លោករិន សាវ៉េត ដែលជាមិត្តភក្ដិជិតដិតបំផុតរបស់លោកសាពួន មីដាដា នោះបានប្រាប់តាមទូរស័ព្ទកាលពីរសៀលថ្ងៃទី៤ខែមិថុនាឆ្នាំ២០២១ ទាក់ទងរឿងគេល្បីពេញផ្ទៃប្រទេសថាសឿ សុធារ៉ា-សាពួន មីដាដា ចែកផ្លូវគ្នាដោយសុធារ៉ា បានកូនស្រី ចំណែកមីដាដា បានកូនប្រុសនោះថាជារឿងមិនពិតទៅវិញ។
អតីតតារាចម្រៀងហង្សមាសលោករិន សាវ៉េត ថ្លែងថា”អូ!មីដាដា និងធារ៉ា មានបែកគ្នាអីណា!២នាក់ប្ដីប្រពន្ធហ្នឹងឥឡូវមករស់នៅក្បែរផ្ទះខ្ញុំដែរតើ នៅជិតស្ពានទី៩ ខណ្ឌជ្រោយចង្វារ សង្កាត់ព្រែកលាភហ្នឹង។ប្ដីប្រពន្ធគេរស់នៅជុំគ្នាតើ ។ដូចជាមិនឃើញអីទេ គេនៅជាមួយគ្នារាល់ថ្ងៃហ្នឹង”។
ថ្វីត្បិតតែមានការបញ្ជាក់ពីលោករិន សាវ៉េត ថាសឿ សុធារ៉ា-សាពួន មីដាដា មិនលែងលះគ្នាក្ដី តែទាំងក្នុងនិងក្រៅសិល្បៈមិនទាន់ជឿរតាមការអះអាងរបស់លោកសាវ៉េត ឡើយព្រោះតែគេដឹងថាអតីតតារាចម្រៀងហង្សមាសរូបនេះបានរាប់អានគ្នាខ្លាំងណាស់ជាមួយលោកមីដាដា ហើយតែងតែណាត់គ្នាលេងអុកជាប្រចាំទៀតផងហេតុនេះហើយបើមានរឿងមិនល្អរបស់មីដាដា លោកសាវ៉េត ប្រាកដជាជួយលាក់ជាមិនខាន។
ការសម្អាងបែបនេះព្រោះតែមុនធ្លាយដំណឹងនៃការលែងលះរវាងប្ដីប្រពន្ធតារា១គូនេះទាំងអ្នកនាងសុធារ៉ា និងលោកមីដាដា សុទ្ធតែបង្ហាញសញ្ញានៃការប្រេះឆាស្នេហ៍ដូចគ្នា។អ្នកនាងសុធារ៉ា បានចេញសារកាលពីខែមុននេះថា”ក្នុង១ជីវិតនេះ ខ្ញុំសូមរៀបការតែ២ដង បានទេ បងប្អូនទាំងអស់គ្នា តែបើសិនជារៀបការជាលើកទី២របស់ខ្ញុំ នៅតែទទួលបានភាពបរាជ័យទៀត បេះដូងរបស់ខ្ញុំអាចគ្មានប្រអប់ចំពោះរឿងស្នេហាទៀតឡើយ”។ចំណែកលោកសាពួន មីដាដា វិញធ្លាប់ចេញសារបែបក្ដៅចិត្តថា”តែក្ដៅចត់ពិបាកលេបណាស់មែនទេ? ចុះចិត្តស្រីពិស ហេតុអ្វីក៍នៅតែអាចលេបបានស្រួលម្លេះ?”។ក្រោយមកសុធារ៉ា បន្ថែមសារថា”លាហើយស្នេហា”។
ភស្ដុតាងទាំងនេះបញ្ជាក់ថាចំណងស្នេហាសឿ សុធារ៉ា -សាពួន មីដាដា គ្មានសុវត្ថិភាពទៀតឡើយបន្ទាប់ពីធ្លាប់លេចឭថារង្គោះរង្គើរជាច្រើនលើកច្រើនសារតែនៅឆ្នាំ២០២១ប្ដីប្រពន្ធតារា១គូនេះហាក់ព្រមសារភាពរៀងៗខ្លួនតាមរយៈការបញ្ចេញសារឲ្យគេដឹងថាចំណងស្នេហាមួយនេះឈានដល់ផ្លូវបំបែកទៅហើយ បើទោះជាលោករិន សាវ៉េត ថាពួកគេនៅតែជាប្ដីប្រពន្ធគ្នាក្ដី។អ្នកយកព័តមានយើងក៍ធ្លាប់ទៅសាកសួរអ្នកជិតខាងដែលរស់នៅម្ដុំផ្ទះសុធារ៉ា នៅផ្លូវ១៣៥ សង្កាត់ទួលទំពួង១ ខណ្ឌចំការមនក្រុងភ្នំពេញដែរតែត្រូវបានអាជីវករនៅទីនោះបានបង្ហើបប្រាប់ថាសុធារ៉ា បានលក់ផ្ទះធំដែលសង់ជាច្រើនជាន់នោះជាយូរមកហើយ។ដោយឡែករឿងដែលថាសុធារ៉ា-មីដាដា ចែកផ្លូវគ្នានោះពួកគាត់បាននិយាយថាឭតែគេនិយាយថាប្ដីប្រពន្ធតារាល្បី១គូនេះលែងគ្នាតាំងពីមុនលក់ផ្ទះម្លេះតែគាត់មិនច្បាស់លាស់ទេ។
សឿ សុធារ៉ា បានវិលត្រឡប់មករកអាជីពចាស់វិញអំឡុងពេលផ្ទុះរឿងលែងប្ដីនេះដោយនាងថែមទាំងព្រមធ្វើជាតួម្ដាយទៀតផង បន្ទាប់ពីផ្អាកអាជីពចាស់ជាង១០ឆ្នាំ។ក្រោយផ្អើលថាសុធារ៉ា បានធ្លាក់ខ្លួនមេម៉ាយកូន២នេះធ្វើឲ្យមន្រ្ដីធំៗជាច្រើនបានជ្រួលជ្រើមចង់ស្អំរបួសបេះដូងនាង តែពេលនេះប្រុសសម្បូរទ្រព្យខ្លះប្រាកដជាស្រឡាំងកាំងដោយសារតែលោករិន សាវ៉េត ចេញមុខមកអះអាងថាសុធារ៉ា និងមីដាដា កំពុងតែរស់នៅជាមួយគ្នាយ៉ាងមានសុភមង្គលនេះជាមិនខាន។
សូមរំលឹកថាសឿ សុធារ៉ា បានដឹកដៃសាពួន មីដាដា រៀបការកាលពីថ្ងៃទី៩ខែវិច្ឆិការឆ្នាំ២០០៩ ដែលចំណងស្នេហ៍១១ឆ្នាំនេះពួកគេទទួលបានកូន២នាក់គឺកូនទី១ស្រីឈ្មោះសាពួន តារាពិមាន អាយុជាង១០ឆ្នាំ និងកូនទីប្រុសឈ្មោះសាពួន តារាបុរស អាយុជាង៣ឆ្នាំ។មុនធ្លាយរឿងសុធារ៉ា លែងប្ដីនេះគេឃើញតារាកូន២ជិះរថយន្ដទំនើបLexus Lx570 ព័ណសតម្លៃជាង២០ម៉ឺនដុល្លារនិងពេលខ្លះនាងមានអង្គរក្សបើកជូនទៀតផង៕
