ភ្នំពេញ៖មាស សុខសោភា បានមើលរំលងផលិតកម្មហង្សមាស និងGalaxyដើម្បីទៅចូលរួមជាមួយផលិតកម្មថ្មីរាម ធ្វើឲ្យនាងបាត់ឱកាសក្នុងការច្រៀងដៃគូជាមួយកំពូលតារាចម្រៀងព្រាប សុវត្ថិ និងខេមរៈ សិរីមន្ដ តែនាងបានចាប់ដៃជាមួយតារាចម្រៀងវ័យក្មេងដែលមានសម្ថភាពម្នាក់ក្នុងវិស្ស័យចម្រៀងនោះគឺលោកដួង វីរៈសិទ្ធ ។យ៉ាងណាការជ្រកនៅរាម ជិត៧ខែនេះមាស សុខសោភា ទោះជាមិនទាន់មានបទណាផ្ទុះខ្លាំងដូចមុនមែនតែនាងបង្ហាញពីភាពរីករាយក្នុងការឈជើងនៅផលិតកម្មជើងថ្មីនេះក្នុងឋានៈជាតួឯកស្រីប្រចាំផលិតកម្មដែលគ្មានតារារួមទ្រនុំប្រជែងឡើយ។
អ្នកជំនាញសិល្បៈបានលើកឡើងថាការទៅដល់រាម ត្រឹមរយៈពេលខ្លីនេះសុខសោភា កំពុងតែជួយថៅកែរបស់ខ្លួនដល់២យ៉ាងហើយគេជឿរថាម្ចាស់ផលិតកម្មនេះនឹងចងជើងសុខសោភា តាមរយៈការបន្ថែមកុងត្រាថ្មីថែមទៀតជាមិនខាន។ការដែលសុខ សោភា ធ្វើឲ្យថៅកែរបស់ខ្លួនរីករាយដល់ទៅ២ក្នុងពេលតែមួយនោះគឺទី១៖វត្តមានរបស់សុខសោភា នៅរាម ធ្វើឲ្យបណ្ដារ អ្នក រកស៊ីOnlineផ្សេងៗទៀតពិបាកទប់ទល់ជាមួយនាងនៅពេលដែលសោភា ចេញមុខលក់ផលិតផលជាមួយថៅកែ ទើបរយៈ ពេលចុងក្រោយនេះគេឃើញអ្នករកស៊ីធំៗបានងាកទៅចុះMOU ជាមួយតារាល្បីៗជាបន្ដបន្ទាប់ដើម្បីទប់ទល់ថៅកែរាម ដែល មានសោភា នៅក្បែរនោះ។ចំណុចទី២៖សុខសោភា បានជួយថៅកែរបស់ខ្លួនឲ្យកាន់តែល្បីថែមទៀតតាមរយៈការអូសដៃម្ចាស់ ផលិតកម្មថតMVជាមួយគ្នាតែម្ដងដែលនេះជារឿងកម្រមួយដោយសារថៅកែនិងតារាចម្រៀងថតសម្ដែងជាមួយគ្នាព្រោះចង់ ល្បីជាមួយគ្នាដែលមើលទៅទំនាក់ទំនងសោភា និងថៅកែស្រីស្និតស្នាលគ្នាដូចបងប្អូនទៅហើយ។
តាមរយៈការប្រឹងលើកថៅកែទាំងមុខជំនួញនិងកេរ្ដិ៍ឈ្មោះបែបនេះមាស សុខសោភា ត្រូវបានម្ចាស់ផលិតកម្មមួយនេះបើកសិទ្ធិឲ្យនាងពេញលេញតែម្ដងដូចជាការច្រៀងសម្ដែងរបស់នាងតាមបណ្ដារឆាកតន្រ្ដីទាំងឡាយមិនត្រូវបានកាត់ភាគរយ ហើយសោភា ថែមទាំងអាចច្រៀងឬថតMVនៅផលិតកម្មផ្ទាល់ខ្លួនCamtrax