ប៉ូលិសនៅតំបន់ Merseyside ទីក្រុង Liverpool បានបញ្ជាក់កាលពីថ្ងៃអាទិត្យថា ពួកគេនឹងបើកការស៊ីបអង្កេតបន្ទាន់មួយ ទាក់ទងទៅនឹងសារគំរាមសម្លាប់កីឡាករចាំទី Loris Karius របស់ក្លឹបហង្សក្រហម Liverpool បន្ទាប់ពីប្រកួតចាញ់ Real Madrid វគ្គផ្តាច់ព្រ័ត្រ Uefa Champion League កាលពីរាត្រីថ្ងៃសៅរ៍ កន្លងទៅ។
មន្ត្រីប៉ូលិសក៏បានលើកឡើងដែរថា ចំពោះការបញ្ចោញសារគំរាមសម្លាប់ណាមួយមាននៅលើបណ្តាញសង្គមនោះ នឹងត្រូវប្រឈមមុខនឹងការចាប់ខ្លួនភ្លាម។
ជាមួយគ្នានេះដែរ ប៉ូលិសបានរំឭកទៅកាន់អ្នកគាំទ្រ ក៏ដូចជាប្រជាជនទូទៅ មិនត្រូវធ្វើការគំរាមទៅកាន់ Karius តាមបណ្តាញសង្គម ឬប្រព័ន្ធទំនាក់ទំនងណាមួយឡើយ។
កីឡាករចាំទីសញ្ជាតិអាល្លឺម៉ង់ រងការស្តីបន្ទោសយ៉ាងខ្លាំងពីអ្នកគាំទ្រ ដោយសារតែបរាជ័យមិនអាចសង្គ្រោះបាល់បាន ដោយរួមបញ្ចូលទាំងគ្រាប់បាល់មួយគ្រាប់ដែលអ្នកអត្ថាធិប្បាយចាត់ទុកថា ជាការសង្គ្រោះបាល់ដូចកូនក្មេង។ ក្រោយបញ្ចប់ការប្រកួតភ្លាម ទាំងកីឡាករចាំទីផ្ទាល់ និងក្រុមគ្រួសារត្រូវបានរំខានដោយសារគំរាមសម្លាប់។
ក្រោយបរាជ័យកាលពីចុងសប្តាហ៍ អ្នកចាំទីសញ្ជាតិអាល្លឺម៉ង់ បានលើកដៃសំពះទៅកាន់អ្នកគាំទ្រក្លឹបហង្សក្រហម Liverpool ចំពោះកំហុសរបស់ខ្លួន៕