ភ្នំពេញ៖ខេម បានវិលត្រឡប់ពីបារាំងមកដល់ស្រុកវិញកាលពីថ្ងៃទី៦ខែតុលាឆ្នាំ២០២១ តែពេលនេះលោកកំពុងធ្វើចត្តាឡីស័កតាមគោលការណ៍របស់ក្រសួងសុខាភិបាលដើម្បីបង្ការកូវីដទើបតែបាន១០ថ្ងៃពោលគឺនៅសល់៤ថ្ងៃទៀតទើបត្រូវបានបញ្ចប់។ដោយសារតែមិនទាន់បានវិលទៅផ្ទះឬធ្វើការនៅផលិតកម្មGalaxyនោះទើបខេម មិនទាន់កំណត់ពេលវេលានៃការឡើងឆាកតន្រ្ដីតាមប៉ុស្ដិ៍ទូរទស្សន៍វិញនោះទេ។
ក្នុងជំនួបតាមទូរស័ព្ទកាលពីថ្ងៃទី១៤ខែតុលាលោកខេម ដែលបាត់មុខពីឆាកជាង២ខែរូបនេះថ្លែងថាលោកមិនទាន់អាចនិយាយទុកជាមុនបានទេថាការមកដល់ស្រុកវិញនេះត្រូវត្រៀមធ្វើអ្វីខ្លះគឺទាល់តែចប់ការធ្វើចត្តាឡីស័កសិនបានចាប់ផ្ដើមគិតការងារថ្មីៗ។ចំពោះការឡើងឆាកតន្ត្រីវិញក៍លោកមិនទាន់បានត្រៀមខ្លួនដែរពោលគឺនឹងធ្វើទៅតាមពេលវេលា។លោកខេម ប្រាប់ដែរថាការដើរលេងនៅក្រៅប្រទេសអស់ជាង២ខែនេះលោកមានអារម្មណ៍ស្រស់ថ្លាហើយរីករាយច្រើនព្រោះដំណើរកម្សាន្ដយូថ្ងៃជាងលើកមុនៗ។
ខេម បានដឹកដៃកំពូលស្នេហ៍អ្នកនាងស្រីកា ទៅបារាំងកាលពីថ្ងៃទី២០ខែកក្កដាឆ្នាំ២០២១ ហើយការដើរលេងរបស់ពួកគេបានបង្ហួសទៅដល់អាឡឺម៉ង់ និងស្វីសផងដែរ។អ្វីដែលធ្វើឲ្យខេម រីករាយនោះលោកក៍បាននាំគូស្នេហ៍ទៅទស្សនាដោយផ្ទាល់ការប្រកួតរបស់ក្រុមParis Saint- Germain ជាមួយក្រុមManchester City ក្របខណ្ឌChampions League នៅពហុកីឡាដ្ឋានParc des Prince កាលពីថ្ងៃទី២៨ខែកញ្ញា ដែលក្រុមម្ចាស់ផ្ទះបានយកឈ្នះ ក្រុមភ្ញៀវ២ ទល់០ ។
លោកខេម បានឲ្យដឹងថាចំណាយពីផ្ទះដែលលោកស្នាក់នៅទៅក្លឹបParis បើជិះរថយន្ដមិនស្ទះប្រើពេល៣០នាទីដល់។លោកថាក្រៅពីបានទស្សនាដោយផ្ទាល់នូវការប្រកួតរបស់ក្រុមParis ជាញឹកញាប់នោះកន្លងមកលោកក៍ធ្លាប់ទៅមើលផ្ទាល់ក្រុមបាល់ទាត់Chelsea របស់ក្របខណ្ឌPremier League ផងដែរ។
គេជឿរថាតំណើរកម្សាន្ដជិត៣ខែរវាងខេម និងសង្សារនឹងធ្វើឲ្យចំណងស្នេហារបស់ពួកគេកាន់តែមានភាពរឹងមាំជាមិនខាន ខណៈដែលមុននេះមហាជនសង្ស័យថាខេម មានកូន២ទៅហើយបើទោះជាលោកនិងគូស្នេហ៍មិនទាន់រៀបការក្ដី៕