បន្ទាយមានជ័យ ៖ សម្ដេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា កាលពីព្រឹកមិញនេះ បានលើកសរសើរ ឧកញ៉ាវ័យក្មេង ឡេង ណាវ៉ាត្រា ដែលបានចូលរួមឧបត្ថម្ភដល់រាជរដ្ឋាភិបាល៦០ម៉ឺនដុល្លារ សម្រាប់ជួយសង្គ្រោះប្រជាពលរដ្ឋដែលរងគ្រោះដោយសារទឹកជំនន់ ព្រមទាំងយកអំណោយអង្ករ៥០តោន ហើយថែមដឹកនាំកំពូលតារាចម្រៀងល្បីៗ ដូចជា ព្រាប សុវត្ថិ, ខេម, តន់ ច័ន្ទសីម៉ា និងអ៊ុក សុវណ្ណារី ជាដើម ចុះចែកអំណោយដោយផ្ទាល់ នៅខេត្តបន្ទាយមានជ័យ។
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លើកឡើងថា ” ការពិត លោកឧកញ៉ាឡេង ណាវ៉ាត្រា បានធ្វើដំណើរត្រឡប់វិញហើយ ដោយសម្រាកនៅខេត្តសៀមរាប បន្ទាប់ពីនាំក្រុមតារា មកចែកអំណោយជូនពលរដ្ឋ ប៉ុន្តែសម្ដេចបានបបួលមកចូលរួមកម្មវិធីចែកអំណោយនេះ។ “គេជួយ៦០ម៉ឺនដុល្លារ ឧកញ៉ាវ័យក្មេងរូបនេះ ជួយដល់៦០ម៉ឺនដុល្លារឯណោះ រួចគេដឹកអង្ករ៥០តោន មកចែកជូនពលរដ្ឋនៅខេត្តបន្ទាយមានជ័យទៀត ចឹងហើយគេត្រឡប់ទៅដល់សៀមរាប ក៏ហៅមកជាមួយទៅ”។
ការលើកសរសើរបែបនេះ គ្រាដែលសម្ដេចតេជោ អញ្ជើញចែកអំណោយជូនប្រជាពលរដ្ឋ១ម៉ឺនគ្រួសារ ដែលរងគ្រោះដោយសារទឹកជំនន់នៅស្រុកមង្គលបូរី ខេត្ត បន្ទាយមានជ័យ នាព្រឹកថ្ងៃទី២១ ខែ តុលា ឆ្នាំ២០២០នេះ។
ទន្ទឹមគ្នានោះដែរ សម្ដេច ក៏បានថ្លែងអំណរគុណដល់សប្បុរសជនទាំងអស់ ដែលបានចូលរួមឧបត្ថម្ភដល់រាជរដ្ឋាភិបាល បើគិតត្រឹមម៉ោង11:29នាទីព្រឹក ថ្ងៃទី២០ ខែតុលា ឆ្នាំ២០២០ នេះ ថវិកាទទួលបាន 7,170,549ដុល្លារ, 627,025,000រៀល, ៥.០០០€ (ប្រាំពាន់អឺរ៉ូ) និងអង្ករ១០០តោន ។
ក្នុងចំណោមឧកញ៉ាល្បីៗ ដែលជាម្ចាស់ក្រុមហ៊ុនជាច្រើនរូប បានចូលរួមបរិច្ចាគថវិកា គេឃើញថា ថៅកែ Galaxy លោកឧកញ៉ា ឡេង ណាវ៉ាត្រា នាយកក្រុមហ៊ុន ឡេង ណាវ៉ាត្រាគ្រុប បានចូលរួមបរិច្ចាគ ថវិកាជូន៦០ម៉ឺនដុល្លារ ដែលជាចំនួនដ៏ច្រើនជាងគេ៕