មាស សុខសោភា ជិតក្លាយទៅជាសមាជិកថ្មីរបស់ផលិតកម្មរស្មីហង្សមាស ទៅហើយ នេះបើតាមការអះអាងរបស់តារាចម្រៀងដែលជិតដិតបំផុតជាមួយសោភា បានឱ្យដឹងកាលពីពេលថ្មីៗនេះ។
ប្រភពនោះបានឱ្យដឹងថា ការចរចាគ្នារវាងមាស សុខសោភា និងថ្នាក់ដឹកនាំផលិតកម្មរស្មីហង្សមាស ស្ទើរតែត្រូវរ៉ូវគ្នាអស់ហើយៗ អ្វីដែលកាន់តែធ្វើឱ្យសោភា លែងមានការរារែកចិត្តក្នុងការទៅចូលរួមជាមួយហង្សមាស នោះ គឺនាងត្រូវបានតារាចម្រៀងឱក សុគន្ធកញ្ញា ដែលជាមិត្តជិតដិត និងធ្លាប់ច្រៀងជាមួយគ្នានៅផលិតកម្មរស្មីស្ទឹងសង្កែ និង U2 នោះ ជំរុញឱ្យសោភា ចូលហង្សមាស ដោយនាងស្វាគមន៍ដោយរីករាយ និងគ្មានការប្រកួតប្រជែងគ្នាឡើយ។
ឱក សុគន្ធកញ្ញា បានថ្លែងសារដ៏កម្រមួយអបអរសាទរមាស សុខសោភា គម្រប់ខួប៣៦ឆ្នាំ កាលពីពេលថ្មីៗនេះ ហាក់ដូចជាពួកគេរស់នៅទ្រនំតែមួយអ៊ីចឹង តាមរយៈការលើកសរសើរសុខសោភា ថាជា “រាជិនីសំឡេងផ្អែម” ទៀតផង។
ក្នុងជំនួបជាមួយមាស សុខសោភា កាលពីពេលថ្មីៗនេះ តារាចម្រៀងផលិតកម្មថោន រូបនេះ បានទទួលស្គាល់ថា ពិតជាមានការចរចាគ្នាមែន ហើយនាងក៏ត្រូវបានមិត្តភក្តិនៅហង្សមាស ជំរុញឱ្យចូលហង្សមាស ដែរ។
សោភា បានឱ្យដឹងថា “រឿងចូលហង្សមាស ហ្នឹង ខ្ញុំត្រូវការពិចារណាឱ្យបានច្បាស់លាស់ជាមុនសិន ហើយបើហង្សមាស គាត់ចង់បានខ្ញុំ គាត់គួរតែយល់ព្រមជាមួយលក្ខខណ្ឌរបស់ខ្ញុំដែរ។ មានមិត្តភក្តិខ្ញុំ ច្រៀងនៅហង្សមាស គាត់ចេះតែជំរុញឱ្យខ្ញុំទៅចូលហង្សមាស ដែរ អ៊ីចឹងទាល់តែមានការត្រូវរ៉ូវគ្នាទាំងសងខាង ទើបអាចបានទៅរួច។ កន្លងមក ខ្ញុំធ្លាប់មានគោលការណ៍ផ្ទាល់ខ្លួន គឺខ្ញុំចង់នៅកន្លែងណាដែលមានសិទ្ធិសេរីភាព អ៊ីចឹងពេលនេះ ខ្ញុំនៅតែរក្សាគោលការណ៍នេះដដែល”។
មាស សុខសោភា ជាតារាចម្រៀងរបស់ថោន ដែលច្រៀងដោយគ្មានការកុងត្រា ឡើយ ហេតុនេះហើយ បើនាងចង់ចេញពីថោន ទៅចូលហង្សមាស គឺបានតាមចិត្តចង់ ខណៈដែលនាងក៏មានផលិតកម្មផ្ទាល់ខ្លួន កំពុងតែដំណើរការ គឺ Camtrax។
