ភ្នំពេញ៖កាលពីខែមិថុនាឆ្នាំ២០២១ តារាចម្រៀងតូចច្រឡឹងនាងតន់ ច័ន្ទសីម៉ា ត្រូវបានអ្នកគ្រប់គ្រងGalaxy លោកយឹម តាស្រង់ ប្រកាសថាសីម៉ា ចេញច្រៀងកម្មវិធីធំ១ស៊ីថ្លៃ៥០០០ដុល្លារ ខណៈដែលការថតស្ពតចំណាយពេលពី១ទៅ២ថ្ងៃថ្លៃ២០០០០ដុល្លារ ដែលទាំងតម្លៃខ្លួនច្រៀងសម្ដែងនិងស្ពតនោះត្រូវបានគេចាត់ទុកសីម៉ា ថាថ្លៃដាច់គេក្នុងចំណោមតារាល្បីៗនៅខ្មែរ។តែថ្មីៗនេះសីម៉ា បានធ្លាក់មកលេខរៀបលំដាប់ទី២វិញក្រោយតារាចម្រៀងលោកឧកញ៉ាខែម ប៊ុនថៃ បានបញ្ចេញវីដេអូ១ដោយអះអាងថាលោកច្រៀង៦បទបានតម្លៃខ្លួន១០០០០ដុល្លារ។ ការប្រកាសរបស់លោកឧកញ៉ាប៊ុនថៃ នេះធ្វើឲ្យពិភពសិល្បៈមានភាពច្របូកច្របល់ទាំងតារាសម្ដែងនិងតារាចម្រៀងរួមអាជីព រួមទាំងអ្នកដឹកនាំប្រគុំតន្រ្ដីធំៗទាំងឡាយផង ព្រោះថាតម្លៃខ្លួនលោកសិរីមន្ដ អាចនឹងគ្មានតារាណា១ហ៊ានបំបែកឯកទត្តកម្មនេះឡើយសម្រាប់តារាខ្មែរ។ប៉ុន្ដែមុននេះលោកតាស្រង់ អ្នកគ្រប់គ្រងGalaxy ថានាងច័ន្ទសីម៉ា ថតស្ពត៣ស៊ីថ្លៃជិត៥០ម៉ឺនដុល្លារឯណ្ណោះ ដែលសូម្បីតែលោកក៍សឹងតែមិនជឿរនោះទេ ដែលចំណុចនេះបញ្ជាក់ថាតម្លៃនាងសីម៉ា មិននៅថេនោះទេពោលគឺកាន់តែប្រែប្រួលទៅតាមពេលវេលា។
អតីតអ្នកស្មូតជាប់លេខ១ប្រចាំខេត្តតាកែវនាងតន់ ច័ន្ទសីម៉ា បានប្រែប្រួលដូចមេឃដី បើប្រៀបធៀបពីមុននិងក្រោយនាងចូលGalaxy នោះព្រោះសីម៉ា ដែលធ្លាប់តែជិះម៉ូតូទៅច្រៀងនៅហាង១ពេលរាត្រីបាន១យប់ត្រឹមជាង១០ដុល្លារ និងនៅបន្ទប់ជួបតូចម្ដុំស្ដុបDN តម្លៃ៦០ដុល្លារ នោះពេលនេះនាងមានផ្ទះ និងរថយន្ដផ្ទាល់ខ្លួនជិះ និងស្ថិតក្នុងចំណោមតារាចម្រៀងផ្នែកយុវវ័យដែលមានប្រៀបជាងគេនាពេលបច្ចុប្បន្ន។ប៉ុន្ដែតម្លៃខ្លួនរបស់នាងច័ន្ទសីម៉ា ខ្ពស់ពេកនោះធ្វើឲ្យអ្នកដឹកនាំកម្មវិធីប្រគុំតន្រ្ដីមួយចំនួនគ្មានលទ្ធភាពហៅនាងច្រៀងនោះទេ ព្រោះថាហៅនាងម្នាក់ស្មើការចំណាយ លើតារាល្បីកម្រិតមធ្យមដល់ទៅ១០នាក់ឯណ្ណោះ។
លោកស៊ិន សិលា អ្នកដឹកនាំកម្មវិធីប្រគំតន្ត្រីរបស់Ctn ធ្លាប់អះអាងថាខាងលោកពិតជាចង់បានតន់ ច័ន្ទសីម៉ា ឡើងកម្មវិធីទូរទស្សន៍តែតម្លៃគាត់ពេលនេះថ្លៃខ្លាំងទើបពិបាកបន្ដិចព្រោះកញ្ចប់ថវិការមានកំណត់។លោកថាច័ន្ទសីម៉ា គូតែចុះថោកជាងនេះបន្ដិចដើម្បីឲ្យខាងទូរទស្សន៍ទាំងឡាយមានលទ្ធភាពហៅនាងច្រៀងផង។
គូរបញ្ជាក់ថាតន់ ច័ន្ទសីម៉ា ជាអតីតបេក្ខភាពThe Voice Cambodia រដូវកាលទី២តែនាងបានធ្លាក់ចេញមិនបានឈានទៅដល់វគ្គផ្ដាច់ព្រ័ត្រឡើយ ខណៈដែលពេលនោះលោកថែល ថៃ បានក្លាយទៅជាម្ចាស់ជ័យលាភី។តែបច្ចុប្បន្នសីម៉ា គឺជាតួឯករបស់Galaxy ហើយក្រោយនាងមានឱកាសបានចាប់ដៃគូជាមួយកំពូលតារាចម្រៀងព្រាប សុវត្ថិ និងខេម មកនាងស្ទុះឡើងកេរ្ដិ៍ឈ្មោះបោះពួយទៅមុខធ្វើឲ្យតារាស្រីមួយចំនួនពិបាកទប់ទល់។អំឡុងពេលឡើងកូដនេះដែរច័ន្ទសីម៉ា ប្រែប្រួលរូបសម្រស់ខ្លាំងរហូតដល់មានការសង្ស័យថានាងបានកែសម្រស់ជាច្រើនផ្នែកទៀតផង។តែច័ន្ទសីម៉ា មានភាពក្លាហានដោយខុសពីតារាមួយចំនួនដែលទោះជាពួកគេបានកែសម្ផស្សយ៉ាងណាក៍មិនទទួលស្គាល់ដែរ ខណៈសីម៉ា សារភាពថានាងពិតជាបានធ្វើច្រមុះ និងចាក់ចង្ការមែន តែផ្នែកផ្សេងៗទៀតនាងមិនបានកែកុននោះទេ។ដោយឡែកទាក់ទងរឿងបេះដូងវិញច័ន្ទសីម៉ា ដែលពេលនេះមានអាយុ២៥ឆ្នាំនោះនាងធ្លាប់ប្រាប់ទៅFan ថានាងមិនទាន់មានគូសង្សារឡើយ។ការវាចាបែបនេះមិនសូវមានគេជឿរជាក់នាងសីម៉ា នោះទេ ព្រោះតែមានព័តមានថានាងបានបង្ហាញភាពស្និតស្នាលជាមួយបុរសពោះម៉ាយម្នាក់នៅក្នុងចង្កោមសិល្បៈ ហេតុនេះហើយគេមានតែរងចាំមើលថាតើសីម៉ា មានទំនាក់ទំនងអ្វីពិសេសជាមួយប្រុសម្នាក់នោះ?