ស្រីស្រស់ធ្មេញចំពើសនាងរ៉េត ស៊ូហ្សាណា ដែលជាតារាមានយ៊ីអ៊ុននៅហង្សមាសនោះត្រូវបានគេដឹងថានាងមានការស្លៀកពាក់ប្រយ័ត្នប្រយ៉ែងខ្លាំងណាស់មិនដែលហ៊ានបង្អួតសាច់គល់ភ្លៅនិងដើមទ្រូងឲ្យគេឃើញឡើយ។យ៉ាងណានៅរដូវកូវីដនេះស៊ូហ្សាណា បែជាចូលចិត្តស្លៀកខោខ្លីរឹបត្រឹមគល់ភ្លៅបញ្ចេញស្បែកសាច់យ៉ាងសខ្ចីម៉ដខៃតែម្ដងដែលធ្វើឲ្យប្រុសៗកាន់តែច្រើនលង់សម្រស់នាង។
តែភាពស៊ិចស៊ីរបស់នាងហ្សាណា នោះគ្រាន់តែជាការលើកសម្រស់នាងឲ្យកាន់តែត្រដែតថែមទៀតប៉ុណ្ណោះ មិនមានការហួសហេតុនាំឲ្យមានការរិះគន់ឡើយ ខណៈដែលការលេងខ្លួនបែបនេះជាStyleយុវវ័យហើយម្យាងទៀតនាងជាអ្នកលក់ខោអាវតាមOnline ម្នាក់ហេតុនេះហើយចេតនានៃការបង្ហាញម៉ូដសម្លៀកបំពាក់ច្រើនជាងចង់ឲ្យគេឃើញសាច់គល់ភ្លៅដ៍ខ្ចីល្វក់នោះ។
រ៉េត ស៊ូហ្សាណា ចាប់អាជីពចម្រៀងជាង៣ឆ្នាំមិនទាន់ប៉ៈរឿងអាស្រូវស្នេហាឡើយព្រោះស្ទើតែគ្រប់វិនាទីស្រីស្រស់រូបនេះតែងតែមានឪពុកម្ដាយតាមការពារជាប្រចាំតែម្ដងទើបធ្វើឲ្យបណ្ដារប្រុសៗទាំងឡាយដែលចង់ឆក់ស្នេហ៍នាងបានបរាជ័យ។យ៉ាងណានាងហ្សាណា ដែលមានត្រេមុខដូចកូនកាត់ជប៉ុនរូបនេះក៍មិនមែនបេះដូងនៅទំនេរនោះទេ ព្រោះតែកន្លងមកនាងធ្លាប់បង្ហាញសញ្ញាមានម្ចាស់ចិត្តទៅហើយដោយកាន់ដៃប្រុសម្នាក់តែនាងមិនព្រមបង្ហាញមុខបុរសនោះឡើយ។
នាងជាស្រីស្អាតម្នាក់នៅក្នុងសិល្បៈទោះជាមិនចាំបាច់បញ្ចេញសាច់គល់ភ្លៅគ្រាន់តែបង្អួតសម្រស់ធម្មតាៗនោះក៍មានប្រុសលង់សម្រស់នាងដោយមិនដឹងខ្លួនបាត់ទៅហើយ។ប៉ុន្ដែយ៉ាងណាក្នុងចំណោមតារាស្រីនៅហង្សមាសនៅរដូវកូវីដនេះគេកត់សម្គាល់ថានាងហ្សាណា មិនត្រឹមតែកំពុងតែមានទីផ្សារចម្រៀងល្អនោះទេ ប៉ុន្ដែនាងក៍ត្រូវបានថៅកែដាក់ជាមុខសញ្ញាជាតារាសំខាន់នៅផលិតកម្មរួចជាស្រេចទៅហើយតាមរយៈការផ្ដល់តំណែងតួឯកឲ្យនាងជាបន្ដបន្ទាប់នាពេលកន្លងមក ។
គេកត់សម្គាល់ថាក្រោយហ្សាណា ក្រោយចេញបទ”សង្ស័យ”នោះមកធ្វើឲ្យអ្នកដែលធ្លាប់តែរិះគន់នាងកន្លងមកថាជាអ្នកចម្រៀងច្រៀងមិនកើត បានតែសម្រស់ទាក់ទាញនោះចាប់ផ្ដើមស្ងាត់មាត់ដោយសារតែអតីតបេក្ខភាពThe Voice Cambodia រដូវកាលទី២រូបនេះមានសម្លេងឡើងជាងមុន។តែអ្នកជំនាញសិល្បៈលោកមិញ សុធីវណ្ណ ធ្លាប់ប្រាប់ថាហ្សាណា សម្លេងច្រៀងបទខ្មែរនៅមានកម្រិតនៅហើយត្រូវការពេលវេលាថែមទៀត ប៉ុន្ដែនាងមានភាពទាក់ទាញតាមរយៈរូបសម្រស់និងការច្រៀងបទជាភាសារបរទេសច្រើនជាង។
រ៉េត ស៊ូហ្សាណា មិនជួបវិបត្ដិសេដ្ឋកិច្ចឡើយនៅរដូវកូវីដនេះព្រោះនាងទើបទិញផ្ទះ២ល្វែងជាប់គ្នាតម្លៃមិនក្រោម២០ម៉ឺនដុល្លារកាលពីដើមខែមករាឆ្នាំ២០២០ និងកាលពីថ្ងៃទី១៧ខែឧសភាឆ្នាំ២០២១ នាងបានទិញរថយន្ដJeep Rubicon តម្លៃ៨៧០០០ដុល្លារថែមទៀត។តែអ្វីដែលចម្លែកហ្សាណា មិនសូវត្រូវបានគេម៉ៃថានាងមានគូស្នេហ៍នៅក្រោយខ្នងដូចតារាផ្សេងៗទៀតនោះទេដោយសម្អាងថាក្រុមគ្រួសារនាងមានជីវភាពធូធារស្រាប់ពោលគឺតាំងពីមុននាងចូលសិល្បៈម្លេះ ហេតុនេះហើយទម្ងន់នៃការលេចឭថាហ្សាណា មានគេឧបត្ថម្ភមានសម្ពាធតិចតួច។
ក្រៅពីរ៉េត ស៊ូហ្សាណា តារាចម្រៀងផ្នែកយុវវ័យដែលកំពុងប្រជែងទីផ្សារសិល្បៈនៅឆ្នាំ២០២១នេះមានដូចជានាងរ៉ាប៊ី ,តន់ ច័ន្ទសីម៉ា និងយូរី ជាដើម។ចំពោះនាងហ្សាណា វិញរយៈពេលចុងក្រោយនេះនាងត្រូវបានថៅកែហង្សមាសបើកដៃឲ្យចេញច្រៀងសម្ដែងគ្រប់ប៉ុស្ដិ៍មិនចងជើងសម្រាប់តែច្រៀងនៅហង្សមាសតែមួយប៉ុស្ដិ៍ដូចមុនទៀតទេ ទើបធ្វើឲ្យហ្សាណា កាន់តែមានទីផ្សារទូលាយជាងមុន។ប៉ុន្ដែទោះជាឡើងឆាកណាក៍ឪពុកម្ដាយរបស់នាងតែងតែតាមជាប់ស្អិតគ្រប់ជំហ៊ានដែរគឺដូចគ្នាទៅនិងនាងសុខ ពិសី,អ៊ីវ៉ា,លីនដា ,អ៊ុង នីនិច្ច ,ព្រះកាយ ច័ន្ទ និងស៊ូ ស៊ីរីកា ដែរ៕ ហ៊ឹម វិចិត្រ
