ភ្នំពេញ៖តារាចម្រៀងហង្សមាសលោកខេម ប៊ុនថៃ ហៅខេមរៈ សិរីមន្ដ បានឲ្យដឹងថាលោកមិនទាន់កំណត់ពេលវេលានៃការឡើងច្រៀងសម្ដែងតាមឆាកតន្រ្ដីប៉ុស្ដិ៍ទូរទស្សន៍ជាធម្មតាវិញនោះទេ ក្រោយពីបានផ្អាកជាច្រើនខែដោយសារតែមិនទាន់ស្ងាត់កូវីដនេះ។យ៉ាងណាលោកថាថ្មីៗនេះលោកទើបឡើងច្រៀងឆាកAnchor បានម្ដងដែរ តែសម្រាប់ឆាកផ្សេងៗទៀតលោកមិនអាចកំណត់ថានឹងចេញច្រៀងសម្ដែងពេញទំហ៊ឹងវិញនៅពេលណាបាននោះទេព្រោះរងចាំឲ្យកូវីដស្ងប់ស្ងាត់និងអ្វីៗវិលមកដូចដើមវិញសិន។
លោកខេមរៈ សិរីមន្ដ បានប្រាប់”នគរធំ”តាមទូរស័ព្ទកាលពីថ្ងៃទី២៥ខែតុលាថាអំឡុងពេលមិនទាន់ចេញច្រៀងសម្ដែងតាមឆាកតន្រ្ដីដូចមុននេះលោកកាន់តែមមាញឹកថែមទៀតទៅលើការធ្វើជំនួញទាក់ទងវិស្ស័យអចលនទ្រព្យនៅឆ្នាំ២០២១នេះ បន្ទាប់លោកបានបើកគម្រោងធំលក់ដីឡូតិ៍នៅខេត្តបន្ទាយមានជ័យ។លោកប៊ុនថៃ ហៅសិរីមន្ដ ថាចាប់ពីពេលនេះតទៅគេនឹងឃើញលោករកស៊ីផ្នែកដីធ្លីនេះកាន់តែច្រើនជាងមុនព្រោះគម្រោងរបស់លោកនឹងធ្វើគ្រប់២៥ខេត្តក្រុងតែម្ដង។ប៉ុន្ដែលោកថាទោះជាមមាញឹកការរកស៊ីយ៉ាងណាក៍លោកនៅតែបន្ដចេញបទចម្រៀងជាធម្មតានៅហង្សមាសគឺធ្វើយ៉ាងណាដើម្បីឲ្យកាន់តែល្អជាងពេលនេះដើម្បីបម្រើរអារម្មណ៍មហាជន។
ទាក់ទងដំណឹងថាលោកខេមរៈ សិរីមន្ដ អាចនឹងដើរចេញពីហង្សមាសចូលទៅGalaxyនាពេលខាងមុនេះអតីតតារាចម្រៀងU2 និងសាន់ដេរូបនេះនិយាយខ្លីថាបច្ចុប្បន្នលោកជាតារាចម្រៀងដែលមានកុងត្រានៅហង្សមាស តែលោកថានោះជាកិច្ចការផ្ទៃក្នុងហេតុនេះមិនអាចនិយាយបានថានៅជាប់កុងត្រាប៉ុន្មានឆ្នាំទៀតនោះទេ ។យ៉ាងណាលោកប៊ុនថៃ ថាគ្មានអ្នកណាអាចដឹងថានៅពេលខាងមុខមានរឿងអ្វីកើតឡើងឡើយ ប៉ុន្ដែពេលនេះលោកនៅមានការងារច្រើនទៀតដែលត្រូវធ្វើនៅហង្សមាស។
