បន្ទាប់ពីប្រកាសចូលនិវត្តន៍កាលពីឆ្នាំ២០១៧ កីឡាករខ្សែប្រយុទ្ធ Kaka អតីតវីរបុរសរបស់ក្លឹបបាល់ទាត់អ៊ីតាលី Milan ត្រូវបានប្រភពសារព័ត៌មានមួយចំនួន បានរាយការណ៍ថា អាចនឹងត្រឡប់មកលេងបាល់ទាត់អាជីពវិញ ជាមួយក្លឹបបាល់ទាត់មួយនៅក្នុងក្របខណ្ឌអ៊ីតាលី ស៊េរី C។
គម្រោងវិលត្រឡប់ចូលសមរភូមិបាល់ទាត់វិញ ក៏ដោយសារតែកីឡាករសញ្ជាតិប្រេស៊ីល រូបនេះ ចង់ធ្វើទៅតាមសំណើរបស់អតីតនាយករដ្ឋមន្ត្រីអ៊ីតាលី លោក Silvio Berlusconi ដែលជាម្ចាស់ថ្មីនៃក្លឹប Monza ១៩១២។
លោក Berlusconi ចង់បាន Kaka ក្នុងគោលបំណងជួយឱ្យក្លឹបឡើងពីក្របខណ្ឌស៊េរី C ទៅស៊េរី B ដើម្បីជាការលើកមុខមាត់ក្លឹបមួយកម្រិតទៀត។
អតីតនាយករដ្ឋមន្ត្រីអ៊ីតាលី Berlusconi រូបនេះ បានលក់ភាគហ៊ុនក្លឹបយក្សអ៊ីតាលី Milan ទាំងអស់របស់លោក កាលពីឆ្នាំ២០១៧ ក្រោយមានចំណែកគ្រប់គ្រងក្លឹបមួយនេះជាង៣០ឆ្នាំ។ កាលពីប៉ុន្មានថ្ងៃមុននេះ លោកទើបតែបានទិញភាគហ៊ុនមួយចំណែកធំនៃក្លឹប Monza ដែលជាក្លឹបមួយនៅលីកលំដាប់៣ របស់អ៊ីតាលី”