ខេត្តព្រៃវែង ៖ យុវតីរហ័សនាម “បងធំមេសាង ខេត្តព្រៃវែង” ដែលត្រូវបានគេចែកចាយវីដេអូក្នុងបណ្តាញសង្គមហ្វេសប៊ុកបង្ហាញពីសកម្មភាពនិងសម្តីសំដៅក្រអើតក្រទម គំរាមវាយគេឯងដោយគ្រាន់តែខឹងគេជិះម៉ូតូមកលេងស្រុករបស់ខ្លួននោះ ត្រូវកម្លាំងសមត្ថកិច្ចតាមចាប់ខ្លួនយកមកសួរនាំ នៅថ្ងៃទី១៣ ខែមករា ឆ្នាំ២០២០។
ដោយឡែក បើយោងតាមគណនីហ្វេសប៊ុកសមាគមអតីតសិស្សវិទ្យាល័យមេសាង បានបង្ហោះសារថា ”ថ្ងៃអង្គារ៤រោច ខែបុស្ស ឆ្នាំកុរ ឯកស័ក ពស ២៥៦៣ ត្រូវនឹងថ្ងៃទី14 ខែមករា ឆ្នាំ2020។ ថ្ងៃស្អែកនេះ ក្នុងវេទិកាសាធារណៈនៅមុខអភិបាលស្រុក អធិការស្រុក ប្រជាជនក្នុងស្រុក សមត្ថកិច្ចនឹងឱ្យនារីជើងខ្លាំងធ្វើការសុំទោសនូវកំហុសរបស់ខ្លួនជាសាធារណៈ”។
ប្រភពនេះបន្តថា “យុវតីរូបនេះមានឈ្មោះ ធី ចាន់រ៉ី ភេទស្រី អាយុ១៦ឆ្នាំ ជាសិស្សរៀនថ្នាក់ទី១០F នៅវិទ្យាល័យមេសាង នៅភូមិថ្មសរ ឃុំជីផុច ស្រុកមេសាង បានវាយនិងដៃចំនួន២ដៃទៅលើជនរងគ្រោះឈ្មោះកាកា ជាសិស្សរៀនថ្នាក់ទី១០ នៅវិទ្យាល័យអង្គសរ”។
ប្រភពនេះបន្តទៀតថា “ចំពោះមូលហេតុដោយសារឌឺដងពាក្យសំដី និងសម្លឹងមុខដាក់គ្នារហូតមកដល់ថ្ងៃទី១៣ ខែមករា ឆ្នាំ២០២០ វេលាម៉ោង១៖៣០នាទីរសៀល សមត្ថកិច្ចបានស្រាវជ្រាវឃាត់ខ្លួនបាន និងហៅមកសាកសួរ និងបំពេញនីតិវិធីនៅអធិការដ្ឋាននគរបាលស្រុកមេសាង ខេត្តព្រៃវែង”។
ប្រភពបន្ថែមថា “ថ្ងៃទី១៤ ខែមករា នឹងមានការរៀបចំវេទិកាសាធារណៈមួយនៅវិទ្យាល័យមេសាង ដោយមានការអញ្ជើញចូលរួមពីអភិបាលស្រុក លោកអធិការស្រុក និងលោកគ្រូ–អ្នកគ្រូ ព្រមទាំងសិស្សានុសិស្ស ហើយតម្រូវឱ្យយុវតីខាងលើសុំទោសជាសាធារណៈនៅក្នុងវេទិកាសាធារណៈនេះតែម្ដង”។
គួរបញ្ជាក់ថា វីដេអូឃ្លីបមួយ ត្រូវបានបង្ហោះចែកចាយក្នុងបណ្តាញសង្គម ដែលបង្ហាញពីសកមμភាព របស់យុវតីឈាមរាវម្នាក់រួម ជាមួយបក្ខពួកជាច្រើននាក់ បានស្ទាក់ម៉ូតូរបស់យុវតីចំនួន៤នាក់ផ្សេងទៀត ដែលអះអាងថា ជាអ្នកមកពីស្រុកផ្សេង មិនមែននៅស្រុកមេសាង សួរនាំ និងគំរាមរកវាយ ដោយសារតែភាគីម្ខាងទៀតបានមើលមុខឌឺដងដាក់ខ្លួន៕