ភ្នំពេញ៖រយៈពេលជាង២ឆ្នាំហើយដែលទីផ្សារចម្រៀងរបស់តារាស្រី២ដួងឈានមុខគេគឺមាស សុខសោភា និងឱក សុគន្ធកញ្ញា ហាក់នៅជាប់គាំងដូចគ្នាព្រោះតែកូវីដទើបទាំងសោភា និងកញ្ញា មិនហ៊ានចេញបទចម្រៀងបុកនៅលើទីផ្សារ ហើយម្នាក់ៗរាងរយាលៗពីឆាកតន្រ្ដីនិងងាកទៅរកស៊ីមុខរបរក្រៅសិល្បៈរៀងៗខ្លួន ខណៈដែលសុខសោភា បានរៀបប្ដីអាណិកជនខ្មែរមកពីកាណាដាលោកអ៊ឹត រ៉ាដា ១២ឆ្នាំមិនទាន់មានកូន១គ្រាប់ តែសុគន្ធកញ្ញា រៀបការជាមួយលោកអ៊ឹង សុខលី ជាង២ឆ្នាំមានកូន១។យ៉ាងណាសម្រាប់ឆ្នាំ២០២២នេះទាំងមាស សុខសោភា និងឱក សុគន្ធកញ្ញា មិននៅស្ងៀមទៀតនោះទេព្រោះថាតារាទាំង២ដួងចាប់ផ្ដើមចេញវាយលុកទីផ្សារចម្រៀងព្រមគ្នាតែម្ដងដែលមើលទៅការប្រកួតប្រជែងអាចជាការស្វិតស្វាញសារជាថ្មីបើទោះជាពេលនេះតារាទាំង២ដួងមិនទាន់មានបទផ្ទុះដូចគ្នាក្ដី។សុខសោភា ធ្លាប់ប្រកាសហាក់ព្រមានតារាទាំងឡាយទុកជាមុនថានៅឆ្នាំ២០២២ នេះនាងនឹងបញ្ចេញអ្វីមិនធ្លាប់មានពីមុនមកសោះក្នុងអាជីពចម្រៀងឲ្យអ្នកគាំទ្រគ្រប់គ្នាបានឃើញពីនាង ដែលការតាំងចិត្តបែបនេះមានន័យថានាងលែងបន្ធូដៃឬដល់ពេលវេលាដែលនាងត្រូវលេងមែនទែនហើយ។ចំណែកសុគន្ធកញ្ញា ដែលត្រូវគេមើលឃើញថាទីផ្សារចម្រៀងរបស់នាងហាក់មានការប្រែប្រួលឬអ្នកខ្លះថាចុះខ្សោយជាងមុននោះមិននិយាយច្រើនឡើយតែមុននេះនាងធ្វើឲ្យមនុស្សមិនតិចនាក់ទេ ព្រឺសំបុរខ្ញាកៗដោយសារតែនាងព្រោះតែប្អូនថ្លៃលោកថៅកែហង្សមាសរូបនេះហ៊ានលេងឈុតស្រលាញ់ស្រីដូចគ្នាជាមួយសុខ ស្រីនាង ។
សំណួរដែលមហាជនលើកឡើងថាបើមិនមែនចង់ឲ្យទីផ្សារចម្រៀងមានការប្រែប្រួលទេ តើហេតុអ្វីបានជាសុខៗសុគន្ធកញ្ញា ហ៊ានលេងបែបនេះ?អ្វីដែលគូរឲ្យកត់សម្គាល់ពេលនេះសុគន្ធកញ្ញា ក៍ត្រៀមចេញមុខធ្វើជាគណៈកម្មារការកម្មវិធីប្រលងចម្រៀងCambodian Idol រដូវកាលទី៤ផងដែរ ដែលការចេញមុខជាថ្មីក្រោយបាត់២ឆ្នាំនេះមានន័យថានឹងអាចជួយឲ្យនាងកាន់តែល្បីបន្ថែមពីលើអាជីពចម្រៀងមួយក្រឺតថែមទៀតជាមិនខាន ខណៈដែលនៅសល់កម្មវិធី៣ថែមទៀតដែលនាងត្រៀមបង្ហាញខ្លួននៅឆ្នាំ២០២ នេះដែរក្នុងនាមជាCoach និងJudge គឺThe Voice Cambodia ,The Voice Kids Cambodia និងX Factor Cambodia ដែលបណ្ដារកមក្មវិធីខាងលើនេះសុទ្ធសឹងនៅក្រោមការគ្រប់គ្រងរបស់ស្វាមីនាងទាំងអស់។
