មាស សុខសោភា គឺជាតារាស្នូលរបស់ផលិតកម្មរាម ពោលគឺគេស្គាល់ផលិតកម្មថ្មីនេះតាមរយៈឈ្មោះល្បីល្បាញរបស់នាង ហើយឥទ្ធិពលរបស់សុខសោភា ធ្វើឲ្យអតីតតារាហង្សមាសលោកដួង វីរៈសិទ្ធ ដែលជាអ្នកចម្រៀងម្នាក់មានសម្ថភាពខ្ពស់ព្រោះចេះនិពន្ធទំនុកច្រៀងនិងMelodyព្រមទាំងMixដោយខ្លួនឯងនោះសុខចិត្តដើរចេញពីទ្រនុំធំដើម្បីមកធ្វើជាដៃគូរបស់អ្នកចម្រៀងសំនៀងផ្អែមរូបនេះ។ទោះជាយ៉ាងណាការដែលសុខសោភា ធ្វើជាដៃគូជាមួយវីរៈសិទ្ធ នោះមានមតិមួយចំនួនលើកឡើងថាអ្នកទាំង២មិនសូវសាកសមគ្នាពេលដែលច្រៀងសម្ដែងជាបទស្នេហានិងសម្ដែងMVនោះព្រោះសម្អាងថាសោភា មានអាយុបងវីរៈសិទ្ធ ដល់ទៅ១៣ឆ្នាំឯណ្ណោះ។
ទោះជាយ៉ាងណាក្នុងជំនួបតាមទូរស័ព្ទជាមួយដួង វីរៈសិទ្ធ អាយុ២៨ឆ្នាំជាម្ចាស់ពានI Am A Singer រដូវកាលទី១រូបនេះថាលោកមិនដែលគិតពីបញ្ហាអាយុខុសគ្នារវាងលោកនិងសុខសោភា នោះទេ។តារាចម្រៀងរូបសង្ហារសំនៀងផ្អែមរូបនោះថាការចាប់ដៃគូឆ្លងឆ្លើយជាមួយរៀមច្បងគឺក្រុមហ៊ុនជាអ្នករៀបចំ ហើយលោកផ្ទាល់មានមោទនភាពដែលបានច្រៀងជាមួយរៀមច្បងដ៍ល្បីល្បាញម្នាក់នេះ។
បើតាមព័តមានថាក្រៅពីឲ្យមាស សុខសោភា ធ្វើជាគូចម្រៀងជាមួយដួង វីរៈសិទ្ធ នោះផលិតកម្មរាម ក៍នឹងលើកតារាល្បីឈ្មោះទាំង២ដួងរបស់ខ្លួននេះឲ្យធ្វើជាតួឯកភាពយន្ដនៅពេលខាងមុខផងដែរដើម្បីឲ្យពួកគេកាន់តែល្បីល្បាញថែមទៀត។
លោកSpy អ្នកគ្រប់គ្រងផ្នែកសម្លេង(Sound)របស់រាម មិនអាចទាក់ទងបានឡើយកាលពីថ្ងៃទី១៦ខែកញ្ញា ព្រោះទូរស័ព្ទលោកតេមិនចូល។ប៉ុន្ដែគ្រូភ្លេង(Composer)ម្នាក់នៅហង្សមាសបានឲ្យដឹងថាមាស សុខសោភា ជាតារាស្រីលំដាប់Grade A ហេតុនេះហើយនៅពេលដែលចាប់ដៃជាមួយលោកដួង វីរៈសិទ្ធ នឹងធ្វើឲ្យវីរៈសិទ្ធ ស្ទុះឡើងជាងមុនជាមិនខាន។ចំពោះការថតកុនវិញលោកថារាម ជាអ្នកជំនាញថតស្ពតនិងភាពយន្ដហេតុនេះហើយគង់តែគេឲ្យសុខសោភា និងវីរៈសិទ្ធ ធ្វើជាតួឯកប្រុសស្រីក្នុងរឿងរបស់គេទេ។លោកបន្ថែមថាបញ្ហាអាយុខុសគ្នារវាងសុខសោភា និងវីរៈសិទ្ធ នោះមិនជាបញ្ហាចោទឡើយ ព្រោះសំខាន់នៅលើអ្នកដឹកនាំសម្ដែង។
មាស សុខសោភា បានដើរចេញពីថោន ជាង១ឆ្នាំទៅហើយដើម្បីទៅជ្រកនៅរាម ដោយផាត់ចោលហង្សមាស និងGalaxy។រយៈពេលជាង៧ខែដែលសោភា ផ្ញើរខ្លួនជាមួយទ្រនុំថ្មីនេះនាងល្បីឈ្មោះខាងលក់ផលិតផលជាងបទចម្រៀង ប៉ុន្ដែតារាចម្រៀងសំនៀងផ្អែមរូបនេះមានផលិតកម្មផ្ទាល់ខ្លួនឈ្មោះCamtraxដែលគ្រប់គ្រងដោយស្វាមីរបស់នាងនៅក្រោយខ្នងចាំជួយអន្ដរាគមន៍រួចជាស្រេចក្នុងករណីដែលនាងប្រឈមការធ្លាក់កូដគ្មានបទផ្ទុះនៅរាម តទៅទៀត៕