ខេមរៈ សិរីមន្ដ បានវ៉ាដាច់អស់តារាចម្រៀងរួមក្រុមនៅហង្សមាសហើយនៅរដូវកូវីដនេះគេឃើញមានតែលោកប៊ុនថៃ និងរ៉េត ស៊ូហ្សាណា ប៉ុណ្ណោះដែលមានទីផ្សារស្ទុះឡើងនៅផលិតកម្មធំនេះ។ក្រៅពីក្លាយទៅជាតារាចម្រៀងឈានមុខគេនៅហង្សមាសខេមរៈ សិរីមន្ដ ក៍ត្រូវបានគេចាត់ទុកថាជាអ្នកចម្រៀងដែលមានទ្រព្យច្រើនផងដែរ បើទោះជាលោកមិនដែលប្រកាសពីទ្រព្យសរុបក្ដី តែលោកប៊ុនថៃ មានផ្ទះវីឡារស្កឹមស្កៃ និងជិះរថយន្ដទំនើបៗ៤គ្រឿងឆ្លាស់គ្នាមានដូចជាRolls Royce,Lexus Lx570 ,Volkswagen និងMazda ។ដោយឡែកសម្រាប់រដូវកូវីដ២ឆ្នាំកន្លងមកទោះជាលោកសិរីមន្ដ បាត់បង់ទាំងស្រុងប្រាក់ចំណូលពីConcertsធំៗតាមខេត្តដូចតារាល្បីៗមួយជំនួនទៀតមែន ប៉ុន្ដែលោកបានត្រូវប៉ាន់ថតស្ពតមួយចំនួនហើយថែមទាំងហ៊ានដាក់ទុករកស៊ីធំវិនិយោគវិស្ស័យអចលនទ្រព្យនេះរាប់សែនដុល្លារទៀតផង។ងាកមកមើលចំណងស្នេហាលោកខេមរៈ សិរីមន្ដ និងអ្នកនាងគួយ ផល្លី ក៍កាន់តែផ្អែមល្ហែមខ្លាំងឡើងៗ បន្ទាប់ពីអ្នកទាំង២ចាប់ដៃគ្នា១៧ឆ្នាំ(២០០៤-២០២១)ទទួលបានចំណងដៃកូន៣នាក់(ស្រី២)។ប៉ុន្ដែនៅឆ្នាំ២០២១នេះស្ងាត់មានព័តមានលោកប៊ុនថៃ ត្រៀមយកកូនទី៤ ខណៈលោកសិរីមន្ដ បានលើកស្ទួយភរិយាឲ្យល្បីឈ្មោះក្នុងសិល្បៈដូចលោកដែរតាមរយៈការឲ្យអ្នកនាងផល្លី ធ្វើជាជំនួយការ និងអ្នកដឹកនាំសម្ដែងបទចម្រៀងMVរបស់លោកផ្ទាល់តែម្ដង។
មជ្ឈដ្ឋានមហាជនរងចាំមើលថាតើលោកខេមរៈ សិរីមន្ដ នឹងទទួលបានតំណែងគ្រូបង្វឹកនិងគណៈកម្មារការទាំង៣របស់ព្រាប សុវត្ថិ នៅហង្សមាសដែលនៅទំនេរមានដូចជា Cambodian Idol ,The Voice Kids Cambodia និងCambodian Idol Junior នោះដែរឬទេ បន្ទាប់ពីលោកត្រូវបានថៅកែប្រគល់តំណែងជាគ្រូបង្វឹកX Factor Cambodia រួចហើយនោះ។តែទាក់ទងរឿងនេះលោកវណ្ណា ដែលជាអ្នកគ្រប់គ្រងកម្មវិធីប្រលងចម្រៀងធំៗនៅហង្សមាសនោះធ្លាប់ប្រាប់ថាថ្នាក់ដឹកនាំហង្សមាសមិនទាន់គិតដល់ចំណុចទាំងនោះឡើយ ព្រោះទោះជាពេលនេះបណ្ដារកម្មវិធីខាងលើត្រូវបានផ្សព្វផ្សាយពីការត្រៀមមកដល់សម្រាប់រដូវកាលថ្មីក្ដី ប៉ុន្ដែទាល់តែស្ងាត់កូវីដ ឬរដ្ឋាភិបាលបើកឲ្យមានការជួបជុំឡើងវិញទើបអាចតំណើរការកម្មវិធីខាងលើឡើងវិញបាន៕
