ភ្នំពេញ៖យូរី និងថៅកែបានជាប់គាំងមុខជំនួញព្រមគ្នានៅរដូវកូវីដដែលអូសបន្លាយពេលវេលាដល់ទៅ២ឆ្នាំមកនេះធ្វើឲ្យការកស៊ីរវាងយូរី និងថៅកែរកស៊ីទៅមុខមិនរួចរហូតមានពេលខ្លះថៅកែប្រកាសលក់ឡានទៀតផង។ប៉ុន្ដែពេលនេះទាំងយូរី និងថៅកែបានវិលមករកស្ថានភាពរីករាយដូចគ្នាឡើងវិញ ខណៈដែលយូរី ត្រៀមសម្ពោធហាងសាឡន និងសាលាបង្រៀនកែសម្ផស្សរបស់នាងជាថ្មីហើយក្រោយពីធ្វើពិធីសម្ពោធរួចនាងនឹងឡើងជាថៅកែស្រីតែម្ដង។ចំពោះលោកថៅកែជា នី ដែលត្រូវបានគេអះអាងថានឹងក្លាយទៅជាស្វាមីរបស់យូរី នៅពេលអនាគតតែតារាហង្សមាសតែងតែប្រកែកនោះពេលនេះមុខជំនួញភោជនីយដ្ឋានរបស់លោកដែលចំណាយទុនដល់ទៅ៥០ម៉ឺនដុល្លារនោះបានបើកតំណើរការឡើងវិញហើយដែរ ទើបធ្វើឲ្យថៅកែ និងយូរី លែងតុកស៊ិកទៀត។
គូរបញ្ជាក់ថាយូរី បានប្រេះឆាស្នេហ៍ជាមួយអតីតអ្នកដឹកនាំសម្ដែងលោករ៉េត ហើយត្រូវបុរសនោះរៀបការចោលនាងកាលពីថ្ងៃទី១១ខែវិចិ្ឆការឆ្នាំ២០១៨ ខណៈដែលយូរី បានងាកទៅស្និតស្នាលជាមួយប្រុសក្មេងរូបសង្ហារលោកប៊ីម៉ូ(Bmo) ។ប៉ុន្ដែចុងក្រោយយូរី បានផ្អាកចេញច្រៀងសម្ដែងជាមួយប៊ីម៉ូ និងលែងកៀកកើយគ្នាដូចមុនហើយនាងបង្ហាញភាពល្អូកល្អើនជាមួយលោកថៅកែជា នី ដែលជាអ្នកជំនួញល្បីខាងរកស៊ីបើកហាងធំៗក្នុងក្រុងភ្នំពេញ។គេឃើញរាល់ពេលដែលយូរី ឡើងច្រៀងសម្ដែងតាមបណ្ដារឆាកតន្រ្ដីទាំងឡាយនាងត្រូវបានលោកនី ដឹកតាមរថយន្ដLand CruiserV8 ជូននាងទៅប្រៀបបានជាអង្គរក្សបេះដូង ប៉ុន្ដែអ្វីដែលចម្លែកទាំងយូរី និងលោកថៅកែកុំថាឡើយមានដំណឹងចូលរោងការជាមួយគ្នានោះសូម្បីតែសារភាពស្នេហ៍ក៍អ្នកទាំង២មិនហ៊ានលាតត្រដាងរឿងស្នេហ៍មួយនេះដែរ។យូរី ធ្លាប់វាចារថានាងចាត់ទុកលោកនី ដូចជាបងប្រុសហើយនាងប្រាកដជាមិនអាចអត់បងប្រុសម្នាក់នេះបានទេព្រោះតែការកស៊ីរបស់នាងត្រូវការពឹងពាក់លោកថៅកែជួយទើបទៅរួច។ដោយឡែកលោកនី ធ្លាប់និយាយខ្លីថាចិត្តគំនិតលោកនិងយូរី ដូចគ្នាច្រើនទើបអាចដើរចូលគ្នាបាន។
មហាជនរងចាំមើលថាតើពេលណាទើបយូរី ព្រមសារភាពស្នេហ៍ថៅកែ ខណៈអំឡុងពេលដែលយូរី កាន់តែស្អិតល្មូតថៅកែនេះក៍មានស្រីស្អាតមួយចំនួនស្រក់ទឹកភ្នែកផងដែរព្រោះថាចង់ចូលខ្លួនទៅស្អំរបួសបេះដូងថៅកែពោះម៉ាយ តែមិនអាចប្រជែងឈ្នះយូរី ឡើយ៕
