ភ្នំពេញ៖អតីតតារាចម្រៀងហង្សមាសលោកដួង វីរៈសិទ្ធ ដែលបានក្លាយទៅជាអ្នកចម្រៀងរបស់រាម ជាង៥ខែទៅហើយនោះបានអះអាងថាលោកស្រលាញ់ពេញចិត្តតារារៀមច្បងមាស សុខសោភា ជាយូមកហើយ ខណៈដែលពេលនេះបានចាប់ដៃគូជាមួយអ្នកចម្រៀងសំនៀងផ្អែមរូបនេះលោកថាគឺជាការសម្រេចក្ដីស្រម៉ៃដ៍ធំមួយ។ដួង វីរៈសិទ្ធ ថ្លែងថា”ខ្ញុំមានមោទនភាពដែលបានច្រៀងជាមួយរៀមច្បងដ៍មានទេពកោសល្យដូចបងភា ហើយបទចម្រៀងខ្ញុំនិងគាត់បានចេញរួមគ្នាបានខ្លះៗហើយនឹងត្រៀមចេញបទថ្មីៗទៀតនាពេលខាងមុខនេះផងដែរ”។
ដួង វីរៈសិទ្ធ បង្ហាញការចាប់អារម្មណ៍ថាការច្រៀងឆ្លងឆ្លើយជាមួយមាស សុខសោភា នៅរាម និងច្រៀងជាមួយរ៉េត ស៊ូហ្សាណា រួមទាំងឈិន ម៉ានិច្ច នៅហង្សមាសអាចនិយាយថាម្យាងៗម្នាក់ហើយរសជាតិនៃបទចម្រៀងផ្សេងៗគ្នា។ទោះជាយ៉ាងណាវីរៈសិទ្ធ មិនហ៊ានថាតើពេលលោកច្រៀងជាមួយមាស សុខសោភា នឹងទទួលបានការជោគជ័យជាងច្រៀងជាមួយតារាស្រីនៅហង្សមាសនោះទេដោយថាទុកឲ្យមហាជនជាអ្នកវាយតម្លៃទៅចុះ ព្រោះនៅមានបទចម្រៀងជាច្រើនទៀតដែលត្រៀមចេញ។
ឆ្លើយតបសំណួរថាតើគម្លាតអាយុរវាងលោកដួង វីរៈសិទ្ធ និងមាស សុខសោភា អាចជាបញ្ហាក្នុងការចាប់ដៃគ្នាដែរឬអត់នោះវីរៈសិទ្ធ ថានោះជាការរៀបចំរបស់ផលិតកម្មហើយលោកធ្វើការងារទៅតាមថ្នាក់ដឹកនាំ។
ដួង វីរៈសិទ្ធ មានអាយុ២៧ឆ្នាំពោលគឺប្អូនមាស សុខសោភា ដល់ទៅ១៣ឆ្នាំ(៤០ឆ្នាំ)ឯណ្ណោះទើបធ្វើឲ្យមានការលើកឡើងថាលោកច្រៀងភាសារបងអូនជាមួយសោភា និងសម្ដែងMVជាមួយគ្នាហាក់នៅឆ្គងៗមិនសូវសមគ្នាសោះ។ប៉ុន្ដែភ្លាមៗនោះលោកគ្រូភ្លេង(Composer)ម្នាក់បានចេញមុខប្រឆាំងដោយសួរថាបើសោភា-វីរៈសិទ្ធ មិនស៊ីគ្នាព្រោះអាយុចុះម៉េចបានគ្មានអ្នកណាសួរថាព្រាប សុវត្ថិ-ហ៊ឹម ស៊ីវន ធ្លាប់ច្រៀងជាមួយគ្នានៅហង្សមាសថាមិនស៊ីគ្នាផង?លោកថាអាយុខុសគ្នាអត់បញ្ហាទេសំខាន់សម្លេងតារាទាំង២ត្រូវគ្នាហើយធ្វើការងារចេះគោរពគ្នានោះអាចចាប់ដៃគ្នាបានហើយ។
ដួង វីរៈសិទ្ធ បានចេញបទថ្មីៗរបស់ខ្លួននៅរាម ដូចជាបទ”ឆ្នេរអនុស្សាហ៍”,”វិបត្តិស្នេហ៍”,”សន្យា”ជាដើមហើយអតីតតារាហង្សមាសរូបនេះបានចុះកុងត្រារយៈពេល១ឆ្នាំនៅផលិតកម្មថ្មីនេះពោលគឺដូចគ្នាទៅនិងមាស សុខសោភា ដែរ។ទោះជាយ៉ាងណាគេជឿរថារាម នឹងបន្ថែមចំនួនកុងត្រាលើតារារូបនេះជាមិនខានព្រោះតែរូបគេជាអ្នកចម្រៀងដែលអាចធ្វើភ្លេង,និពន្ធទំនុកច្រៀងនិងMelody រួមទាំងMixដោយខ្លួនឯងបាន។អ្វីដែលជាសញ្ញាថាវីរៈសិទ្ធ នឹងនៅជាមួយរាម បានយូឆ្នាំនោះគឺតារារូបនេះចាប់ផ្ដើមចេញលក់ផលិតផលជាមួយថៅកែស្រីរាម ព្រមទាំងមានក្ដីស្រម៉ៃចង់ក្លាយទៅជាម្ចាស់ហាងលក់ផលិតរក្សារសម្រស់ដោយខ្លួនឯងនាពេលខាងមុខដូចសុខសោភា ទៀតផង។
គូសបញ្ជាក់ថាដួង វីរៈសិទ្ធ ជាម្ចាស់ពានI Am A Singer Cambodia រដូវកាលទី១និងឈជើងនៅហង្សមាសជាច្រើនឆ្នាំ។ប៉ុន្ដែអំឡុងជ្រកនៅហង្សមាសនោះលោកបានត្រឹមធ្វើជាតួរងប៉ុណ្ណោះព្រោះពេលនោះព្រាប សុវត្ថិ,ខេមរៈ សិរីមន្ដ និងឱក សុគន្ធកញ្ញា គឺជាតួឯក។តែការទៅដល់រាម នេះធ្វើឲ្យវីរៈសិទ្ធ ក្លាយទៅជាតួឯកដោយសារបានចាប់ដៃគូជាមួយតារាជើងខ្លាំងមាស សុខសោភា ទើបធ្វើកេរ្ដិ៍ឈ្មោះវីរៈសិទ្ធ អាចស្ទុះទៅមុខថែមទៀតប្រសិនបើមានបទល្បីដូចការរំពឹងទុករបស់លោកនៅពេលខាងមុខខនេះមែន។
លោកនូ ស៊ឹប អតីតតារាហង្សមាសបានលើកឡើងថាដួង វីរៈសិទ្ធ និងមាស សុខសោភា អាចធ្វើជាដៃគូគ្នាបានសម្លេងស៊ីគ្នា។លោកសង្កត់ថាវីរៈសិទ្ធ ជាតារាមានប្រជាប្រិយភាពម្នាក់នាពេលបច្ចុប្បន្នដែលតារាជើងចាស់មួយចំនួនទៀតក៍ទទួលស្គាល់សម្ថភាពអ្នកចម្រៀងម្នាក់នេះដែរ៕
