ភ្នំពេញ៖តារាចម្រៀងរូបស្រស់របស់ផលិតកម្មសាន់ដេចេង ស្រីនិច្ច ហៅវីរៈ និច្ច ដែលត្រូវជាក្មួយស្រីរបស់លោកខាន់ ជេមស៍ នោះបានលាភាពក្រមុំត្រឹមវ័យ២៣ឆ្នាំតាមរយៈការដឹកដៃលោកខៀវ ពេជ្រ វ័យ២៨ឆ្នាំរៀបការនៅភោជនីយដ្ឋានមីងផាលេស នៅថ្ងៃទី១៦ខែតុលាឆ្នាំ២០២១នេះ។មង្គលការរបស់ម្ចាស់បទ”សម័យនេះស្រលាញ់ស្មោះម៉េចស្ទាវ?”រូបនេះធ្វើតែ១០តុឬមានភ្ញៀវកំណត់ឲ្យចូលរួមតែ១០តុប៉ុណ្ណោះដើម្បីបង្ការការជួបជុំទ្រង់ទ្រាយធំពិបាកទប់ស្កាត់កូវីដដែលស្រីនិច្ច ប្រាប់ថាភ្ញៀវទាំងនោះគឺមានតែមិត្តភក្ដិដ៍ជិតដិតបំផុត និងក្រុមគ្រួសារទាំងសងខាងហើយចំពោះអ្នកសិល្បៈរួមអាជីពវិញភាគច្រើនគឺមានតែតារារួមដំបូលសាន់ដេ។តែស្រីនិច្ច ថាមង្គលការមិនអាចព្យាពេលតទៅទៀតបាននោះទេព្រោះលោកតាអាចារ្យដេញពាលាទៅល្អនៅថ្ងៃនេះ ហើយដោយសារតែកូនប្រុសអាយុច្រើនដែរ និងម្យាងទៀតចាស់ទុំទាំងសងខាងចង់ឲ្យការពេលនេះទើបមិនអាចចាំដល់ពេលស្ងាត់កូវីដនោះឡើយ។
ការសម្រេចចិត្តការប្ដីរបស់វីរៈ និច្ច ទាំងនៅមិនទាន់ស្ងាត់កូវីដនេះធ្វើឲ្យនាងត្រូវបានបញ្ចប់ទាំងស្រុងរឿងដែលគេសង្ស័យថាមានទំនាក់ទំនងស្នេហាជាមួយលោកសុខ មេសា ហៅនាយចឺម ព្រោះពេលនេះការពិតបានបញ្ជាក់ច្បាស់ថាស្វាមីស្របច្បាប់របស់នាងគឺជាលោកខៀវ ពេជ្រ ថៅកែផ្ទះសំណាក់អង្គរពេជ្រ នៅខេត្តព្រះសីហនុ ដែលពួកគេបានភ្ជាប់ពាក្យជាមួយគ្នាតាំងពីថ្ងៃទី៤ខែសីហាឆ្នាំ២០២១ម្លេះ។តាមព័តមានថាវីរៈ និច្ច នឹងត្រៀមយកកូនភ្លាមៗតែម្ដងក្រោយមានប្ដីនេះព្រោះឪពុកម្ដាយទាំងសងខាងចង់បានចៅព។ដោយឡែកទាង់ទងអាជីពចម្រៀងវិញវីរៈ និច្ច ថានាងនៅតែបន្ដច្រៀងឲ្យសាន់ដេដដែលព្រោះប្ដីនាងមិនហាមឃាត់ការងារសិល្បៈដែលនាងស្រលាញ់តាំងពីតូចមកនេះទេ។ប៉ុន្ដែនាងថាត្រូវបន្ថែមអាជីពថ្មីមួយទៀតនោះគឺការធ្វើជំនួញឲ្យដើរទន្ទឹមនិងការងារសិល្បៈតែម្ដង។
គូរបញ្ជាក់ថាវីរៈ និច្ច ជាអតីតFreshie លេខ២កាលពីឆ្នាំ២០១៤ ហើយនាងបានក្លាយទៅជាតារាចម្រៀងសាន់ដេ ក្រោមការជួយជ្រោមជ្រែងពីពូរបស់នាងលោកខាន់ ជេមស៍ ។គេជឿរថាក្រោយវីរៈ និច្ច ការប្ដីចោលនេះនាយចឺម ច្បាស់ជាលៃលករកតាអាចារ្យឲ្យដេញពាលាដើម្បីដឹកដៃអូនហ្វា ហ្វា រៀបការឆាប់ៗខាងមុខដែរជាមិនខានឡើយ។ដោយឡែកវីរៈ និច្ច ដែលក្លាយទៅជាភរិយាលោកខៀវ ពេជ្រ នោះនាងក៍ឡើងថានៈជាថៅកែស្រីផ្ទះសំណាក់អង្គរពេជ្រ នៅក្រុងព្រះកំពង់សោម ទៅហើយ៕
