កងទ័ពជើងទឹកសហរដ្ឋអាមេរិកកំពុងព្យាយាមទាញយកយន្តហោះចម្បាំងបំបាំងកាយទំនើបបំផុតរបស់ខ្លួនពីសមុទ្រចិនខាងត្បូងដែលជាប្រតិបត្តិការដ៏ស្មុគស្មាញបំផុត ខណៈអ្នកវិភាគនិយាយថាវានឹងត្រូវបានត្រួតពិនិត្យយ៉ាងដិតដល់ដោយទីក្រុងប៉េកាំង។លោកអនុសេនីយ៍ឯក Nicholas Lingo អ្នកនាំពាក្យកងនាវាទី៧របស់សហរដ្ឋអាមេរិក បាននិយាយថា ការស្វះស្វែងស្រង់យន្តហោះរបស់អាមេរិកដោយសារតែមានការបារម្ភថាយន្តហោះនេះអាចធ្លាក់ចូលទៅក្នុងដៃរបស់ប្រទេសចិនដែលទាមទារភាគច្រើននៃសមុទ្រចិនខាងត្បូង។លោក Lingoបានបន្តថាយើងមិនអាចសន្មត់ថាអ្វីដែលសារធារណៈរដ្ឋប្រជាមានិតចិនមានបំណងលើបញ្ហានេះទេ។នាវាកងទ័ពជើងទឹកនិងឆ្មាំសមុទ្ររបស់ចិន រក្សាវត្តមានជាប្រចាំនៅក្នុងដែនទឹកសមុទ្រចិនខាងត្បូង។អ្នកវិភាគបាននិយាយថាប្រទេសចិនអាចនឹងសម្លឹងរកយន្តហោះ F-35 ដែលបានបាត់បង់។
លោក Carl Schuster អតីតនាយកប្រតិបត្តិការនៅមជ្ឈមណ្ឌលស៊ើបការណ៍សម្ងាត់រួមរបស់បញ្ជាការអាមេរិកប៉ាស៊ីហ្វិកនៅរដ្ឋហាវ៉ៃបាននិយាយថា ប្រទេសចិននឹងព្យាយាមកំណត់ទីតាំង និងស្ទាបស្ទង់វាឱ្យបានហ្មត់ចត់ដោយប្រើនាវាមុជទឹកជ្រៅមួយរបស់ខ្លួន”។ លោកបានបន្តទៀតថា ចិនអាចទាមទារសិទ្ធិសង្គ្រោះដោយផ្អែកលើការទាមទារទឹកដីរបស់ខ្លួននៅសមុទ្រចិនខាងត្បូង។
គួររំឭកថា យន្តហោះចម្បាំងបំបាំងកាយ F-35Cនិងជាយន្តហោះថ្មីបំផុតនៅក្នុងកងនាវាកងទ័ពជើងទឹកសហរដ្ឋអាមេរិកបានធ្លាក់នៅលើនាវាផ្ទុកយន្តហោះ USS Carl Vinsonក្នុងអំឡុងពេលប្រតិបត្តិការជាប្រចាំកាលពីថ្ងៃចន្ទ។មន្ត្រីកងទ័ពជើងទឹកបាននិយាយថា យន្តហោះចម្បាំងតម្លៃ 100 លានដុល្លារបានចុះចតខុសបច្ចេកទេសនៅលើនាវាផ្ទុកយន្តហោះទម្ងន់ 100000 តោន ហើយបន្ទាប់មកបានធ្លាក់ចូលទៅក្នុងសមុទ្រ ខណៈដែលអ្នកបើកយន្តហោះបានចុចកៅអីឆ័ត្រយោងលោតចេញរីឯនាវិក៦នាក់នៅលើនាវា Vinson បានរងរបួស៕