ភ្នំពេញ៖កូនក្រមុំលោកហួ ឡាវី កញ្ញាវី ឌីណែត បានវិលមករកាឆាកតន្រ្ដីវិញបានជាង១ខែហើយក្រោយពីនាងបាត់មុខពីការច្រៀងសម្ដែងអស់រយៈពេលជិត៤ខែដោយសារតែព្យាបាលកូវីដ។យ៉ាងណាការចេញច្រៀងសម្ដែងជាធម្មតាឡើងវិញរបស់ឌីណែត នៅពេលនេះទោះជានាងជាកូវីដ១០០%ក្ដី តែសុខភាពរបស់នាងមិនអំណោយផលនោះទេព្រោះតែជំងឺផ្សេងទៀតតាមយាយីសុខភាពអ្នកចម្រៀងវ័យក្មេងរបស់ហង្សមាសរូបនេះ។ជំងឺកាចសាហាវដែលឌីណែត កំពុងតែបារម្ភក្នុងការព្យាបាលនោះគឺជំងឺពកកដែលនាងថាវាបានកើតឡើងចំពោះរូបនាងជាច្រើនឆ្នាំមកហើយ តែទើបធ្វើទុក្ខខ្លាំងនៅរយៈពេលចុងក្រោយនេះ។ឌីណែត ថាតាំងពីកើតជំងឺនេះមកវាបានធ្វើឲ្យរំខានជាខ្លាំងដល់អាជីពចម្រៀងរបស់នាងព្រោះប៉ៈពាល់ទៅដល់ចង្វាក់បេះដូង ។នាងក៍បានទៅជួបក្រុមគ្រូពេទ្យជំនាញដើម្បីពិភាក្សារពីស្ថានភាពជំងឺរបស់នាងដែរហើយគ្រូពេទ្យបានឲ្យថ្នាំនាងលេបជាប្រចាំនិងត្រូវប្រឈមការលេបថ្នាំនេះអស់១ជីវិតផងដែរទើបនាងពិបាកចិត្ត។
វី ឌីណែត ជាតារាចម្រៀងវ័យក្មេងដែលប្រើប្រាស់សម្លេងខ្ពស់បំផុតបានមិនចាញ់ឱក សុគន្ធកញ្ញា នោះទេហើយកន្លងមករាល់បទល្បីៗរបស់ខេមរៈ សិរីមន្ដ នាងជាអ្នកច្រៀងCover ។ប៉ុន្ដែការកើតជំងឺពកកនេះវាពិតប៉ៈពាល់ដល់ការច្រៀងខ្ពស់ៗរបស់នាងខ្លាំងណាស់ ហើយនាងថាមិនទាន់មានគម្រងចេញទៅពិគ្រោះជំងឺមួយនេះជាមួយក្រុមគ្រូពេទ្យនៅក្រៅស្រុកនោះទេ។ ប៉ុន្ដែឌីណែត ថាស្ថានភាពសុខភាពរបស់នាងទាក់ទងរឿងកូវីដនោះគឺពេលនេះនាងជាដូចដើមឡើងវិញហើយ។នាងបន្ថែមថាទោះជាមានជំងឺតាមបំផ្លាញសុខភាពនាងក្ដី តែនាងនៅតែបន្ដថតបទចម្រៀងថ្មីៗជាបន្ដបន្ទាប់ក្រោយជាកូវីដនេះ។
វី ឌីណែត ជាតារាមានទុក្ខធំក្រោយពីម្ដាយជាទីស្រលាញ់របស់នាងអ្នកស្រីងួន សុផាន់នី ដែលជាភរិយាតារាចម្រៀងហួ ឡាវី បានទទួលមរណភាពកាលពីថ្ងៃទី១៩ខែមីនាឆ្នាំ២០២១ដោយជំងឺកូវីដធ្វើឲ្យឌីណែត ស្រណោះអាលោះអាល័យម្ដាយជាពន់ពេកព្រោះគ្មានឱកាសបានចូលរួមបុណ្យសពម្ដាយ ហើយពេលនាងជាពីកូវីដមកផ្ទះវិញលែងបានជួបម្ដាយជារៀងរហូត។អំឡុងពេលដែលឌីណែត នៅកាន់ទុក្ខជូនម្ដាយនេះរឿងស្នេហានាងជាមួយបុរសម្នាក់ដែលនាងតែងតែយកស្ទីគ័របាំងមុខមិនឲ្យគេស្គាល់ព្រោះសម្អាងថាមិនច្បាស់លាស់នោះក៍ស្ងប់ស្ងាត់ទៅវិញដែរព្រោះមិនអាចបង្ហាញភាពផ្អែមល្ហែមនៅពេលនេះបាន។ប៉ុន្ដែគេជឿរថានាងនិងគូស្នេហ៍នៅតែបន្ដស្វែងយល់ចិត្តគ្នាតទៅទៀត៕
