ភ្នំពេញ៖ឱក សុគន្ធកញ្ញា ដែលក្លាយទៅជាភរិយាលោកអ៊ឹង សុខលី អ្នកគ្រប់គ្រងទូរទស្សន៍ហង្សមាស និងជាប្អូនថ្លៃថៅកែហង្សមាសជាង២ឆ្នាំទៅហើយនោះនាងនៅតែត្រូវបានស្វាមីនាងអនុញ្ញាត្តិឲ្យចេញច្រៀងសម្ដែងតាមបណ្ដារកម្មវិធីមង្គលការធំៗដូចមុនដដែលបើទោះជាកន្លងមកអ្នកដឹកនាំកម្មវិធីប្រគុំតន្រ្ដីនៅស្ថានីយ៍ទូទស្សន៍មួយចំនួនថាពិបាកទាក់ទងនិងខ្លះថានាងត្រូវប្ដីទុកឲ្យច្រៀងតែប៉ុស្ដិ៍ហង្សមាសមួយគត់ក្ដី តែថ្មីៗនេះគេឃើញតារាកូន១ចេញច្រៀងកម្មវិធីដែលរៀបចំឡើងដោយលោកអាឡិច ចាន់ត្រា គឺមានន័យថាសុគន្ធកញ្ញា ចេញរកលុយជាធម្មតា។អ្វីដែលគូរឲ្យកត់សម្គាល់សុគន្ធកញ្ញា ថែមទាំងបានចេញមុខចូលរួមកម្មវិធីរបស់ថៅកែរាម តាមរយៈការផ្សព្វផ្សាយផលិតផលទៀតគឺបញ្ជាក់ឲ្យឃើញថាសម្រាប់ការងារសិល្បៈទាំងឡាយសុគន្ធកញ្ញា នៅតែបន្ដដូចដើមថ្វីត្បិតតែនាងជាតារាដ៍មានអំណាចម្នាក់នៅហង្សមាសដែលទោះជាមិនចាំបាច់ចេញរកលុយពីខាងក្រៅក៍ការងារសិល្បៈដែលដឹកនាំដោយស្វាមីនាងជាច្រើនកំពុងរងចាំនាងក្ដី។
ថ្វីត្បិតតែឱក សុគន្ធកញ្ញា នៅតែមានតម្លៃខ្លួនថ្លៃហើយនាងត្រូវប៉ាន់ការងារសិល្បៈទាំងនៅហង្សមាស,ស្ពតធំៗនិងច្រៀងតាមកម្មវិធីមង្គលការវិញក៍ដោយ ប៉ុន្ដែតាំងពីនាងមានស្វាមីនិងកូន១មកគេសង្កេតឃើញថាពេលនេះសុគន្ធកញ្ញា ហាក់នៅទ្រឹងឬមិនសូវមានសន្ទុះខ្លាំងក្លាដូចមុននោះទេ។អ្នកនិយមស្ដាប់បទចម្រៀងរបស់សុគន្ធកញ្ញា មួយចំនួនបានលើកឡើងថានាងលែងឡើងទៀតហើយព្រោះតែមុនរៀបការភរិយាលោកសុខលី រូបនេះធ្លាប់ក្ដាប់តំណែងជាតារាស្រីឈានមុខគេនៅហង្សមាសដល់ទៅ១០ឆ្នាំឯណ្ណោះ តែបច្ចុប្បន្ននាងមិនសូវមានទីផ្សារចម្រៀងកក្រើកដូចមុនទេ ព្រោះបច្ចុប្បន្នតារាយុវវ័យដែលត្រូវបានគេចាប់អារម្មណ៍ថាកំពុងតែមានសន្ទុះឡើងនោះគឺនាងតន់ ច័ន្ទសីម៉ា របស់Galaxy ឯណ្ណោះទេ។
