តារាសម្ដែងលី ម៉ារីណា បានប្រារព្ធខួបកំណើតគម្រប់អាយុ៤០ឆ្នាំកាលពីរាត្រីថ្ងៃទី២៦ ខែឧសភា ឆ្នាំ២០២០ នៅហាងវីហ្រេ្វនបឹងត្របែក ដោយមានតែភ្ញៀវជិតដិតបំផុតប៉ុណ្ណោះ ដែលទៅចូលរួម ក្នុងនោះដែរ គេឃើញមានលោកកៅ សីហា, សុខា និងចែ រ៉ូហ្សា ជាដើម បានទៅជូនពរនាងដល់បន្ទប់ប្រារពកម្មវិធីតែម្ដង។
ចំពោះមូលហេតុដែលម៉ារីណា មិនហ៊ានធ្វើខួបធំដូចឆ្នាំមុន ដោយហៅភ្ញៀវរាប់រយនាក់ឲ្យចូលរួមនោះ ដោយសារតែនាងនៅតែមានការបារម្ភពីជំងឺកូវីដ-១៩ អីចឹងហើយបានជាមិនចង់ឲ្យមានការជួបជុំទ្រង់ទ្រាយធំឡើយ។
តារាសម្ដែងចែ រ៉ូហ្សា ដែលបានទៅចូលរួមកម្មវិធីខួបកំណើតអ្នកនាងលី ម៉ារីណា បានឲ្យដឹងថា ភ្ញៀវឃើញចូលរួមខួបអ្នកនាងលី ម៉ារីណា មើលទៅមានតែខ្ទង់ជាង២០នាក់ទេ ហើយសុទ្ធតែជាអ្នកជិតស្និទ្ធទាំងអស់។
ចែ រ៉ូហ្សា បន្ថែមថា អ្នកនាងម៉ារីណា ធ្វើខួបនៅបន្ទប់ខារ៉ាអូខេ VIP នៅហាងវីហ្រ្វេនបឹងត្របែក។
នេះមិនមែនជាលើកទី១ឡើយ សម្រាប់អ្នកនាងលី ម៉ារីណា ពោលគឺជារៀងរាល់ឆ្នាំ អ្នកនាងតែងតែធ្វើខួបកំណើតនៅទីនោះ ហើយនាងធ្លាប់និយាយថា ដោយសារតែលោកថៅកែហាងនោះ មានការរាប់អានគ្នាជាមួយនាងជាច្រើនឆ្នាំមកហើយ។ ប៉ុន្ដែមានតែឆ្នាំនេះទេ ដែលម៉ារីណា ធ្វើខួបតូចព្រោះចំរដូវកូវីដ-១៩។
ប៉ុន្តែក្នុងថ្ងៃពិសេសរបស់ម៉ារីណា គេក៏ឃើញស្វាមីរបស់នាង លោកសាត ចាន់ថន ក៏បានចូលរួមជូនពរភរិយារបស់លោកដែរ ក្រោយពីលោកបានហោះពីអាមេរិក មកសម្ងំនៅស្រុកខ្មែរ ជាច្រើនខែមកហើយ។
លី ម៉ារីណា បានរៀបការជាមួយអាណិកជនខ្មែរ មកពីអាមេរិក លោកសាត ចាន់ថន កាលពីថ្ងៃទី២៧ ខែឧសភាឆ្នាំ២០១៣ ហើយពេលនេះពួកគេទទួលបានចំណងដៃកូនប្រុសម្នាក់ ឈ្មោះសាត ថៃសាន់ អាយុជាង៥ឆ្នាំ។
ម៉ារីណា បានផ្អាកពីអាជីពសិល្បៈជាង៣ឆ្នាំ ក្រោយផ្ទុះរឿងស្នេហ៍មន្រ្ដីធំផ្កាយ៣ម្នាក់ មុនថ្ងៃរៀបការតែដំណឹងនោះបានស្ងាត់បន្ដិចម្ដងៗ ក្រោយនាងរៀបការរួចហើយ ពេលនេះនាងបានបន្ដប្រឡូកសិល្បៈពេញទំហឹង ដោយថែមទាំងទិញរថយន្ដ Lexus LX 570 ជិះយ៉ាងហ៊ឺហាទៀតផង ខណៈដែលគម្រោងយកកូនស្រីត្រូវបានផ្អឹបមួយអន្លឺសិន៕
ហ៊ឹម វិចិត្រ