ភ្នំពេញ៖ក្រោយផ្ទុះរឿងអតីតតារាកំប្លែងCtnអ្នកនាងស្រេង សុកាន់ដា ហៅខ្ញុង ជំពាក់បំណុលគេ២០នាក់សរុបទឹកលុយចំនួនដល់ទៅ៥៧២០០០ដុល្លារនោះធ្វើឲ្យទាំងមជ្ឈដ្ឋានក្នុងនិងក្រៅសិល្បៈ បានភ្ញាក់ផ្អើល ខណៈដែលខ្ញុង មានប្រកាសសុំជំនួយពីសប្បុរសជនដើម្បីយកលុយទៅសងគេ ហើយភ្លាមៗនោះមានទាំងអ្នកនៅក្នុងនិងក្រៅសិល្បៈបានបាញ់លុយឲ្យខ្ញុង ជាបន្ដបន្ទាប់តាមAba ក្នុងនោះថៅកែរាម ផ្ដល់ជំនួយ១០ម៉ឺនដុល្លារ ស្របពេលអ្នកខ្លះលើកឡើងថាខ្ញុង ធ្លាក់ខ្លួននៅមានផ្ទះផ្ទាល់ខ្លួននៅ និងជិះសុទ្ធតែរថយន្ដLand CruiserV8តម្លៃជាង១០ម៉ឺនដុល្លារទៀតផង ចុះម្ចាស់ជំនួយនៅផ្ទះជួល ជិះកង់បីតើ?។
ដោយឡែកនៅព្រឹកថ្ងៃទី១៩ខែតុលាឆ្នាំ២០២១នេះដែរគេឃើញអ្នកផលិតកម្មវិធីទូរទស្សន៍ដ៍ល្បីល្បាញឈ្មោះលោកគួច ខេវិន បានបញ្ចេញមតិជុំវិញរឿងអ្នកនាងខ្ញុង ជំពាក់បំណុលគេជាងកន្លះលានដុល្លារហើយសុំឲ្យទស្សនិកជនជួយនាងនេះ។លោកខេវិន បានថ្លែងសារបង្កប់ទៅដោយអត្តន័យជ្រាលជ្រៅសម្រាប់បងប្អូនយកទៅពិចារណាថា” គ្រប់រឿង គ្រប់រ៉ាវវាតែងតែមាន “ហេតុ បច្ច័យនិងផល” របស់វាជានិច្ច។ ជាដំបូងខ្ញុំសូមសម្តែងនូវក្តីអាណិតអាសូរជាពន់ពេក ចំពោះប្អូនស្រីខ្ញុង ដែលកំពុងតែវ័ណ្ឌ ក ជាមួយបំណុលសិបម៉ឺន មិនមានលទ្ធភាពសងរហូតសុខចិត្តដើរចូលគុក ដោយពុំទាន់ទាំងមានអ្នក ប្តឹង និងមិនទាន់មានដីការតុលាការផ្តន្ទាទោសអំពីកំហុសអ្វី? ហើយកាន់តែអណោចថែម ទៀតគឺប្អូនស្រីពុំបានភ្លេចទទូចអង្វរសុំជំនួយពីសប្បុរសជននានា ម្នាក់១ដុល្លាៗទុកគ្រាន់ឲ្យកូនៗពីរនាក់របស់ប្អូនស្រីទិញបាយហូប ពេលដែលប្អូនស្រីគេងនៅក្នុងគុក ។