អ្នកជំនាញធ្វើភ្លេង(Composer)ម្នាក់នៅហង្សមាសបានប្រាប់”នគរធំ”កាលពីរសៀលថ្ងៃទី១៣មករា ថាយើងមិនអាចយកឱក សុគន្ធកញ្ញា ទៅប្រៀបធៀបជាមួយតន់ ច័ន្ទសីម៉ា បានទេព្រោះទាំងបទពិសោធន៍និងស្នាដៃក្នុងសិល្បៈគឺមិនដូចគ្នា។លោកបន្ថែមថាសុគន្ធកញ្ញា ជាតារាដែលគេទទួលស្គាល់ព្រោះបានសាងស្នាដៃជាច្រើនមកហើយតាមរយៈការសន្សំកេរ្ដិ៍ឈ្មោះក្នុងសិល្បៈរាប់ឆ្នាំដែលមានចម្រៀងជាច្រើនបទ។ដោយឡែកសីម៉ា ទើបតែល្បីដែលអាចនិយាយបានថាមិនទាន់ទូលំទូលាយដូចសុគន្ធកញ្ញា នោះទេ។លោកថាបើចូលផ្សារ១គេស្គាល់សុគន្ធកញ្ញា ស្ទើតែគ្រប់គ្នា តែបើសីម៉ា មិនទាន់ឈានដល់ចំណុចនេះទេព្រោះមានខ្លះស្គាល់ ខ្លះអត់ស្គាល់។ យ៉ាងណាលោកសង្កត់ថាទោះជាពេលនេះសុគន្ធកញ្ញា មានស្វាមីនិងកូន១ទៅហើយក្ដី តែការឡើងទៅមុខទៀត ឬមិនឡើងនោះគឺអាស្រ័យនៅលើហង្សមាសនេះឯងជាអ្នកកំណត់។
ការអះអាងរបស់លោកគ្រូភ្លេងនេះគឺហាក់ស្របគ្នាទៅនិងអ្នកជំនាញសិល្បៈលោកមិញ សុធីវណ្ណ ធ្លាប់ប្រាប់អ្នកយកព័តមានយើងដែរថាហង្សមាសបានធ្វើព្យុះភ្លៀងជាច្រើនលើកច្រើនសារមកហើយ ហេតុនេះគេចង់លើកតារាណាឲ្យល្បីក៍បានដែរ។លោកថាសុគន្ធកញ្ញា ក្រោយមានកូនគេឲ្យសម្រាកមួយរយៈសិន តែដាច់ខាតហង្សមាសនឹងមិនបណ្ដោយឲ្យនាងធ្លាក់ចុះទេនោះទេ ហើយចំពោះតារាល្បីមិនមែនមានប្ដីនិងកូនហើយគេលែងគាំទ្រនោះទេ គឺនៅតែល្បីដដែលហ្នឹងព្រោះធម្មជាតិបង្កើតមនុស្សមកត្រូវតែមានជីវិតគូមិនអាចរស់នៅម្នាក់ឯងជារៀងរហូតបានឡើយ។
ក្រោយកូនប្រុសមានវ័យជាង២ឆ្នាំនេះឱក សុគន្ធកញ្ញា បានព្យាយាមសម្រកទម្ងន់ឡើងវិញដើម្បីវាយលុកទីផ្សារចម្រៀងនិងមានព័តមានថានាងគ្រោងចាប់ដៃគូជាមួយលោកខេម ប៊ុនថៃ ថតភាពយន្ដរឿងថ្មីផងដែរ។ប៉ុន្ដែសុគន្ធកញ្ញា មិនទាន់មានរាងស្វែលនោះទេគឺនៅតែកាម៉ាប់ៗបន្ដិចរហូតអ្នកខ្លះមានការលើកឡើងថាក្រោយមានប្ដីនាងហាក់បែកសាច់ជាងមុនទើបមើលទៅឃើញដូចធាត់ជ្រុល។
ក្រៅពីឱក សុគន្ធកញ្ញា តារាចម្រៀងដែលមានកូន១ហើយទីផ្សារចម្រៀងមិនសូវមានសន្ទុះមានដូចជាសួស វីសា និងពេជ្រ សូលីកា ជាដើម ខណៈដែលមាស សុខសោភា កំពុងតែធ្វើឲ្យអ្នកគាំទ្រឈឺក្បាលខ្លាំងព្រោះទើបធ្លាយរឿងរៀបការលួចលាក់១២ឆ្នាំសោះតែមានដំណឹងថានាងមានកូនប្រុសវ័យ១៤ឆ្នាំទៅហើយ។ដោយឡែកសុគន្ធកញ្ញា វិញពេលនេះនាងមានក្ដីសុខបំផុត ព្រោះបន្ទាប់ពីមានកូន១ស្វាមីកាន់តែស្រលាញ់ទើបតាមព័តមានថាតារាវ័យ៣៥ឆ្នាំនេះចង់បានកូន២នាក់ថែមទៀត៕