ដែលមានស្វាមីនាងលោកអ៊ឹត រ៉ាដា និងបងប្រុសនាងលោកមាស សុខរតនៈ កំពុងតែគ្រប់គ្រងនោះតាមចិត្តចង់ទៀតផង។ប៉ុន្ដែគេកត់សម្គាល់ថារយៈពេលជាង១ឆ្នាំមកនេះសុខសោភា បានផ្អឹមផលិតកម្មខ្លួនឯងមិនមានបទល្បីៗចេញដូចអំឡុងពេលដែលនាងច្រៀងនៅថោន ឡើយ។សុខសោភា ធ្លាប់ប្រាប់ថាតាំងពីចាប់អាជីពចម្រៀងរយៈពេលជាង១០ឆ្នាំមកនេះនាងធ្លាប់ច្រៀងកុងត្រាតែ២ដងគត់គឺទី១ជាមួយផលិតកម្មសាន់ដេរយៈពេល១ឆ្នាំនិងទី២ជាមួយរាម រយៈពេល១ឆ្នាំដូចគ្នា។នាងថាមិនចង់ច្រៀងនៅផលិតកម្មណាដែលមានកុងត្រានោះទេ ព្រោះនាងជាមនុស្សចូលចិត្តសេរីភាព ប៉ុន្ដែពេលខ្លះនាងក៍អាចធ្វើទៅតាមពេលវេលាផងដែរដូចជាករណីនាងចូលរាម នេះគឺទៅច្រៀងផងរកស៊ីផង។
មជ្ឈដ្ឋានមហាជនបានមើលឃើញថាទោះជាពេលនេះមាស សុខសោភា មិនសូវល្បីដូចមុនព្រោះអត់បទចម្រៀងផ្ទុះក្ដី តែនាងហាក់មានទឹកមុខស្រស់ថ្លានិងរីករាយជាងមុននោះគឺដោយសារតែនាងបានសម្រេចនូវបំណងធំដោយបើកមុខជំនួញដល់ទៅ២ព្រមគ្នាឲ្យចេញជារូបរាងបាននៅរដូវកូវីដនេះគឺហាងរក្សារសម្រស់ នៅក្រុងតាខ្មៅ និងហាងកាហ្វេនៅក្រុងព្រះសីហនុ ដែលប្រើទុនអស់ជាច្រើនម៉ឺនដុល្លារ។ការមានមុខជំនួញផ្ទាល់ខ្លួននេះបញ្ជាក់ថាសុខសោភា មិនពឹងលើអាជីពចម្រៀងទាំងស្រុងដូចមុនទៀតទេ ហើយនាងនិងគូស្នេហ៍បន្ដរស់នៅក្នុងស្រុកជាច្រើនឆ្នាំទៀតមិនមានផែនការណ៍ទៅរស់នៅប្រទេសកាណាដាដូចកាលពីឆ្នាំ២០១១ឡើយ។ដោយឡែកសម្រាប់គម្រោងរៀបការនៅឆ្នាំ២០២១ដែលសុខសោភា ថានឹងធ្វើឲ្យមានការភ្ញាក់ផ្អើលនោះត្រូវបានពន្យាពេលគ្មានថ្ងៃកំណត់សារជាថ្មីឡើយព្រោះតែកូវីដមិនទាន់ស្ងាត់ទើបធ្វើឲ្យសោភា ខកខានគ្រងឈុតកូនក្រមុំជាលើកទី២ បន្ទាប់ពីនាងបានលុបចោលមង្គលការយ៉ាងទាន់ហន់កាលពីឆ្នាំ២០០៩។ទោះជាយ៉ាងណាចំណងស្នេហាសុខសោភា និងលោកគ្រូពេទ្យអ៊ឹត រ៉ាដា នៅតែរឹងមាំក្រោយអ្នកទាំង២ចាប់ដៃគ្នាជាង១៤ឆ្នាំបើទោះជាគ្មានកូន១គ្រាប់ក្ដី៕
ហ៊ឹម វិចិត្រ