នៅថ្ងៃអាទិត្យ ទី២០ ខែមករា ឆ្នាំ២០១៩ ស្អែកនេះ ស្តេចប្រដាល់ហ្វីលីពីន ម៉ានី ប៉ាក់គីអាវ (Manny Pacquiao) ដែលជាសមាជិកព្រឹទ្ធសភា និងជាបេក្ខជនប្រធាធិបតីផងនោះ បានវិលត្រឡប់ចូលសមរភូមិប្រដាល់ជាថ្មីឡើងវិញ ប៉ះជាមួយកីឡាករអេដ្រៀន ប្រូន័រ (Adrien Broner) នៅលើសង្វៀន MGM Grand Garden Arena នៅទីក្រុង Lasvegas សហរដ្ឋអាមេរិក។
នេះគឺជាលើកទី១ ដែលប៉ាក់គីអាវ បានមកវាយនៅក្នុងទឹកដីអាមេរិក ចាប់តាំងពីខែវិច្ឆិកា ឆ្នាំ២០១៦ ក្រោយពីឈ្នះ Jessie Vargas។
ការប្រកួតថ្ងៃស្អែកនេះ ប៉ាក់គីអាវ ត្រូវការពារខ្សែក្រវាត់ WBA ពីកីឡាករអេដ្រៀន ប្រូន័រ ។ ប៉ាក់គីអាវ គឺជាម្ចាស់ជើងឯកពិភពលោក៨ស្ថាប័ន។ ទោះបីប្រកួតនៅក្នុងទឹកដីអាមេរិក ធ្លាប់ចាញ់ Floyd Mayweather តែប៉ាក់គីអាវ នៅតែមានជំនឿចិត្តថា លើកនេះ គេអាចការពារខ្សែក្រវាត់ WBA បាន ។
ប៉ាក់គីអាវ ប្រកួតចុងក្រោយ គឺឈ្នះកីឡាករអាហ្សង់ទីន Lucas Matthysse ត្រឹមទឹកទី៧ ទទួលបានខ្សែក្រវ៉ាត់ WBA។
ម៉ានី ប៉ាក់គីអាវ វ័យ៤០ឆ្នាំ កម្ពស់ ១,៦៦ម៉ែត្រ ចម្ងាយដៃវាយចេញ ១,៧០ម៉ែត្រ។ ស្តេចប្រដាល់ហ្វីលីពីនរូបនេះ មានកំណត់ត្រាប្រកួត៦៩ប្រកួត ឈ្នះ៦០ ចាញ់៧ ស្មើ ២ និងធ្លាប់ផ្តួលដៃគូឲ្យសន្លប់ចំនួន៣៩ប្រកួត។
មុនការប្រកួត កីឡាករអាមេរិក អេដ្រៀន ប្រូន័រ បាននិយាយថា “ខ្ញុំមានទំនុកចិត្តក្នុងការដោះស្រាយបញ្ហាជាមួយម៉ានី ប៉ាក់គីអាវ បាន។ ប៉ាក់គីអាវ ឥលូវមិនសូវរហ័សរហួនដូចមុនទេ ដោយសារតែគាត់មានវ័យចំណាស់ទៅហើយ”។
អេដ្រៀន ប្រូន័រ ប្រកួតចុងក្រោយ គឺស្មើកីឡាករអាមេរិក Jessie Vargas ។
កីឡករសញ្ជាតិអាមេរិក វ័យ២៩ឆ្នាំ កម្ពស់១,៦៩ម៉ែត្រ ចម្ងាយដៃវាយចេញ១,៧៧ម៉ែត្រ។ អ្នកប្រដាល់រូបនេះ មានកំណត់ត្រាប្រកួត៣៨ប្រកួត ឈ្នះ៣៣ ចាញ់៣ ស្មើ១ គ្មានការប្រកួតមួយ និងធ្លាប់ផ្តួលដៃគូឲ្យសន្លប់ ចំនួន២៤ប្រកួត៕