ភ្នំពេញ៖តារាចម្រៀងសាន់ដេឆាយ ចាន់ឆោម ហៅឆាយ វីរៈយុទ្ធ ធ្លាប់លេចឭថាជាមុខសញ្ញានៃការចង់បានរបស់ផលិតកម្មរស្មីហង្សមាសជាយូឆ្នាំមកហើយព្រោះថាលោកឆោម មានលក្ខណៈពិសេសជាងតារាដ៍ទៃទៀតដោយសារតែអាចច្រៀង”ខ្ពស់ក៍បាន ទាបក៍បាន “ទើបធ្វើឲ្យហង្សមាសនៅតែត្រូវការបើទោះជាផលិតកម្មធំនេះមានតារាឡើងគជើងគ្នាក្ដី។ប៉ុន្ដែទីបំផុតលោកវីរៈយុទ្ធ នៅតែមិនទាន់ចូលហង្សមាសដដែលដោយមានការលើកឡើងពីអ្នកជំនាញសិល្បៈថារឿងដែលលោកចាន់ឆោម ពន្យាពេលចូលហង្សមាសនាពេលកន្លងមកនោះដោយសារតែលោកមិនចង់ទៅប្រជែងជាមួយលោកព្រាប សុវត្ថិ ព្រោះលោកត្រូវជាក្មួយសាច់ថ្លៃរបស់លោកសុវត្ថិ (ព្រាប សុវត្ថិ ជាឪពុកមាររបស់ភរិយា(ប្រពន្ធមុន)វីរៈយុទ្ធ)។តែក្រោយព្រាប សុវត្ថិ ដើរចេញពីហង្សមាសជាង១ឆ្នាំទៅជ្រកនៅGalaxy នោះមានព័តមានថាលោកឆោម អាចនឹងទៅហង្សមាសដូចអតីតតារាសាន់ដេឱក សុគន្ធកញ្ញា,សុខ ស្រីនាង ,នីកូ និងខេមរៈ សិរីមន្ដ ដែរជាមិនខាន។
លោកឆាយ វីរៈយុទ្ធ ទូរស័ព្ទមិនចូលទេកាលពីថ្ងៃទី៣ខែមីនា ទើបមិនអាចសុំការបំភ្លឺរឿងនេះបាន។ដោយឡែកលេខមួយខ្សែទៀតដែលភរិយាលោកអ្នកនាងសែ ចាន់ឌី កាន់នោះតេចូលតែគ្មានអ្នកលើកឡើយ។យ៉ាងណាក្នុងជំនួបផ្ទាល់កន្លងមកវីរៈយុទ្ធ ធ្លាប់អះអាងថាលោកនៅមានកុងត្រាជាមួយសាន់ដេ នឹងមានការងារជាច្រើនទៀតត្រូវធ្វើជាមួយផលិតកម្ម។
អ្នកជំនាញធ្វើភ្លេង(Composer)ម្នាក់នៅហង្សមាសបានថ្លែងដោយសុំមិនឲ្យដាក់ឈ្មោះថាសម្រាប់ឆ្នាំ២០២២ នេះឱកាសដែលឆាយ វីរៈយុទ្ធ អាចនឹងទៅចូលរួមជាមួយហង្សមាសគឺមានត្រឹមតែ៣០%ប៉ុណ្ណោះ។លោកថាវីរៈយុទ្ធ ពិតជាហង្សមាសចង់បានមែន បើអ្នកថាហង្សមាសមិនត្រូវការវីរៈយុទ្ធ គឺខុសហើយ។គ្រូភ្លេងរូបនោះបន្ថែមថារឿងដែលវីរៈយុទ្ធ អាចមានផ្លូវទៅហង្សមាសនោះដោយសារតែព្រាប សុវត្ថិ មិននៅជារឿងសំខាន់មួយ តែរឿងដែលធំនោះគឺហង្សមាសក្ដាប់Concerts ធំៗទាំងអស់អីចឹងចង់ឬមិនចង់តារាដែលនៅខាងក្រៅហង្សមាសគឺពិបាកគេចហង្សមាសណាស់។
រឿងដែលអាចទៅរួចថាឆាយ វីរៈយុទ្ធ នឹងក្លាយទៅជាសមាជិករបស់ហង្សមាសនាពេលខាងមុខនេះ បន្ទាប់ពីទស្សនិកជនមើលឃើញថាបទចម្រៀងរបស់លោកឆោម ត្រូវបានបេក្ខភាពជាច្រើនបានយកទៅច្រៀងក្នុងកម្មវិធីប្រលងចម្រៀងធំៗទាំងអស់របស់ហង្សមាស ពិសេសថ្មីៗនេះកម្មវិធីBeat The Best ទើបធ្វើឲ្យថ្នាក់ដឹកនាំរបស់ហង្សមាសកាន់តែចាប់អារម្មណ៍វីរៈយុទ្ធ ថែមទៀត។ចំពោះមជ្ឈដ្ឋានមហាជនមើលឃើញថាប្រសិនបើវីរៈយុទ្ធ ចូលហង្សមាសមែន ច្បាស់ជាតារារូបនេះត្រូវប្រកួតប្រជែងទីផ្សារចម្រៀងសារជាថ្មីជាមួយលោកឧកញ៉ាខែម ប៊ុនថៃ ជាមិនខាន ខណៈអំឡុងដែលពួកគេនៅសាន់ដេជាមួយគ្នានោះគេមើលឃើញថាតារាទាំង២មានសន្ទុះប្រហាក់ប្រហែលគ្នា។
សូមបញ្ជាក់ថាឆាយ វីរៈយុទ្ធ ក្រោយប្រេះឆាស្នេហ៍ចាស់លោកបានរៀបការជាមួយកូនសេដ្ឋីនៅក្រុងកំពង់ចាមលោកហាក់ សែ គឺអ្នកនាងសែ ចាន់ឌី កាលពីថ្ងៃទី២១ខែឧសភាឆ្នាំ២០១៧ ដែលពេលនេះទទួលបានចំណងដៃកូនស្រី១អាយុជាង២ឆ្នាំ។លោកចាន់ឆោម ក្រោយមានភរិយាថ្មីបានឈានជើងចូលវិស័យជំនួញអចលនទ្រព្យដូចលោកព្រាប សុវត្ថិ និងខេមរៈ សិរីមន្ដ ដែរ ខណៈដែលភរិយាលោកជាកូនពៅរបស់អ្នកជំនួញធំនោះត្រូវបានគេប្រមាណថានាងមានទ្រព្យរាប់លានដុល្លារនៅក្នុងដីធ្លី ហេតុនេះហើយគេជឿរថាមិនយូទេលោកឆាយ ចាន់ឆោម នឹងក្លាយទៅជាឧកញ៉ាដូចលោកខែម ប៊ុនថៃ ជាមិនខាន៕
