈានចូលទៅថតភាពយន្ដរបស់ហង្សមាស រឿង ”បិសាចគួរឲ្យស្រលាញ់” ដែលនាងមានការកាច់កុងគ្នាខ្លាំងជាមួយអ្នកនាងខាត់ សុឃីម។
សុខ ពិសី ៖ តារាចម្រៀងស្រីជួរមុខគេរបស់សាន់ដេ នេះ ត្រូវបានអ្នកដឹកនាំសម្ដែងខារ៉ាអូខេនៅផលិតកម្មសាន់ដេ បង្ហើបឲ្យដឹងថា នាងច្រៀងដោយគ្មានការកុងត្រាដែរ បន្ទាប់ពីមានការសង្ស័យថា ពិសី មានទំនាក់ទំនងស្នេហាជាមួយថៅកែផលិតកម្ម លោកឡាយ សុខចំរើន តែអ្នកទាំង២បានច្រានចោលនោះ។ សុខ ពិសីនឹងត្រៀមចេញស្នាដៃថ្មីដែលនាងសម្ដែងជាតួឯក រឿង ”អាឡេវចូលក្រុង” ប៉ះគ្នាជាមួយលោកឆាយ វីរៈយុទ្ធ ដែលត្រៀមដាក់បញ្ចាំងនៅក្រោយបុណ្យចូលឆ្នាំខ្មែរនេះ។ សុខ ពិសី ដែលបាត់ដៃគូរចម្រៀង និងសម្ដែងលោកខេមរៈ សិរីមន្ដ នោះ បានងាកមកចាប់ដៃជាមួយឆាយ វីរៈយុទ្ធ ហើយពេលនេះ ល្បីបទ ”គេមិនបានស្រលាញ់យើងទេ”។
អ៊ីវ៉ា ៖ តារាចម្រៀងវ័យក្មេងរូបនេះមានព័ត៌មានថា នាងត្រូវបានផលិតកម្មធំ២ទាក់ទង គឺហង្សមាស និងសាន់ដេ បន្ទាប់ពីនាងអស់កុងត្រាជាមួយសាន់ដេ។ ទោះជាយ៉ាងណា តាមព័ត៌មានចុងក្រោយបានឲ្យដឹងថា អ៊ីវ៉ា ចូលទៅថោន ចោលហង្សមាស ទៅហើយ តែអ្វីដែលចម្លែកនោះ គឺអ៊ីវ៉ា បែរជាមានបទចម្រៀងចេញសម្រាប់ចូលឆ្នាំនៅសាន់ដេ ទៅវិញ។ អ៊ីវ៉ា បានប្រាប់ថា ចាប់ពីពេលនេះតទៅ ទោះជានាងច្រៀងឲ្យផលិតកម្មណាក៏ដោយ គឺនាងលែងចុះកុងត្រាទៀតហើយ។
តាមអ្នកដឹកនាំផលិតកម្ម បានបង្ហើបឲ្យដឹងថា ការចុះកុងត្រារបស់តារាចម្រៀងត្រូវបានថៅកែផលិតកម្ម កាត់ប្រាក់ពីការច្រៀង និងថតស្ពត ១កម្មវិធី ពី២០ទៅ៣០%។ តែសម្រាប់តារាដែលមានកុងត្រានោះ ទោះជាគ្មានការងារធ្វើ ឬគ្មានបទចម្រៀងចេញ ក៏ពួកគេត្រូវផលិតកម្មបើកប្រាក់ខែឲ្យរៀងរាល់ខែដែរ៕