តារាចម្រៀងឆាយ វីរៈយុទ្ធ បានបញ្ចេញបទថ្មីមួយបទទៀតហើយ ដែលមានចំណងជើងថា “ស្រឡាញ់គេជារឿងអូន ស្រឡាញ់អូនជារឿងបង” ដែលបទចម្រៀងកំពុងតែចាក់ដោតបេះដូងយុវវ័យ ពិសេសមួយបទនេះមានការចូលរួមផលិតដោយអ្នកនិពន្ធរួមគ្នា រហូតដល់ទៅ៣នាក់។
តាមការបង្ហាញបទ “ស្រឡាញ់គេជារឿងអូន ស្រឡាញ់អូនជារឿងបង” និពន្ធទំនុកច្រៀង ដោយអ្នកនាងសែ ចាន់ឌី ដែលជាភរិយារបស់លោក, និពន្ធទំនុកច្រៀងដោយ Memories និងនិពន្ធបទភ្លេងដោយ Tho Meet។
អ្វីដែលជាការចាប់អារម្មណ៍នោះ ជាធម្មតាបទចម្រៀង១បទ ធ្វើឡើងត្រឹមតែអ្នកនិពន្ធ២នាក់ ឬម្នាក់ទេ គឺអ្នកនិពន្ធទំនុកច្រៀង និងអ្នកនិពន្ធមេឡូឌីច្រៀង ប៉ុន្តែសម្រាប់បទចម្រៀង១បទនេះ និពន្ធរហូតដល់ទៅ៣នាក់ឯណោះ ទម្រាំផលិតមកសម្រាប់បម្រើអារម្មណ៍ជូនទស្សនិកជនឲ្យកាន់តែទទួលបានរសជាតិថ្មី ប្លែកជាងមុន។
បទ “ស្រឡាញ់គេជារឿងអូន ស្រឡាញ់អូនជារឿងបង” បានបង្កប់អត្ថន័យស្នេហារបស់បុរសម្នាក់ស្រឡាញ់គេតែម្នាក់ម្ខាង ទោះបីឈឺចាប់យ៉ាងណាក៏ទ្រាំឲ្យតែបានក្បែរកាយរបស់គេ ក៏សប្បាយចិត្តដែរ។ ជាមួយនឹងសំនៀងរបស់លោកឆាយ វីរៈយុទ្ធ បង្កប់នៅអត្ថន័យនៃឈឺឆាប់នោះ វាពិតដាស់អារម្មណ៍ប្លែកមួយដល់ប្រិយមិត្តដែលបានស្ដាប់បទចម្រៀងស្នេហាមួយនេះ។
នៅក្នុងមជ្ឈដ្ឋានសិល្បៈចម្រៀង បើនិយាយពីគូស្នេហ៍របស់លោកឆាយ វីរៈយុទ្ធ គេដឹងថា ភរិយារបស់លោកជាអ្នកនិពន្ធមួយរូបផងដែរ ដោយអ្នកនាងធ្លាប់និពន្ធបទចម្រៀងឲ្យតារាចម្រៀងក្នុងផលិតកម្មសាន់ដេររូបនេះ តាំងតែមិនទាន់រៀបការជាមួយគ្នាកាលពីឆ្នាំ២០១៧ ម្លេះ៕