ពិតជាម្តាយប្រកបដោយព្រហ្មវិហារធ៌ម ជាប្រពន្ធមហាល្អដែលមិនឲ្យប្តីរងទុក្ខមែន ហើយពិតៗជាពិបាករកមនុស្សដែលហ៊ានស៊ីហ៊ានសងដូចប្អូនស្រី ខ្ញុងនេះណាស់ ព្រោះបើខ្ចីគឺខ្ចី បើអត់លុយសងសុខចិត្តដើរចូលគុកមិនបាច់គេចាប់។ ខ្ចីគេសោះហ៊ានទៅរកស៊ីជាមួយ កឺកឺ! ហើយកឺកឺមកពីណាមករកស៊ី តិតក់ ជាមួយវិនិយោគិនជាប់បំណុលដូចជាប្អូនស្រី ខ្ញុងហ្នឹង? ធ្លាប់តែឮគេលេងល្បែង Game on line, ឥឡូវ Loan on line ទៀត! ខ្ញុំគ្រាន់តែព្រលយការគិតតិចតួច!ដូចជាមិន ទំនង? ទោះជាយ៉ាងណាខ្ញុំសុំអង្វរញាតិមិត្តកុំសើច កុំយំកុំឡកឡាយ លេបខាយផ្លែផ្កាឲ្យប្អូនស្រី ខ្ញុងធ្វើអ្វី ជួយបានក៏ជួយ ជួយមិនបានក៏ហី ! ព្រោះប្អូនស្រី ខ្ញុងក៏ឆ្លាតមិនអន់ដែរ គ្រាន់តែវាចាញ់ប្រាជ្រ ប៉ុណ្ណោះទើបមានជារឿងបែបអញ្ចឹង ! ចង់ជួយ ប្អូនស្រីខ្ញុងក៏បាន ជួយមន្ទីពេទ្យគន្ធបុប្ឋា មន្ទីពេទ្យកុមារជាតិ កុមារអង្គរ ក៏បានព្រោះនោះជាសទ្ធា ជាកុសលបុណ្យ របស់បងប្អូនជនរួមជាតិ រួមភាសានៃយើងខ្ញុំក៏ស្ម័គ្រចិត្តជួយចំពោះអ្នកដែលខ្ញុំយល់ច្បាស់ថាត្រូវតែជួយ!”។
ក្រោយឃើញលោកគួច ខេវិន បង្ហោះសារបែបនេះកំពូលតារាចម្រៀងម៉េង កែវពេជ្ជតា បានចូលទៅខមិនតបថា”មិនហ៊ានបញ្ចេញយោបល់ច្រើនទេ ព្រោះខ្លាចគេថាខ្ញុំច្រណែនគេដែលរកលុយបានស្រួល ម្យ៉ាងទៀត មាត់ដ៏ពូកែភូតកុហក់ និងបោកប្រាស់របស់អ្នកមួយចំនួននោះ ពិតជាពូកែបញ្ចោរដូចគ្នា មិនមែនខ្លាច តែខ្ជិលតតាំងជាមួយមនុស្សមិនបានការ ។ ប៉ុន្តែសូមរំលឹកពាក្យចាស់មួយពោលថា “ ភូតច្រើនចាញ់អាត្មា “ ពាក្យនេះចង់សំដៅទៅបុគ្គលដែលកំពុងភូតភរឆបោក យកក្តីអាណិតរបស់គេគ្រប់គ្នាមកលេងសើចដើម្បី Views ដើម្បីលុយ ដើម្បីប្រយោជន៍ ដោយខំដាក់បណ្តាសារខ្លួនថារលំរលាយនេះ មិនយូរទេភាពរលំរលាយក្ស័យធនពិតប្រាកដនឹងកើតឡើងមែនទែនក្នុងជីវិតរបស់ពួកគេឆាប់ៗ ពេលនោះសូម្បី១០០ លុយខ្មែរក៏គ្មាននរណាអោយ ហើយមានទោសបានចូលទ្រុងដូចប្រាថ្នា។ មិននិយាយមិនមែនមានន័យថាមិនដឹងនោះទេ !”។
ដោយឡែកលោកហេង ឡុង ប្រធានសមាគមន៍មិត្តសិល្បៈស្ម័គ្រចិត្តជួយសង្គម បានចេញសារថា”ខ្ញុំមិនយល់ហេតុអីអ្នកសិល្បៈឲ្យតែខ្វះខាតតែងតែផុសសំជំនួយ?អ្នកខ្វះខាតជាងយើងមានច្រើនណាស់”៕