ភ្នំពេញ៖សីស្រស់សឹម ស្រីនិច្ច បានបង្ហាញភាពក្លាហានតាមរយៈការបញ្ចេញមុខគូស្នេហ៍ជាចំហនៅថ្ងៃទី១៨ខែតុលាឆ្នាំ២០២១នេះក្នុងដំណើរកម្សាន្ដជាលក្ខណៈឯកជនមួយដែលការលាតត្រដាងម្ចាស់បេះដូងនៅពេលនេះប្រាកដជាធ្វើឲ្យប្រុសៗមិនតិចនោះទេដែលធ្លាប់លួចស្នេហ៍នាងដែរប្រឈមការខកចិត្តជាមិនខានព្រោះថាពួកគេអស់សិទ្ធិប្រជែងដណ្ដើមបេះដូងស្រីស្អាតរូបនេះទៀតហើយ។ទោះជាយ៉ាងណាទស្សនិកជនជាច្រើនប្រាកដជាសរសើរស្រីនិច្ច ក្នុងការលាតត្រដាងគូស្នេហ៍នាពេលនេះជាមិនខានព្រោះថាតារាមួយចំនួនទៀតព្យាយាមលាក់មុខសង្សារជាសាធារណៈព្រោះពួកគេខ្លាចប៉ៈពាល់ដល់អាជីព។
ក្នុងជំនួបតាមទូរស័ព្ទសឹម ស្រីនិច្ច បានសារភាពថាបុរសម្នាក់ដែលនាងកៀកកើយនោះគឺពិតជាសង្សាររបស់នាងមែន។នាងថាចំពោះមូលហេតុដែលត្រូវបង្ហាញមុខគូស្នេហ៍នៅពេលនេះដោយសារតែគិតថាដល់ពេលវេលាត្រូវឲ្យគេស្គាល់ហើយ ព្រោះនាងនិងសង្សារស្រលាញ់គ្នាក៍បានកន្លះឆ្នាំហើយដែរ។ទោះជាយ៉ាងណាស្រីនិច្ច ថានាងមិនទាន់គិតគូរដល់រឿងភ្ជាប់ពាក្យឬរៀបការនោះទេ ព្រោះអីពេលនេះនាងទើបមានអាយុ២២ឆ្នាំ ខណៈដែលសង្សារនាងអាយុ៣៣ឆ្នាំហើយ។តារាសម្ដែងរូបស្រស់នេះថានាងមិនចូលចិត្តស្រលាញ់បុរសដែលវ័យក្មេងជាងនាងនោះទេ ហើយពេលនេះសង្សារនាងក៍មិនមែនចាស់ណាស់ដែរ…។
សឹម ស្រីនិច្ច បន្ថែមថាគូស្នេហ៍របស់នាងជាអ្នកជំនួញតែលោកមិនមែនជាដើមចមដែលបណ្ដាលឲ្យនាងផ្អាកពីអាជីពសិល្បៈនាពេលកន្លងមកនោះទេ។នាងថាសម្រាប់អាជីពសិល្បៈអាចនៅដើមឆ្នាំក្រោយនេះនាងនឹងវិលមកប្រឡូកឡើងវិញ ប៉ុន្ដែមិនមែនពេញអំហ៊ឹងដូចមុនឡើយគឺនឹងធ្វើការណាដែលខ្លីៗប៉ុណ្ណោះ ព្រោះនាងនៅតែផ្ដោតលើការរកស៊ីច្រើនជាងសិល្បៈ។តារាសម្ដែងនិងជាម៉ូឌែលដ៍ស្រស់សោភា រូបនេះក៍បានឲ្យដឹងដែរថាពេលនេះនាងក៍បានត្រៀមខ្លួនថតស្ពតមួយផងដែរនាពេលឆាប់ៗខាងមុខនេះ ហើយទោះជាមុននេះបានផ្អាកការថតសម្ដែងមួយអន្លើមែន តែមិនមែនផ្ដាច់ខ្លួនទាំងស្រុងពីអាជីពសិល្បៈឡើយ។
ខណៈដែលមានការលើកឡើងថាបុរសដែលជាសង្សារសឹម ស្រីនិច្ច ជាអ្នកមានសំណាងជាងប្រុសផ្សេងៗទៀតដែលដណ្ដើមបានបេះដូងស្រីស្អាតស្រីនិច្ច ដែលជានារីដ៍មានមន្ដស្នេហ៍និងមានជម្រើសស្នេហ៍ច្រើននោះស្រីនិច្ច ឯណ្ណោះវិញបែជាថារូបនាងទេដែលមានសំណាងព្រោះសង្សារនាងក៍មានជម្រើសស្នេ៍ហ៍ច្រើនដែរតែលោកស្រលាញ់តែនាង។ស្រីនិច្ច វាចារថាចំពោះមូលហេតុដែលនាងជ្រើសរើសបុរសម្នាក់ដែលនាងចាត់ទុកថាជាសង្សារនៅពេលនេះដោយសារតែលោកស្រលាញ់នាងស្មោះត្រង់និងតែងតែផ្ដល់ភាពកក់ក្ដៅដល់រូបនាងរហូតមក ប៉ុន្ដែស្រីនិច្ច ថាជីវិតអាពាហ៍ពិពាហ៍នៅតែមិនអាចកំណត់បាននោះទេព្រោះនាងត្រូវការពេលវេលាពិសោធន៍ស្នេហ៍ថែមទៀត និងម្យាងពេលនេះផ្ដោតលើការរកស៊ីច្រើនជាង។
ក្រៅពីសឹម ស្រីនិច្ច តារាដែលសាងស្នេហ៍ជាមួយសង្សារជាចំហមានដូចជាពេជ្រ សោភា ,ប៉ាច គីមមួយ,ទេព បូព្រឹក្ស,សុខ សោម៉ាវត្តី ,ម៉ង់ ចាន់កញ្ញា និងចំរើន សុភ័ក្រ ជាដើម។គេចាំមើលថាក្នុងចំណោមតារាខាងលើនេះស្រីស្អាតរូបណាទៅដែលនឹងដឹកដៃគូស្នេហ៍ចូលរោងការមុនគេ?
ហ៊ឹម វិចិត្រ
