ភ្នំពេញ៖ពេជ្រ សោភា បានចេញច្រៀងសម្ដែងតាមគម្រោងក្នុងកម្មវិធីមួយកាលពីរាត្រីថ្ងៃទី១១ខែមករា បើទោះជានាងមិនទាន់មានសុខភាពល្អប្រកតីដូចដើមវិញក្ដី។ការកាន់ក្បាលមីក្រូឡើងឆាកនេះបន្ទាប់ពីសុខសោភា បានចូលមន្ទីពេទ្យរ៉ូយ៉ាល់ជាបន្ទាន់កាលពីថ្ងៃទី១០ខែមករា ព្រោះស្ថានភាពសុខភាពរបស់នាងមិនសូវអំណោយផល។ប៉ុន្ដែសម្រាប់ការច្រៀងសម្ដែងរបស់សោភា ទាំងឈឺនោះនៅតែតំណើរការដោយរលូនដដែលដោយគ្មានបញ្ហាសុខភាពធ្វើទុក្ខនោះទេ ហើយនាងថែមទាំងច្រៀងបទញាក់ដោយមានក្រុមរាំអមដូចសុខភាពនាងគ្មានជំងឺទៀតផង។
ពេជ្រ សោភា បានឆ្លើយតបយ៉ាងខ្លីនៅពេលដែលអ្នកយកព័តមានយើងសួរតាមឆាតហ្វេសបុកថាតើនាងមានជំងឺអីបានជាទៅពេទ្យបន្ទាន់នោះដោយនាងអះអាងថាជំងឺពីមុនចង់ធ្វើទុក្ខ ព្រោះម៉ារយៈនេះដោយសារតែបញ្ហាកូវីដទើបនាងមិនបានចេញទៅពិនិត្យសុខភាពនៅពេទ្យថៃទៀងទាត់ដូចមុន។យ៉ាងណានាងមិនបញ្ជាក់ថាតើពេលនេះជំងឺចាស់ធ្វើទុក្ខសុខភាពនាងដល់កម្រិតណានោះទេ តែគេជឿរថាបើសិនជានាងធ្ងន់ធ្ងប្រាកដជាមិនអាចឡើងច្រៀងសម្ដែងដោយលេងក្បាច់រាំនោះបានទេ។
សូមរំលឹកថាកាលពីឆ្នាំ២០១៧ពេជ្រ សោភា បានកើតជំងឺឈាមសស៊ីឈាមក្រហមធ្វើឲ្យនាងចាំបាច់ត្រូវតែចេញទៅពិនិត្យនិងព្យាបាលនៅពេទ្យថៃតាមពេលកំណត់ តែក្រោយមកអាការៈជំងឺរបស់នាងបានធូស្បើយស្ទើតែដូចដើមទើបនាងចេញច្រៀងសម្ដែងជាធម្មតារយៈពេលប៉ុន្មានឆ្នាំចុងក្រោយនេះដោយមិនមានជំងឺតាមយាយីឬរំខានឡើយ។ប៉ុន្ដែតាមព័តមានថាសោភា តម្រូវលេបថ្នាំព្យាបាលជំងឺមួយនេះអស់១ជីវិតគឺដូចអ្នកនាងកែវ ស្រីនាង ដែរ។
គេកត់សម្គាល់ថាមុនពេលពេជ្រ សោភា ត្រូវជំងឺចាស់ចង់រើឡើងវិញនេះនៅថ្ងៃឆ្លងឆ្នាំសកល(Countdown)តារាចម្រៀងរូបនេះបានបណ្ដើរសង្សារថ្មីជាបុរសរូបសង្ហារខ្ពស់ស្រឡះទៅសាសងស្នេហ៍នៅប្រាសាទអង្គរវត្តយ៉ាងរ៉ូមែនទិក។តែសោភា ព្យាយាមលាក់មុខនិងអត្តសញ្ញាណគូស្នេហ៍ដោយគ្រាន់តែវាចារថាម្ចាស់ចិត្តថ្មីរបស់នាងគឺជាព្រះយេស៊ូគ្រឹស្ដប្រទានឲ្យបានជួបគ្នា។ដោយឡែកលោកឆឹម សក្កដា ដែលធ្លាប់តែបង្ហាញភាពស្អិតល្មូតជាមួយសោភា ជាង៤ឆ្នាំទៅហើយនោះបានត្រឹមតែយកដៃគងថ្ងាសនិងដកដង្ហើមធំប៉ុណ្ណោះព្រោះចាប់ពីពេលនេះតទៅលោកអស់ឱកាសបានស្អិតល្មូតជាមួយសោភា ទៀតហើយ៕
