ជារឿងគួរឲ្យកោតសរសើរយ៉ាងខ្លាំង ដែលអ្នកនាងអ៊ាន សៀវម៉ី ត្រូវគេដឹងថា ទើបតែត្រូវបានព្រះមហាក្សត្រ ត្រាស់បង្គាប់ផ្ដល់គោរមងារជាឧកញ៉ា ស្រាប់តែបានបរិច្ចាគថវិកាចំនួន៥០០០០ដុល្លារបន្ថែមទៀត ជួយដល់កាកបាទក្រហមសាខាខេត្តកណ្ដាល កាលពីថ្ងៃទី២៦ សីហា ឆ្នាំ២០២០ ដោយគ្រាន់តែក្នុងហេតុផលបរិច្ចាគឲ្យគ្រប់៩ម៉ឺនដុល្លារ ឲ្យត្រូវនឹងថ្ងៃកំណើតរបស់អ្នកនាង នៅថ្ងៃទី៩ ខែ៩ ខាងមុខ។
នៅក្នុងពិធីនោះ អ្នកនាងក៏ត្រូវគេឃើញបរិច្ចាគជួយជួសជុលផ្លូវមួយខ្សែនៅទីនោះ ក្នុងទឹកប្រាក់២០០០ដុល្លារ ជួយដល់ជនពិការម្នាក់ក្នុងទឹកប្រាក់ជាច្រើនរយដុល្លារ និងជួយដល់គ្រួសារអ្នកខ្សត់ខ្សោយជាច្រើនគ្រួសារដែលអ្នកនាងបានជួបនៅក្នុងពិធីនោះ ក្នុងម្នាក់ៗ៥០ដុល្លារផងដែរ។
លោកជំទាវឧកញ៉ា អាន សៀវម៉ី ដែលត្រូវគេដឹងថា គឺជាម្ចាស់ផេក Siv Mey Online Shop បានថ្លែងនៅក្នុងពិធីនោះថា ដោយសារតែនៅថ្ងៃទី៩ ខែកញ្ញា ខាងមុខ គឺជាថ្ងៃខួបកំណើតរបស់លោកជំទាវ និងម្យ៉ាងដើម្បីជាការចែករំលែកក្ដីស្រលាញ់ ក្នុងឱកាសដែលលោកជំទាវត្រូវបានព្រះមហាក្សត្រ ត្រាស់បង្គាប់ជាឧកញ៉ាផង ទើបលោកជំទាវឧកញ៉ា សម្រេចបរិច្ចាគបន្ថែមជួយកាកបាទក្រហមខេត្តកណ្ដាលដើម្បីឲ្យគ្រប់៩ម៉ឺនដុល្លារ និងដើម្បីជួយឲ្យកាកបាទក្រហមកម្ពុជា សាខាខេត្តកណ្ដាល ទទួលបាននូវមូលនិធិ ឲ្យបានច្រើនជាប្រយោជន៍ក្នុងកិច្ចការមនុស្សធម៌ផង។
លោកជំទាវឧកញ៉ាល្បីឈ្មោះក្នុងពិភពអនឡាញរូបនេះ បន្តថា លោកជំទាវកាន់តែសប្បាយចិត្តថែមមួយកម្រិតទៀត នៅពេលក្រោយបរិច្ចាគជូនដល់កាកបាទក្រហម ក៏បានរួមចំណែកជួយកសាងផ្លូវមួយខ្សែប្រវែងជិត៥០០ម៉ែត្រ នៅភូមិកំពង់សំណាញ់១ សង្កាត់កំពង់សំណាញ់ ក្រុងតាខ្មៅ ខេត្តកណ្ដាល ដើម្បីឲ្យសហគមន៍នៅទីនោះ មានផ្លូវស្អាត ធ្វើដំណើរ និងបានបរិច្ចាគជួយដល់ជនពិការមួយរូប និងផ្ដល់ជំនួយដល់គ្រួសារខ្វះខាតមួយចំនួន ដែលមានន័យថា គឺលោកជំទាវបានជួយទាំងស្ថាប័នរដ្ឋ និងគ្រួសារអ្នកខ្វះខាតឯកជន ក្នុងថ្ងៃតែមួយ។
លោកជំទាវឧកញ៉ា បានបញ្ជាក់បន្ថែមថា ហេតុផលដែលលោកជំទាវបរិច្ចាគម្ដងហើយម្ដងទៀត ជួយដល់កាកបាទក្រហមខេត្តកណ្ដាល គឺដោយសារតែលោកជំទាវយល់ថា ទីនោះមានតម្រូវការច្រើនក្នុងការប្រមូលមូលនិធិ និងចង់បំផុសឲ្យសប្បុរសជនចាប់អារម្មណ៍ដល់កង្វះខាតរបស់កាកបាទក្រហមសាខាខេត្តកណ្ដាលផង សម្រាប់គម្រោងផ្ដល់មូលនិធិ។
លោកជំទាវឧកញ៉ា ប្រកាសជំហរថា នឹងនៅតែបន្តធ្វើសកម្មភាពសប្បុរសធម៌បែបនេះ ដោយមិនដកដៃផងដែរ ដោយសារតែនេះ គឺចំណូលចិត្តរបស់លោកជំទាវ តាំងតែពីនៅជាអ្នកលក់អនឡាញយ៉ាងសាមញ្ញ។
នៅក្នុងពិធីនោះ ក៏មានវត្តមានលោកជំទាវ ញ៉ែម មរកត អនុរដ្ឋលេខាធិការក្រសួងកិច្ចការនារី និងសប្បុរសជនមួយចំនួនផ្សេងទៀតចូលរួមផងដែរ៕
