នៅទីបំផុត វិវាទដ៏ចម្រូងចម្រាសរវាងកញ្ញាសេង រដ្ឋា ម្ចាស់មកុដ “Miss Grand Cambodia 2020” និងគណកម្មការរៀបចំត្រូវបានបញ្ចប់ហើយ។ នេះបើយោងតាមការបង្ហោះជាផ្លូវការមុននេះបន្ដិច។
នៅលើផេក “Miss Grand Cambodia” បានសរសេរបង្ហោះកាលពីរសៀលថ្ងៃទី២៨ ខែមករា ឆ្នាំ២០២១ ថា “បន្ទាប់ពីបានជួបពិភាក្សាគ្នារវាងមេធាវីភាគីខាងក្រុមហ៊ុន និងមេធាវីភាគីខាងកញ្ញាសេង រដ្ឋា ដូចនេះគូភាគីទាំងពីរក៏បានសម្រេចធ្វើទៅតាមកិច្ចព្រមព្រៀងបញ្ចប់វិវាទតាមផ្លូវច្បាប់ ដែលបានកំណត់ដូចខាងក្រោម សូមបណ្តាអ្នកគាំទ្រទាំងអស់មេត្តាពិនិត្យមើលកិច្ចព្រមព្រៀងចុងក្រោយ និងកុងត្រាដែលភាគីខាងក្រុមហ៊ុន បានធ្វើរួមគ្នាជាមួយភាគីខាងកញ្ញាសេង រដ្ឋា”។ ការបញ្ជាក់ក្នុងការបង្ហោះនេះ គឺស្ថិតនៅក្នុងកិច្ចព្រមព្រៀងទាំងស្រុងនៅក្នុងឯកសារ។
ដោយឡែក នៅលើហ្វេសប៊ុករបស់លោកអ៊ិន សុភិន អគ្គនាយក “Miss Grand Cambodia 2020” ក៏បានបង្ហោះថា “ពេលវេលាបានមកដល់ទីបញ្ចប់ រវាងក្រុមហ៊ុន Mohahang និង Miss Grand Cambodia 2020 មានតែផ្លូវច្បាប់ ទេីបអាចដោះស្រាយ។
សូមអរគុណនូវការយកចិត្តតាមដានទាំងអស់គ្នា ពេលនេះការពិតបានលាតត្រដាងហេីយ ខ្ញុំសូមអស់យោបល់ ហេីយសង្ឃឹមថា អ្វីៗនឹងបានល្អប្រសេីរ យេីងជាខ្មែរដូចគ្នា ត្រូវចេះដោះស្រាយដោយសន្តិវិធី ខ្ញុំបាទសូមសុំទោសជាសាធារណៈនូវពាក្យពេចន៍ខុសឆ្គងកន្លងមក ហេីយសូមសន្យាថា កម្មវិធី “Miss Grand Cambodia 2021” នឹងរៀបចំឲ្យបានល្អជាងឆ្នាំ2020 អរគុណគ្រប់យ៉ាងដល់ក្រុមការងារ និងអ្នកគាំទ្រ ដែលបានជួយលេីកទឹកចិត្តខ្ញុំកន្លងមក ស្រលាញ់អ្នកទាំងអស់គ្នាពេញបេះដូង៕
