ភ្នំពេញ ៖ យុវជនឈាមរាវម្នាក់បានសុំលុយឪពុកទិញថ្នាំមិនបាន ក៏កើតចិត្តខឹងសម្បា បានធ្វើកម្មភាពដុតផ្ទះខ្លួនឯង ពន្តាលឲ្យស្លាប់ឪពុកនិងប្អូនប្រុស ពេលទៅដល់មន្ទីរពេទ្យ ហើយភ្លើងបានឆាបឆេះរាលដាលដល់ផ្ទះ១១ខ្នងទៀត។
ហេតុការណ៍នេះ បានកើតឡើង នៅវេលាម៉ោង១២ថ្ងៃទី១៧ ខែកញ្ញា ឆ្នាំ២០១៩ នៅចំណុចភូមិឃ សង្កាត់ច្រាំងចំរេះ២ ខណ្ឌឫស្សីកែវ តាមបណ្ដោយផ្លូវជាតិលេខ៥។
ជនរងគ្រោះជាឪពុក មិនទាន់ស្គាល់អត្តញ្ញាណនៅឡើយទេ។ ចំណែកប្អូនប្រុសរបស់ជនសង្ស័យ មានអាយុ១៣ឆ្នាំ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញជនសង្ស័យជាមនុស្សញៀនថ្នាំខាងលើបានសុំលុយឪពុករបស់ខ្លួន ដើម្បីយកទៅទិញថ្នាំ ប៉ុន្តែបុរសជាឪពុកមិនឲ្យនោះទេ ថែមទាំងស្តីបន្ទោសតិចតួចផងដែរ។
ប្រភពបានបន្តទៀតថា ពេលនោះពុំមាននរណាម្នាក់ចាប់អារម្មណ៍នោះទេ ស្រាប់តែជនសង្ស័យខាងលើបានធ្វើសកម្មភាពដុតផ្ទះខ្លួនឯងចោល ខណៈដែលឪពុកនិងប្អូនប្រុសនៅក្នុងផ្ទះ បណ្តាលឲ្យឆាបឆេះសន្ធោសន្ធៅ រួចភ្លើងបានបន្តឆាបឆេះរាលដាលដល់ផ្ទះ១១ខ្នងទៀត បណ្តាលឲ្យជនរងគ្រោះទាមង២នាក់បានស្លាប់រួញក្រញ៉ង់ក្នុងភ្លើង ចំណែកជនសង្ស័យក្រោយពេលធ្វើសកម្មភាព បានរត់គេចខ្លួនបាត់។
ក្រោយមានហេតុការណ៍ភ្លើងឆាបឆេះកើតឡើង រថយន្តពន្លត់អគ្គិភ័យរបស់សាលាខណ្ឌឫស្សីកែវ ស្នងការរាជធានី រួមនឹងអាជ្ញាធរប៉ូលិសមូលដ្ឋានផងដែរ បានចេញទៅអន្តរាគមន៍បាញ់ទឹកពន្លត់ ដោយប្រើពេល១ម៉ោង ទើបរលត់ជាស្ថាពរ និងប្រើប្រាស់ឡានទឹកសរុបចំនួន២៧គ្រឿង៕