ភ្នំពេញ៖អ្នកមេម៉ាយវង្ស សុផាវណ្ណ ហៅកែវ និសា ទោះជាពេលនេះនាងមានវ័យជាង៤០ឆ្នាំក្ដី ប៉ុន្ដែរូបសម្រស់នៅតែខ្ញង់ ដូចទើបជាង២០ក្រាស់បើទោះជាកន្លងមកធ្លាប់លេចឭថានាងបានកែសម្រស់ផ្នែកខ្លះនិងរឹតបណ្ដឹងស្បែកមុខឲ្យក្មេងជាងវ័យយ៉ាងទៀងទាត់ក្ដី។សុផាវណ្ណ ឬនិសា ដែលលែងប្ដីអាណិកជនខ្មែរមកពីអាមេរិកលោកគាំ វ៉ារី កាលពីឆ្នាំ២០០៩ ទាំងចម្រូងចម្រាសធ្វើឲ្យនាងធ្លាក់ខ្លួនមេម៉ាយអស់១៣ឆ្នាំមកនេះត្រូវបានគេចាត់ទុកថានាងជាតារាម្នាក់ដែលរក្សារបានទីផ្សារសិល្បៈល្អក្រោយលែងប្ដី គឺដូចគ្នាទៅនិងអ្នកមេម៉ាយមួយចំនួនទៀតនៅក្នុងសិល្បៈមាននាងពេជ្រ សោភា ,សុខ សោម៉ាវត្តី និងសុខ ស្រីនាង ជាដើមដែលហាងឆេងរបស់ពួកគេមិនស្រុតចុះព្រោះតែលែងប្ដីនោះទេ។ចំពោះកែវ និសា វិញក្រោយក្លាយជាមេម៉ាយដ៍មានមន្ដស្នេហ៍ជាង១០ឆ្នាំមកនេះនាងបានសាងស្នេហ៍ជាមួយតារាគ្មានសក់លោកសាន ផានិត ហើយក្រោយប្រេះឆាគ្នានាងបានផ្សារភ្ជាប់ស្នេហ៍ប្រុសក្មេងលឹម ជាឡាយ រហូតមានដំណឹងថាអ្នកទាំង២ចង់រៀបការជាមួយគ្នាទៀត។
ប៉ុន្ដែគូរឲ្យស្ដាយនិសា នៅតែដើរជាន់ដានស្នេហ៍ចាស់ដោយចែកផ្លូវជាមួយជាឡាយ ខណៈដែលប្រុសរូបសង្ហារនេះងាកទៅស្អិតល្មូតជាមួយស្រីស្រស់គៀត សុវណ្ណាឡាង ភ្លាមៗតែម្ដង។អ្វីដែលគូរឲ្យកត់សម្គាល់ទោះជាពេលនេះនិសា អស់និស្ស័យស្នេហ៍សាន ផានិត មែនប៉ុន្ដែរយៈពេលជាង៨ឆ្នាំមកនេះថ្វីត្បិតលោកផានិត មានប្រពន្ធថ្មីនិងមានកូន២នាក់ទៀតក្ដី តែលោកនៅតែអាល័យក្លិននិសា ដដែលតាមរយៈការរក្សាររូបសាក់ឈ្មោះនិសា (Nisa)លើដើមទ្រួងរហូតមកដល់ពេលនេះ ខណៈដែលកាលពីឆ្នាំ២០១៧ លោកចង់រំលាយរូបសាក់នេះដែរ តែត្រូវបានអ្នកនាងចេវ សោភា ជាភរិយាថ្មីហាមឃាត់ទើបធ្វើឲ្យអ្នកចម្រៀងគ្មានសក់១សសៃរូបនេះនៅតែជាប់ឈ្មោះសង្សារចាស់របស់ខ្លួនលើដើមទ្រួងរហូតមក។យ៉ាងណាសម្រាប់និសា គ្មានផ្លូវដែលនាងអាចនៅស្រណោះសាន ផានិត ដូចម្ចាស់បទ”ទូរស័ព្ទប្រាប់ផង “រូបនេះអាល័យនាងនោះឡើយព្រោះថាពេលនេះនាងមានជម្រើសស្នេហ៍ច្រើនហើយប្រុសៗដែលចាំត្រងស្នេហ៍នាងនោះគឺសុទ្ធ តែជាប្រុសមានទ្រព្យស្ដុកតែម្ដង។
