តារាចម្រៀងខេម ប៊ុនថៃ ហៅខេមរៈ សិរីមន្ដ មិនត្រឹមតែបង្ហាញជាចំហនូវភាពផ្អែមល្ហែមជាមួយភរិយា អ្នកនាងកួយ ផល្លី នោះទេ តែសិរីមន្ដ ក៏បានឡង់សេភរិយា តាមរយៈស្ពតរថយន្ដមួយផងដែរ។ ពួកគេតែងតែកៀកកើយគ្នាភ្ជាប់ជាមួយឡាននោះ ទើបគ្រប់គ្នាលាន់មាត់ថា លោកសិរីមន្ត កំពុងតែព្យាយាមឡង់សេប្រពន្ធឲ្យល្បីដូចខ្លួនដែរហើយ។
ប៉ុន្ដែយ៉ាងណា សិរីមន្ដ មិនទាន់យកប្រពន្ធចូលថត MV ដូចកំពូលតារាចម្រៀងព្រាប សុវត្ថិ នោះទេ ខណៈដែលកន្លងមកអ្នកចម្រៀងរូបនេះធ្លាប់ចេញបទ ”គ្មានអ្នកណាល្អជាងប្រពន្ធខ្ញុំ” ដែលសិរីមន្ដ ច្រៀងសំដៅលើប្រពន្ធនោះ ក៏បានប្រើប្រាស់តួអង្គតារាស្រីសម្ដែងម្នាក់ជំនួសប្រពន្ធខ្លួនដែរ។
ទោះជាយ៉ាងណាតាមរយៈការបញ្ចេញភាពផ្អែមល្ហែមជាមួយភរិយាកាន់តែខ្លាំងឡើងៗនេះ ទំនងមើលទៅខេមរៈ សិរីមន្ដ អាចនឹងរៀបគម្រោងយកកូនទី៤ ជាមិនខាន ខណៈដែលចំណងស្នេហ៍ជាង១០ឆ្នាំនេះ ពួកគេទទួលបានចំណងដៃកូន៣នាក់ គឺកូនទី១. ឈ្មោះខេមរៈ មន្ដសេ្នហ៍ អាយុជិត៧ឆ្នាំ, កូនទី២. ឈ្មោះខេមរៈ ស្ត្រី អាយុជាង៣ឆ្នាំ និងកូនទី៣. ឈ្មោះថុន ខេមរៈរាជនីយ៍ អាយុជាង១ឆ្នាំ។
គេថា សិរីមន្ដ ដែលពិបាកយកឈ្នះព្រាប សុវត្ថិ នៅទ្រនំហង្សមាសនោះអាចនឹងវ៉ាកំពូលតារាចម្រៀងរូបនេះ បានតាមរយៈការយកកូនលើស គឺកូនទី៤ ព្រោះព្រាប សុវត្ថិ ចាប់ដៃអ្នកស្រីឡុង ស្រីមុំ ២៣ឆ្នាំទៅហើយ ទទួលបានកូនសុទ្ធតែប្រុសទាំង៣នាក់តែម្ដង។
ដោយឡែក លោកសិរីមន្ត វិញបានព្យាយាមលាក់រឿងប្រពន្ធកូន៩ឆ្នាំ ទើបតែកាលពីចុងឆ្នាំ២០១៨ ដោយសារមិនអាចទប់ជាប់រឿងមានប្រពន្ធកូននេះតទៅទៀត ព្រោះផ្ទុះខ្លាំងពេក ទើបសិរីមន្ដ ព្រមសារភាពដោយអះអាងថា លោកមានប្រពន្ធកូន៣ទៅហើយនិងបានរៀបការតាមប្រពៃណីខ្មែរ តាំងពីឆ្នាំ២០០៩ម្ល៉េះ ដែលការលាតត្រដាងបែបនេះ ធ្វើឲ្យក្រមុំៗទាំងឡាយដែលធ្លាប់តាមចាប់ឱបថើបសិរីមន្ដ ដល់ឆាកនោះ ដាច់ផ្ញារតែម្ដង។
ប៉ុន្តែរហូតមកដល់ពេលនេះ គេមិនដែលប្រទះឃើញសិរីមន្ដ ហ៊ានបញ្ចេញរូបភាពរៀបអាពាហ៍ពិពាហ៍ ១សន្លឹក ឲ្យគេឃើញដូចព្រាប សុវត្ថិ ឡើយ ៕