អ្នកជំនាញសិល្បៈបានលើកឡើងថា គេមិនអាចនិយាយ មុនបានទេថា តើមាស សុខសោភា នឹងនៅតែល្បីល្បាញពេលទៅ ដល់ហង្សមាស ឬក៏ចុះខ្សោយនោះទេ ប៉ុន្តែគេជឿថា លក្ខខណ្ឌដែលសោភា ចង់បានពីហង្សមាស នោះ ប្រាកដជាការច្រៀងដោយគ្មានកុងត្រា ឬនាងអាចនាំយកបងប្រុសរបស់នាង លោកមាស សុខរតនៈ ទៅធ្វើបទចម្រៀងឱ្យជាមិនខាន។ ប៉ុន្តែគេជឿថា លក្ខខណ្ឌណា ក៏ហង្សមាស ព្រមទទួលយកសំណើរបស់សោភា ដែរ ប៉ុន្តែ ការច្រៀងដោយគ្មានការកុងត្រានោះ ច្បាស់ជាហង្សមាស នឹងមិនយល់ព្រមឡើយ។
លោកម៉ិញ សុធីវណ្ណ បានឱ្យដឹងថា ពិបាកនិយាយក្នុងការថា មាស សុខសោភា ទៅហង្សមាស មែនឬអត់នោះ? ព្រោះថា នៅលើការសម្រេចចិត្តរបស់ខ្លួនគាត់ផ្ទាល់។ ប៉ុន្តែ លោកយល់ថា បើសិនជាសោភា ចូលហង្សមាស នាងនៅតែល្បីឬធ្លាក់ចុះនោះ គឺហង្សមាស ជាអ្នកកំណត់។
មាស សុខសោភា បានទទួលស្គាល់ថា ពេលនេះ ហង្សមាស ពិតជាក្តាប់ Concert ជាច្រើននៅក្នុងកណ្តាប់ដៃមែន ហេតុនេះហើយបានជារូបនាងផ្ទាល់ត្រូវតែពិចារណារឿងចូលហង្សមាស នេះ។
ប៉ុន្តែអ្នកជំនាញសិល្បៈមួយចំនួន បានលើកឡើងថា ប្រសិនបើមាស សុខសោភា ទៅចូលហង្សមាស នោះ តារាល្បីរូបនេះអាចដើរជាន់ដានតារាចម្រៀងខេមរៈ សិរីមន្ត ជាមិនខាន ព្រោះថា សិរីមន្ត ល្បីល្បាញខ្លាំងណាស់ កាលនៅសាន់ដេ រហូតពេលខ្លះ ធ្វើឱ្យព្រាប សុវត្ថិ រង្គើតំណែងម្តងៗទៀតផង។ ប៉ុន្តែពេលសិរីមន្ត ទៅដល់ហង្សមាស និងបានចុះកុងត្រា៥ឆ្នាំ ស្រាប់តែចុះខ្សោយជាងមុន ហើយព្រាប សុវត្ថិ នៅតែឈរលើសិរីមន្ត ដដែល។
ចំណែកសោភា ការទៅហង្សមាស នៅពេលនេះ គឺចំពេលដែលឱក សុគន្ធកញ្ញា ដែលជាគូប្រជែងចម្រៀងរបស់នាងជាច្រើនឆ្នាំ ជិតក្លាយទៅជាប្អូនថ្លៃលោកថៅកែហង្សមាស ឧកញ៉ាអ៊ឹង ឆៃងួន ទៅហើយ ហេតុនេះបានជាមានសំណួរជាច្រើនបានលើកឡើងថា តើហង្សមាស នឹងឱ្យមាស សុខសោភា នៅលើសុគន្ធកញ្ញា ដែលជាប្អូនថ្លៃទេ?
មនុស្សមួយចំនួន បានទាយទុកជាមុនថា មាស សុខសោភា នឹងអាចដូចខេមរៈ សិរីមន្ត នៅពេលក្លាយទៅជាសមាជិករបស់ហង្សមាស។
ទោះជាយ៉ាងណា អ្នកគាំទ្រតារាចម្រៀងមាស សុខសោភា នៅតែជឿជាក់សមត្ថភាពរបស់អ្នកចម្រៀងរូបនេះថា ទៅដល់ណាក៏ល្បីដែរ អ៊ីចឹងហើយបានជាពួកគេហ៊ានសន្និដ្ឋានថា សុខសោភា នឹងមិនឱ្យ សុគន្ធកញ្ញា ដែលជាប្អូនថ្លៃថៅកែហង្សមាស ជាន់នាងពន្លិចបានឡើយ៕