វង្ស សុផាវណ្ណហៅ កែវ និសា ត្រូវបានគេកត់សម្គាល់ថានាងមានទ្រព្យច្រើនក្រោយក្លាយទៅជាអ្នកមេម៉ាយសម្រស់កាន់តែគូរឲ្យក្នក់ក្នាញ់នេះដោយតាមព័តមានថាក្រៅពីមានផ្ទះវីឡារនៅខាងក្រោយស្ថានទូតបារាំងដែលបានមកពីឈ្នះក្ដីអតីតប្ដីលោកគាំ វ៉ារី នោះនាងមានផ្ទះផ្សេងៗទៀតផងដែរ។និសា ដែលពីមុនធ្លាប់តែជិះរថយន្ដជាមួយមិត្តភក្ដិនោះពេលនេះនាងមានឡានទំនើប២គ្រឿងផ្ទាល់ខ្លួនជិះឆ្លាស់គ្នាគឺLand CruiserV8 និងAlphard ដោយមានពេលខ្លះគេឃើញនាងមានអ្នកបើកជូនទៀតផង។
យ៉ាងណាក្រោយចែកផ្លូវគ្នាជាមួយលឹម ជាឡាយ មកនិសា មិនដែលបណ្ដើរប្រុសណាជាចំហនោះទេគឺលាក់ស្នេហ៍ថ្មីជិតឈឹង ខណៈដែលមុននេះលេចឭថាអ្នកមេម៉ាយល្បីមានកូនស្រី១រូបនេះមានលោកឧកញ៉ាម្នាក់ និងមន្រ្ដីយោធា ម្នាក់ទៀតតាមប្រជែងគ្នាស្នេហានាងតំណាលគ្នា។ប៉ុន្ដែអ្នកនាងសុផាវណ្ណ មិនដែលចេញមុខបំភ្លឺរឿងស្នេហានេះទេហើយកន្លងមកនាងធ្លាប់វាចារថាមិនចូលចិត្តសម្ភាសន៍ជាមួយអ្នកកាសែតឡើយ។តែមុនផ្ទុះកូវីដគេឃើញនិសា ច្រើនតែទៅដើរលេងនៅបរទេសជាញឹកញាប់ហើយនាងទិញអ៊ឺវ៉ាន់ម៉ាកប្រេនប្រេន មិនចាញ់ជំទាវនោះទេ។គេចាំមើលថាតើពេលណាទើបនិសា អាចបង្ហាញស្នេហ៍ថ្មីជាចំហ ខណៈដែលពេលនេះអតីតស្វាមីនាងលោកគាំ វ៉ារី ការប្រពន្ធថ្មីជាអ្នកគ្រូពេទ្យក្រមុំចោលនាង១០ឆ្នាំទៅហើយ ស្រពេលដែលសាន ផានិត និងលឹម ជាឡាយ ពេលនេះក៍មានគូស្នេហ៍រៀងៗខ្លួនដែរ។
តាមព័តមានថាបើសិនជាកែវ និសា ចង់បានតំណែងជំទាវនោះវាមិនពិបាកឡើយសម្រាប់រូបនាងព្រោះបុរសដែលចង់ចូលខ្លួនមកស្អំរបួសបេះដូងនាងភាគច្រើនជាអ្នកធំ ។ប៉ុន្ដែសំណួរដែលមហាជនចង់ដឹងថាតើអ្នកនាងសុផាវណ្ណ នឹងក្លាយជាជំទាវដោយបើកមុខជាចំហ ឬគេចមិនផុតពីងារជំទាវលាក់មុខ?