ខេត្តព្រះសីហនុ ៖ បន្ទាប់ពីដុតដៃដុតជើងដើម្បីស្រាវជ្រាវរកមូលហេតុពិតប្រាកដនៃការពុលស្លាប់១គ្រួសារ ធ្វើឲ្យប្តីនិងកូនស្រីស្លាប់ ចំណែកប្រពន្ធត្រូវបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកនោះ តាមព័ត៌មានចុងក្រោយ សមត្ថកិច្ចបានប្រាប់ថា ប្រពន្ធបានយកថ្នាំពុលមកសម្លាប់ប្តីនិងកូនស្រី រួចធ្វើអត្តឃាតតាមក្រោយ។
យោងតាមសមត្ថកិច្ចខេត្តព្រះសីហនុ មុនពេលកើតហេតុ កម្លាំងនគរបាលប៉ុស្តិ៍រដ្ឋបាលសង្កាត់២ បានទទួលព័ត៌មានថា នៅផ្ទះជួលរបស់ឈ្មោះ យ៉ាន់ សុផុន ភេទស្រី អាយុ៦៥ឆ្នាំ មានមនុស្សដេកស្លាប់ក្នុងផ្ទះ ដែលមានចាក់សោរជាប់ពីខាងក្នុង។
សមត្ថកិច្ចបានបន្តថា ភ្លាមៗនោះ កម្លាំងជំនាញចុះទៅដល់កន្លែងកើតហេតុឃើញថា ទ្វារផ្ទះត្រូវបានម្ចាស់ផ្ទះជួល និងសាច់ញាតិជនរងគ្រោះ ព្រមទាំងប្រជាពលរដ្ឋកំពុងនាំគ្នាគាស់ រួចចូលទៅក្នុងផ្ទះ ឃើញមានមនុស្ស២នាក់ដេកស្លាប់ក្នុងបន្ទប់ (ឪពុកនិងកូនស្រី) ចំណែកម្តាយនៅមានដង្ហើម ក៏បញ្ជូនទៅសង្គ្រោះនៅមន្ទីរពេទ្យបង្អែកខេត្ត ហើយក្រោយមកបានស្លាប់នៅវេលាម៉ោង១១នឹង២០នាទីយប់។
បច្ចុប្បន្នសាកសពទាំង៣នាកឪពុកម្តាយនិងកូនស្រី សមត្ថកិច្ចបានយកទៅតម្កល់ទុកនៅវត្តឥន្ទញ្ញាណ ហៅវត្តក្រោម ស្ថិតក្នុងសង្កាត់៣ ក្រុងព្រះសីហនុ ដើម្បីបន្តតាមនីតិវិធី។
គួរបញ្ជាក់ថា ក្រុមគ្រួសារ១ មានគ្នា៣នាក់ ត្រូវបានពុលស្លាប់ប្តីនិងកូនស្រី ចំណែកម្តាយរងរបួសធ្ងន់ ត្រូវបានដឹកទៅព្យាបាលនៅមន្ទីរពេទ្យបង្អែក តាមការសន្និដ្ឋានរបស់សមត្ថកិច្ចបានបញ្ជាក់ជំហានដំបូងថា ការពុលនេះ អាចកើតឡើងដោយមនុស្សក្នុងក្រុមគ្រួសារនេះ ដាក់សម្លាប់ក្រុមគ្រួសារខ្លួនឯង។
ហេតុការន៍ដ៏រន្ធត់នេះបានកើរឡើងនៅវេលាម៉ោង៨យប់ ថ្ងៃទី២០ ខែសីហា ឆ្នាំ២០១៩ ស្ថិតនៅក្រុម៧ ភូមិ៣ សង្កាត់លេខ២ ក្រុងព្រះសីហនុ ម្តុំជិតផ្សារពាណិជ្ជកម្ម។
ក្រុមគ្រួសារដែលពុលស្លាប់នេះ បុរសជាប្តីមានឈ្មោះ លី ខេង អាយុ៤៣ឆ្នាំ មុខរបរអ្នកម៉ៅការសំណង់ (ស្លាប់), កូនស្រីឈ្មោះ លី សុីវឈីង អាយុ១២ឆ្នាំ មុខរបរសិស្ស (ស្លាប់) ចំណែកស្ត្រីជាប្រពន្ធមានឈ្មោះ មុឹង ចាន់ផល អាយុ ៤១ មុខរបរអ៊ុតសក់ (កំពុងសង្គ្រោះបន្ទាន់)។
ប្រភពពីសមត្ថកិច្ចបានឲ្យដឹងថា មុនពេលកើតហេតុ សមត្ថកិច្ចបានទទួលព័ត៌មានថា មានក្រុមគ្រួសារ១ក្រុមមានគ្នា៣នាក់ បានពុលស្លាប់។ ភ្លាមនោះ សមត្ថកិច្ចបានដឹកនាំកម្លាំងចុះដល់ផ្ទះកើតហេតុ ឃើញបុរសជាប្តីនិងកូនស្រីស្លាប់បាត់ទៅហើយ ចំណែកស្ត្រីជាប្រពន្ធនៅមានដង្ហើម ក៏បានដឹកទៅសង្គ្រោះនៅមន្ទីរពេទ្យបង្អែកខេត្តព្រះសីហនុ។
សមត្ថកិច្ចបានបន្តថា មូលហេតុដែលពុលស្លាប់នេះ នៅមិនទាន់ដឹងពីមូលហេតុពិប្រាកដនៅឡើយ ខណៈដែលសមត្ថកិច្ចកំពុងស្រាវជ្រាវនិងប្រមូលភស្តុតាងនៅកន្លែងកើតហេតុ។
យ៉ាងណា មកដល់ព្រឹកថ្ងៃទី២១ ខែសីហា ឆ្នាំ២០១៩ សមត្ថកិច្ចបានបញ្ជាក់ថា នេះគឺជាអំពើដាក់ថ្នាំពុលសម្លាប់ក្រុមគ្រួសារឯង មិនមែនជាអំពើឃាតកម្មបង្កឡើងពីភាគីផ្សេងនោះទេ និងថាបច្ចុប្បន្នសម្ថកិច្ចជំនាញកំពុងធ្វើការស្រាវជ្រាវបន្តតាមនិតិវិធី៕