ភ្នំពេញ៖ដាញ់ ម៉ូនីកា ដែលបាត់មុខពីក្នុងស្រុកជាង១០ឆ្នាំ ក្រោយចេញទៅរស់នៅអូស្រ្ដាលីជាមួយប្ដី នោះពេលនេះនាងចាប់ផ្ដើមងាកមករកស៊ីក្នុងស្រុកខាងផ្នែកCosmetics ហើយតាមដំណឹងថាម៉ូនីកា គ្រោងនាំប្ដីចុះមកស្រុកខ្មែរឲ្យបានកាន់តែញឹកញាប់ជាមុនទៀតផងក្រោយពួកគេចាប់ដៃគ្នាជាង១ទសវត្សន៍បានកូន២។យ៉ាងណាការរកស៊ីផ្នែកមួយនេះមិនមែនជារឿងងាយស្រួលឡើយសម្រាប់ម៉ូនីកា ព្រោះថាពេលនេះមានតារាល្បីៗជាច្រើនបានដើរមួយជំហ៊ានមុននាងទៅហើយ។
កែវ ពេជ្រពិសី ដែលជាអ្នកស្និតបំផុតជាមួយដាញ់ ម៉ូនីកា ហើយបានទៅទទួលតារាកូន២រូបនេះពេលចុះពីព្រលានយន្ដហោះកាលពីថ្ងៃទី១៩ខែកុម្ភៈ នោះបានឲ្យដឹងថាតាមនាងដឹងម៉ូនីកា មកស្រុកខ្មែរលើកនេះរយៈពេល១ខែទើបវិលទៅអូស្រា្ដលីវិញ។ពេជ្រពិសី បន្ថែមថានាងមិនដឹងគ្រប់យ៉ាងថាម៉ូនីកា មកលើកនេះធ្វើអ្វីខ្លះទេ តែក្នុងចំណោមនោះគឺមានការផ្សព្វផ្សាយផ្នែកCosmetics នោះដែរព្រោះនៅថ្ងៃទី៦មីនា ម៉ូនីកា បានធ្វើកម្មវិធីធំហើយមានរូបនាងនិងតារាល្បីៗជាច្រើនដួងទៀតចូលរួម។ពេជ្រពិសី បានឲ្យដឹងទៀតថាទោះជានាងបែកម៉ូនីកា យូមែនតែការទំនាក់ទំនងគ្នាគឺជាប្រចាំហើយពេលបានជួបគ្នាផ្ទាល់វិញនេះទើបតែបានដើរកម្សាន្ដជាមួយគ្នានៅជិតៗក្រុងមិនទាន់បានដើរលេងនៅកន្លែងឆ្ងាយៗនោះទេ។
ទោះជាដាញ់ ម៉ូនីកា មកជើងនេះបានយូជាងលើកមុនៗក្ដី ប៉ុន្ដែមិនមានដំណឹងថានាងអាចឆ្លៀតថតសម្ដែងភាពយន្ដឡើងវិញដូចសារ៉ាយ សក្កណា ដែលឲ្យតែមកពីអាមេរិកលេងស្រុកនាងតែងតែឆ្លៀតថតរឿងថ្មីនិងស្ពតនោះទេ។អ្វីដែលគូរឲ្យកត់សម្គាល់នោះដាញ់ ម៉ូនីកា ទោះជាមានវ័យច្រើននិងប្រែប្រួលរូបសម្រស់ខ្លះក្រោយមានស្វាមីនិងកូន២នាក់មែន តែនាងមិនឡើងគីឡូឬធាត់ជ្រុលដូចតារាមួយចំនួនមានប្ដីមើលទៅបែកសាច់គ្រប់គ្នានោះឡើយ ។រឹតតែធ្វើឲ្យគ្រប់គ្នានឹកស្មានមិនដល់ន៉ម៉ូនីកា ដែលក្រោយយកប្ដីអាណិជនខ្មែរនៅអូស្រា្ដលីលោកប៊ុន ថែល ដែលល្បីថាកាចធ្វើឲ្យគេថានាងប្រាកដជាពិបាករក្សារចំណងស្នេហានោះ បែជាពេលនេះនាងរស់នៅយ៉ាងសុខសាន្ដត្រាន្ដ ហើយទទួលបានចំណងដៃកូន២នាក់(ស្រី១)ទៅហើយ។នាងជាតារាដែលជ្រើសស្នេហ៍ជាបុរសខ្មែរអូស្រា្ដលីដូចគ្នាទៅនិងកែវ ពេជ្រពិសី,អឿន ដាលីស,សុខ ច័ន្ទណានូ និងគឹម លីហ្សា ជាដើម តែពេជ្រពិសី និងលីហ្សា បានចែកផ្លូវជាមួយគូស្នេហ៍ចាស់ដូចគ្នា។ដោយឡែកសម្រាប់ម៉ូនីកា វិញនាងមានផ្ទះនៅអូស្រា្ដលី និងជិះរថយន្ដទំនើបៗដូចជាLexus Lx 570 និងMercedes ជាដើម។យ៉ាងណាការនាំប្ដីមករកស៊ីធំនៅស្រុករបស់ម៉ូនីកា នៅពេលនេះបញ្ជាក់ថាអនាគតនាងអាចនឹងវិលមករស់នៅស្រុកកំណើតជាមិនខានឡើយ។
គូរំលឹកថាដាញ់ ម៉ូនីកា បានរៀបការជាមួយលោកប៊ុន ថែល កាលពីថ្ងៃទី២៤ខែកុម្ភៈឆ្នាំ២០១០ ដែលពេលនេះកូនស្រីច្បងរបស់នាងមានអាយុជាង១០ឆ្នាំ និងកូនប្រុសអាយុជាង៦ឆ្នាំ។ការមកដល់ស្រុកសារជាថ្មីនេះម៉ូនីកា បង្ហាញអារម្មណ៍នៅតែស្រលាញ់ឈុតបុរាណរបស់ខ្មែរ ហើយនាងក៍ចាប់អារម្មណ៍ទៅលើការអភិវឌ្ឍន៍របស់ខ្មែរនូវអគារខ្ពស់ៗជាបន្ដបន្ទាប់ផងដែរ។រឿងដែលធ្វើម៉ូនីកា កាន់តែរីករាយថែមទៀតនោះគឺនាងនៅតែត្រូវបានទស្សនិកជនចងចាំឈ្មោះនាងច្បាស់ទើបពេលនេះនាង ហ៊ានបោះទុនរកស៊ីធំ តែគេមិនដឹងថាជំហ៊ានដំបូងនេះតារាស្រអែមស្រស់ប្រើទឹកទុនអស់ប៉ុន្មានឡើយ ខណៈដែលនាងត្រូវវិលទៅអូស្រា្ដលីវិញនៅចុងខែ៣ខាងមុខនេះហើយ៕