បើទោះជាកែវ ពេជ្រពិសី មិនទាន់បានសម្រាលកូនតែនាងនិងស្វាមីបានដាក់ឈ្មោះសមាជិកថ្មីរបស់ពួកគេជាសេ្រចទៅហើយនាងថា”ដូរ៉ា”។ដោយឡែកអារម្មណ៍របស់ពេជ្រពិសី វិញគឺភ័យអៗព្រោះថាការសម្រាលកូនលើកទី១របស់នាងនេះធ្វើដោយវះកាត់ទើបធ្វើឲ្យនាងភ័យព្រួយខ្លះៗបើទោះជានាងបានទៅពិនិត្យសុខភាពយ៉ាងទៀងទាត់ហើយក្រុមគ្រូពេទ្យជំនាញថាសុខភាពនាងនិងកូនល្អដូចគ្នាក្ដី។ចំពោះអារម្មណ៍អរបស់ពេជ្រពិសី នោះគឺពេលនេះនាងជិតក្លាយទៅជាម្ដាយគេហើយ ដែលនេះជាបំណងដ៍ធំបំផុតក្នុងជីវិតរបស់នាងគឺការមានស្វាមីនិងកូនដូចគ្រួសារគេ ព្រោះថាពេលនេះនាងក៍មានអាយុកាន់តែច្រើនដែរ បើនៅតែពន្យាពេលអាចប្រឈមរឿងគ្មានកូនប្រើជាមិនខាន។
គេកត់សម្គាល់ដែរថាមុនកែវ ពេជ្រពិសី សម្រាលកូនដំបូងនេះនាងបានត្រៀមខ្លួនរួចជាស្រេចដោយទិញសម្ភារៈសម្រាប់ក្មេងដាក់ពេញបន្ទប់តែម្ដងក្នុងនោះមានដូចជាខោអាវទារក,ទឹកដោះគោ រួមទាំងរបស់របក្មេងលេង។ចំណែកស្វាមីរបស់ពេជ្រពិសី លោកពៅ សម្បត្តិ វិញនៅចាំលើកទឹកចិត្តដល់ពិសី គ្រប់ពេលវេលាទាំងអស់ពិសេសក្រោយដឹងថាភរិយារបស់លោកមិនមែនសម្រាលតាមបែបធម្មជាតិ គឺដោយវះកាត់នោះលោកកាន់តែនៅក្បែរកាយ៉ាភរិយាជាប្រចាំតែម្ដង។
ពេជ្រពិសី ប្រាប់អ្នកយកព័តមានយើងថាមូលហេតុដែលនាងសម្រេចចិត្តជ្រើសលោកសម្បត្តិ ជាគូអនាគតព្រោះតែបុរសម្នាក់នេះស្រលាញ់នាងនិងក្រុមគ្រួសារដោយស្មោះត្រង់។ពិសី ថាអារម្មណ៍ពេលនេះពិតជាមិនអាចថ្លែងបានមែនព្រោះថាទាំងរូបនាងនិងស្វាមីពិតជាអន្ទះសារខ្លាំងណាស់ព្រោះចង់ឃើញមុខកូនប្រុសសំណព្វចិត្ត។
កែវ ពេជ្រពិសី បានធ្លាក់ខ្លួនមេម៉ាយកាលពីឆ្នាំ២០១០ក្រោយនាងចែកផ្លូវគ្នាជាមួយអតីតប្ដីលោកចន្ថា ស្រី ដែលជាអាណិកជនខ្មែរនៅអូស្រ្ដាលីដោយគ្មានកូន១គ្រាប់ឡើយ។ក្នុងជីវិតស្រី្ដមេម៉ាយជិត១០ឆ្នាំពេជ្រពិសី មានជម្រើសស្នេហ៍ច្រើនទាំងទាំងបុរសក្នុងនិងក្រៅស្រុក តែទីបំផុតនាងសម្រេចចិត្តប្រគល់បេះដូងទៅឲ្យលោកពៅ សម្បត្តិ ដែលជាបុរសពោះម៉ាយវ័យ៥០ឆ្នាំមកពីកាណាដា តាមរយៈការភ្ជាប់ពាក្យតាមប្រពៃណីខ្មែរត្រឹមត្រូវកាលពីថ្ងៃទី១៧ ខែឧសភា ឆ្នាំ២០២០ ហើយនាងមានបំណងរៀបការភ្លាមៗតាំងពីក្រោយភ្ជាប់ពាក្យរួចតែដោយសារតែកូវីដមិនស្ងាត់ទើបពិសី សម្រេចលុបចោលមង្គលការដោយខាតអស់ប្រាក់កក់កម្មវិធីមួយចំនួនទៀតផង។ពិសី ថាបន្ទាប់ពីសម្រាលកូនរួចនាងមិនទាន់គិតដល់ថាតើត្រូវទៅរស់នៅកាណាដាតាមស្វាមីឬយ៉ាងណានោះទេ ប៉ុន្ដែចិត្តនាងចង់នៅស្រុកខ្មែរច្រើនជាង៕