ភ្នំពេញ៖សុគន្ធ និសា បានសម្រុកចេញច្រៀងសម្ដែងតាមពិធីមង្គលការធំៗជាប់គ្នានៅដើមឆ្នាំ២០២២ ក្រោយស្ថានភាពកូវីដ កាន់តែថមថយនេះស្របពេលដែលសុខភាពរបស់នាងកាន់តែល្អឡើងវិញបន្ទាប់ពីបានជាកូវីដជិត១ឆ្នាំមកនេះ។នេះជាការបង្ហាញថាតារាចម្រៀងហង្សមាសរូបនេះមិនទាន់ត្រៀមខ្លួនរួចរាល់ក្នុងការពពោះនៅរដូវក្ដៅនេះឡើយក្រោយនិសា រំខានដោយកូវីដ និងត្រូវបង្ខំចិត្តលុបចោលការយកកូនដំបូងកាលពីដើមឆ្នាំ២០២១ ។ទោះជាយ៉ាងណាគេជឿរថានិសា អាចនឹងនៅតែចិញ្ចឹមចិត្តចង់បានកូននៅឆ្នាំនេះដដែលដើម្បីបំពេញបំណងម្ដាយនាងដែលចង់បានចៅព។អ្វីដែលគូរឲ្យកត់សម្គាល់សុគន្ធ និសា ទោះជាមានស្វាមីជាអ្នកជំនួញធំក៍ដោយតែអាជីពសិល្បៈរបស់នាងនៅតែបន្ដដូចមុនដដែល ខណៈដែលស្វាមីនាងលោកចៅ សម្បត្តិ មិនត្រឹមតែអត់ហួងហែងនាងក្នុងការច្រៀងរាំនោះទេ ប៉ុន្ដែអាណិកជនខ្មែរដែលមកពីរដ្ឋBoston សហរដ្ឋអាមេរិករូបនោះថែមទាំងលើកទឹកចិត្តនិសា យ៉ាងខ្លាំងពិសេសតាំងពីពេលនាងបានជាសះស្បើយពីជំងឺកូវីដមក។
សុគន្ធ និសា បានរៀបការកាលពីថ្ងៃទី១ខែធ្នូឆ្នាំ២០១៧ ជាមួយលោកចៅ សម្បត្តិ ដែលជាអាណិកជនខ្មែរអាមេរិកមានតួនាទីជានាយកផ្នែកប្រតិបត្តិក្រុមហ៊ុនមែនញូឡាយប្រចាំនៅកម្ពុជា។ក្រោយមានប្ដីជាង៤ឆ្នាំនេះនិសា នៅតែរក្សារបាននូវរូបសម្រស់ស្រស់ស្អាតដដែលមិនឡើងគីឡូឬបែកសាច់ខ្លាំងដូចតារាមួយចំនួនទៀតដែលមានប្ដីឡើយ។ប៉ុន្ដែសម្រាប់ទីផ្សារចម្រៀងរបស់អ្នកនាងប៊ុន សុគន្ធា នៅនិសា វិញហាក់ចុះខ្សោយជាងមុនបន្ដិច ខណៈដែលក្រោយបាត់បង់តំណែងធំThe Voice Kids Cambodia រដូវកាលទី២ ដែលធ្លាក់ក្នុងកណ្ដាប់ដៃរបស់សួស វីសា មកពេលនេះសុគន្ធា នៅមិនទាន់ត្រូវបានថៅកែហង្សមាសប៉ៈប៉ូវផ្លូវចិត្តតាមរយៈការប្រគល់តំណែងធំណាមួយមកលួងចិត្តនាងវិញឡើយ បើទោះជាមានការព្យាករណ៍ថាតំណែងដែលនៅទំនេរទាំង៣របស់លោកព្រាប សុវត្ថិ ក្រោយដើរចេញពីហង្សមាស ទៅចូលរួមជាមួយGalaxy មានដូចជាThe Voice Kids Cambodia ,Cambodian Idol និងCambodian Idol Junior នោះមួយណាក៍និសា អាចកាន់ជំនួសបានក្ដី តែមុននេះលោកវណ្ណា ដែលគ្រប់គ្រងកម្មវិធីប្រលងចម្រៀងខាងលើថាថ្នាក់ដឹកនាំមិនទាន់គិតដល់ចំណុចនេះឡើយ។
ក្រៅពីសុគន្ធ និសា តារាដែលយកប្ដីអាណិកជនខ្មែរអាមេរិកមានដូចជាអ្នកនាងអម្ពរ ទេវី,គឹម លក្ខិណា ,វ៉េត រតនា ,វ៉ាង ស្រីណូ និងសារ៉ាយ សក្ខណា ជាដើម៕
