ភ្នំពេញ ៖ អតីតពិធីករនៅស្ថានីយទូរទស្សន៍ CTN គឺលោកឡាយអិន ត្រូវបានតុលាការសាលារាជធានីភ្នំពេញ ប្រកាសសាលក្រមដាក់ពន្ធនាគារ៤ឆ្នាំ និងពិន័យទឹកប្រាក់ប្រាក់៦លានរៀល ពាក់ព័ន្ធករណីជួញដូរថ្នាំញៀន។
នៅរសៀលថ្ងៃទី២០ ខែមករា ឆ្នាំ២០២០ លោកស្រី យិច ឈាណាវី ប្រធានក្រុមប្រឹក្សាជំនុំជម្រះ និងលោកសេង គឹមឡាក់ ជាតំណាងអយ្យការអមសាលាដំបូងរាជធានីភ្នំពេញ បានធ្វើការប្រកាសសាលក្រមលើក្រុមឌីជេឡាយ អិន ដោយផ្តន្ទាទោសជនជាប់ចោទ ១.ឈ្មោះ ហែម បូរិទ្ធ (ឌីជេឡាយអិន) ភេទប្រុស អាយុ៣៣ឆ្នាំ ជាពិធីករទូរទស្សន៍ ស្នាក់នៅផ្ទះលេខ៦៣ ផ្លូវសុធារស សង្កាត់ទន្លេបាសាក់ ខណ្ឌចំការមន និង២. ឈ្មោះម៉ៅ ស្រីណា ភេទស្រី អាយុ៣៨ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុងសង្កាត់បឹងត្របែក ខណ្ឌចំការមន ដាក់ពន្ធនាគារម្នាក់ៗ៤ឆ្នាំ ពិន័យ៦លានរៀល។
ចំណែកជនសង្ស័យទី៣. ឈ្មោះ អ៊ិន សាខន ភេទប្រុស អាយុ៥១ឆ្នាំ ស្នាក់ផ្ទះជួលលេខ៦A ផ្លូវលំ សង្កាត់ស្ទឹងមានជ័យ ខណ្ឌមានជ័យ ដាក់ពន្ធនាគារ១១ឆ្នាំ ពិន័យប្រាក់២០លានរៀល និងទី៤.ឈ្មោះស៊ិន សម្ភស្ស ភេទប្រុស អាយុ៣៣ឆ្នាំ មានអាសយដ្ឋានស្នាក់នៅភូមិ៤ សង្កាត់បឹងស្រឡាង ខណ្ឌទួលគោក រាជធានីភ្នំពេញ ដាក់ពន្ធនាគារ១៥ឆ្នាំ ពិន័យ២០លានរៀល សាលក្រមនេះដែលក៏បានទុកសិទ្ធិឲ្យជនជាប់ចោទប្តឹងឧទ្ធរណ៍តាមកំណត់ច្បាប់។
គួរបញ្ជាក់ថា ជនសង្ស័យទាំង៤នាក់ខាងលើនេះ ត្រូវជាប់ចោទពីបទជួញដូរដោយខុសច្បាប់នូវសារធាតុញៀន និងបទកាប់អាវុធដោយខុសច្បាប់ ដែលប្រព្រឹត្តកាលពីវេលាម៉ោង២និង២០ ចូលថ្ងៃទី១៩ ខែធ្នូ ឆ្នាំ២០១៨ ស្ថិតនៅមជ្ឈមណ្ឌលកម្សាន្តរ៉ុក ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
គួរបញ្ជាក់ថា ការឃាត់ខ្លួនជនសង្ស័យទាំង៤នាក់នេះ សមត្ថកិច្ចបានដកហូតវត្ថុតាងនៅក្នុងបន្ទប់១០៨ មជ្ឍមណ្ឌលកម្សាន្តរ៉ុក រួមមាន សារធាតុញៀនប្រភេទមេតំហ្វេតាមីន (ICE) ទម្ងន់៣៧៤.៣៩ក្រាម, សារធាតុញៀនប្រភេទអិុចស្តាស៊ី ចំនួន១៥៦២គ្រាប់ ស្មើនឹងទម្ងន់៦០៩.៣៣ក្រាម (សរុបជាង១គីឡូក្រាម), អាវុធខ្លី១ដើម (ឡុក) និងជញ្ជីងថ្លឹងគ្រឿងញៀនធំ១គ្រឿង និងតូច២គ្រឿងផងដែរ ៕