គូរបញ្ជាក់ថាឱក សុគន្ធកញ្ញា និងមាស សុខសោភា ធ្លាប់ប្រជែងទីផ្សារចម្រៀងគ្នាយ៉ាងស្វិតស្វាញបំផុតរយៈពេលជាង១០ឆ្នាំមកហើយដែលត្រូវបានមជ្ឈដ្ឋានមហាជនលើកឡើងថាសុគន្ធកញ្ញា ហាក់មានប្រៀបជាងព្រោះនាងឈនៅផលិតកម្មធំជាងសុខសោភា ។តែអ្នកជំនាញសិល្បៈលោកមិញ សុធីវណ្ណ ធ្លាប់អះអាងថាលោកយល់ថាសុខសោភា លើសុគន្ធកញ្ញា បន្ដិច ខណៈដែលអតីតតារាហង្សមាសលោកនូ ស៊ឹប ធ្លាប់ប្រាប់ថាសុខសោភា ជាតារាដែលផលិតកម្មណាក៍ចង់បានរូបនាងដែរ តែសុគន្ធកញ្ញា ច្រៀងរាងត្បៀតៗបន្ដិច…។
គូរកត់សម្គាល់ដែរថាមាស សុខសោភា-ឱក សុគន្ធកញ្ញា ធ្លាប់ច្រៀងរួមគ្នានៅផលិតកម្មរស្មីស្ទឹងសង្កែរ និងU2 តែរយៈពេលជាង១០ឆ្នាំចុងក្រោយនេះពួកគេទាំង២នាក់ច្រៀងនៅផលិតកម្មផ្សេងគ្នារហូត។សុខសោភា ធ្លាប់វ៉ាសុគន្ធកញ្ញា តែម្ដងគត់អំឡុងពេលនាងច្រៀងនៅផលិតកម្មM កាលពីឆ្នាំ២០០៨ តែក្រោយមកត្រូវសុគន្ធកញ្ញា យកប្រៀបជាងជានិច្ច។សុគន្ធកញ្ញា ធ្លាប់និយាយប្រាប់អ្នកយកព័តមានយើងថា”មនុស្ស២នាក់មិនអាចដូចគ្នា”ទេ។ តាមព័តមានថាមាស សុខសោភា ស្ទើតែបានរួមទ្រនុំជាមួយឱក សុគន្ធកញ្ញា ជាលើកទី៣ទៅហើយនៅហង្សមាសនៅឆ្នាំ២០២០តែការចរចារត្រូវបានបរាជ័យទើបសោភា ទៅជ្រកនៅរាម។ថ្វីត្បិតតែទីផ្សារចម្រៀងរបស់សុខសោភា និងសុគន្ធកញ្ញា ហាក់មានការប្រកួតប្រជែងគ្នាខ្លាំងក្លាមែន ប៉ុន្ដែតារាទាំងពីររាប់អាននិងស្រលាញ់គ្នាណាស់មិនដែលកាច់កុងគ្នាម្ដងណាឡើយ។សុខសោភា ធ្លាប់និយាយថាមិត្តភក្ដិរបស់នាងនៅហង្សមាសចង់ឲ្យនាងទៅច្រៀងនៅទីនោះជាមួយពួកគេ តែការចរចារបរាជ័យជាមួយផលិតកម្ម ហើយសម្រាប់រូបនាងគិតថាសម័យនេះទោះជាច្រៀងដោយគ្មានផលិតកម្មក៍នៅតែល្បីដែរ។សុខសោភា ទទួលស្គាល់ថានាងទៅរាម គឺដើម្បីច្រៀងផងរកស៊ីផងមែន៕