កំពត៖កាលពីថ្ងៃច័ន្ទទី៣ខែមករា ឆ្នាំ២០២២វិមានព្រះបរមបដិមា ព្រះអង្គគោកធ្លក ដែលមានត្រូវបានរៀបពិធីពុទ្ទាភិសេក ក្រោមព្រះអធិបតីភាព សម្តេចព្រះពោធិវង្សកក្តិបណ្ឌិត អំ លឹមហេង ព្រះសង្ឃនាយករងទីមួយនិងជាព្រះប្រធានថេរសភា សង្ឃនៃពុទ្ធសាសនានៅព្រះរាជាណាចក្រកម្ពុជា ។លោកហេង ហុកឡាយ និង លោកឈុន ហេងឡេង អគ្គនាយកក្រុម ហ៊ុនអេចអិល ណាការ៉ា ឌីវេឡុបម៉ិន បានផ្តួចផ្តើមគំនិតសាងសង់វិមានព្រះបរមបដិមា ព្រះអង្គគោកធ្លក សម្រាប់ជាទីសក្ការៈបូជា ដល់ប្រជាជនកម្ពុជាទាំងមូលជាពិសេស ញាតិញោម ដែលបានទៅដល់ទឹកដីខេត្តកំពត កុំភ្លេចឈាងចូលអុជធូបបន់ស្រន់សុំសេចក្តីសុខ សេចក្តីចម្រើនពីព្រះអង្គ។លោកហេង ហុកឡាយ បានថ្លែងថា មូលហេតុដែលលោកបានតាំងចិត្តសាងសង់ព្រះបរមបដិមាព្រះអង្គគោកធ្លក ឡើងក្នុងគោលបំណងលើកស្ទួយដល់ព្រះពុទ្ធសាសនា ស្ថាបត្យកម្មបុរាណខ្មែរ ជាពិសេសកន្លែងល្បីស័ក្ដិសិទ្ធិ ដែលបងប្អូនប្រជាពលរដ្ឋយើង តែងតែដឹងពីបារមី របស់ព្រះអង្គគោកធ្លក ដែលបានដំណាលថាពួកខ្មាំងសត្រូវ ដែលមានបំណងប៉ុនប៉ងធ្វើអាក្រក់មកលើទឹកដីកម្ពុជាគឺមិនបានសម្រេចទេ ជាក់ស្តែងរូបបដិមា របស់ព្រះអង្គគោកធ្លកស្ថិតនៅស្រុកមណ្ឌលសីមា ក្បែរច្រកអន្តរជាតិចាំយាម។ ដូច្នេះហើយទើបលោកហេង ហុកឡាយ ថាការកសាងព្រះបដិមា នៅក្នុងខេត្តកំពតនេះ គឺសម្រាប់បងប្អូនប្រជាពលរដ្ឋកម្ពុជា មកសុំសេចក្តីសុខសេចក្តីចម្រើនពីព្រះអង្គគ្រប់ៗគ្នាដោយរឹទ្ធាអំណាចរបស់ព្រះអង្គ និងជួយឃុំគ្រងកូនចៅអោយជួបតែសេចក្តីសុខ។
សូមជម្រាបថាព្រះបរមបដិមា ព្រះអង្គគោកធ្លក សាងសង់នៅលើផ្ទៃដីសរុបជាង ៤ហិកតារបស់បុរី អាយខនកំពតស្ថិតនៅលើបណ្តោយផ្លូវជាតិលេខ៣ ក្នុងភូមព្រៃឃ្មុំ ឃុំព្រៃឃ្មុំ ស្រុកទឹកឈូ ខេត្តកំពត ក្នុងតំបន់សេដ្ឋកិច្ច ពាណិជ្ជកម្ម ទេសចរណ៍នាក្រុងកំពត ខេត្តកំពត។ ព្រះបរមបដិមាព្រះអង្គគោកធ្លក ត្រូវបានឆ្លាក់យ៉ាងផ្ចិតផ្ចង់ល្អឥតខ្ចោះទាំងថ្ងៃទាំងយប់ ដោយជាងចម្លាក់ខ្មែដែលមាន ទំងន់ សរុប ជាង ១៥តោន កំពស់៤,៩ ម៉ែត្រ និង ព្រះភ្នែន ព្រះអង្គ ប្រវែង ១,៩៦ ម៉ែត្រ ព្រមជាមួយ បុស្បុក ៧ថ្នាក់ កំពស់រហូតដល់ ២៣ម៉ែត្រ ៩តឹក ប្រវែង មុខកាត់ ២១,២ ម៉ែត្រ និង ជម្រៅ ១៨,៣ម៉ែត្រ ស្មើ នឹង ទំហំ ៣៨៨ ម៉ែត្រក្រឡា ប្រកបដោយក្បូរក្បាច់វិចិត្ររចនាលម្អដោយបុស្បុក៧ថ្នាក់ និងចំណាយថវិការប្រមាណ ៨៦៧ ៨៨៨ ០០០រៀល (ប្រាំបីរយហុកសិបប្រាំពីរលាន ប្រាំបីសែន ប្រាំបីម៉ឺន ប្រាំពាន់រៀល)ដែល បង្ហាញពីអត្តសញ្ញាណស្ថាបត្យកម្មបុរាណខ្មែរដ៏អស្ចារ្យនិងសម្រាប់ជាទីសក្ការ: ដល់មហាជនទូទៅក្នុងប្រទេសផងដែរ។
បើយោងតាមឯកសាររូបពុទ្ធបដិមាករ គឺជារូបតំណាងឲ្យព្រះសមណគោតម បរមគ្រូនៃយើងចំពោះព្រះនាមព្រះអង្គគោកធ្លកនេះគឺបុព្វបុរសយើងដាក់ភ្ជាប់ឈ្មោះប្រទេសខ្មែរ កាលពីសម័យហ្វូណន ឬនគរភ្នំ និង នគរគោកធ្លក ពីព្រោះបដិមាករពុទ្ធរូបអង្គនេះមានបារមី ខ្លាំងពូកែណាស់ ហើយមានការគោរពបូជាបួងសួង សុំសេចក្ដីសុខចម្រើនបានតាមបំណងប្រាថ្នារៀងៗខ្លួន៕
