ជាព្រឹត្តិកាណ៏មួយដ៏ជក់ចិត្តសម្រាប់ទស្សនិកជនរបស់ប៉ុស្ដិ៍លេខ៥ កាលពីរាត្រីថ្ងៃទី២៥ ខែវិច្ឆិកា ឆ្នាំ២០១៦ មានការប្រគំតន្រ្ដីធំ ប្រជុំដោយតារាល្បីៗរបស់ព្រះរាជាណាចក្រកម្ពុជា ឡើងប៉ះគ្នាជាមួយតារាមកពីព្រះរាជាណាចក្រថៃ លើឆាកតែមួយ របស់ប៉ុស្ដិ៍លេខ៥ ”ខ្មែរញញឹម Concert” ក្នុងនោះតារាខ្មែរមានដូចជា នាងមាស សុខសោភា របស់ផលិតកម្មថោន និងតារាសាន់ដេ នាងសុខ ស្រីនាង លោកនីកូ ជាដើម។ ចំណែកតារាថៃ គឺជាតារាភាពយន្ដដ៏ល្បីឈ្មោះ នាងPan C ake ដែលមានរូបសម្រស់ដ៏ស្រស់ស្អាតហើយទស្សនិកជនខ្មែរយើងបានស្គាល់នាងច្បាស់ តាមរយៈការទស្សនាភាពយន្ដភាគល្បីៗរបស់នាង នាពេលកន្លងមក។
ក្រុមអ្នកទស្សនាបានប្រជ្រៀតគ្នាមកចូលស្ទូឌីយោរបស់ប៉ុស្ដិ៍លេខ៥ ឡើងណែនឆាក នៅ Tiffy Arena ហើយនីកូ ច្រៀងបើកឆាក។ ចំណែកសុខស្រីនាង ច្រៀងបទ ”គេទៅចោលយើងហើយ”, ”ពេលនេះម៉ោងនេះ អូននឹកបង”, ”សង្សារនិងមិត្តភក្ដិ” និងបទ ”Good bye my love”។
ដោយឡែក តារាភាពយន្ដដ៏ល្បីល្បាញរបស់ព្រះរាជាណាចក្រថៃនាងPan Cake ក៏បានលើកយកបទជាភាសាថៃ ៤បទ មកអង្រួនឆាកតន្រ្ដីផងដែរនាំឲ្យទស្សនិកជនដែលទៅទស្សនាផ្ទាល់មានការហ៊ោ និងរាំលេងពេញឆាកតែម្ដង។
ក្រុមយុវ័យដែលទៅមើលការប្រគំតន្ត្រី ”ខ្មែរញញឹម Concert” បានឲ្យដឹងថាពួកគេស្រលាញ់និងពេញចិត្តនាងPan Cake តាមរយៈការទស្សនារឿងភាគល្បីៗរបស់នាងតាមកញ្ចក់ទូរទស្សន៏ ហើយពេលមកជួបផ្ទាល់ គឺតារារូបនេះពិតជាមានរូបសម្រស់ស្រស់ស្អាតមែន ហើយថែមទាំងរួសរាយរាក់ទាក់ហើយមានភាពស្និតស្នាលជាមួយ Fan របស់នាងទៀតផង ដូចជាការរាំលើឆាកជាមួយក្មេងៗជាដើម។
ទស្សនិកជនកាន់តែរំភើបថែមទៀតនៅពេលដែលនាង Pan Cake ចុះពីលើឆាកភ្លាម ស្រាប់តែតារាល្បីរបស់ផលិតកម្មថោន នាងមាស សុខសោភា ឡើងមកច្រៀងបញ្ចប់ តាមរយៈការលើកយកបទថ្មីមកច្រៀងរាំកក្រើកឆាកតន្រ្ដីតែម្ដង ដូចជាបទ ”ឆក់”, ”មានៈ”, ”I am a Single” ជាដើម។ មាស សុខសោភា កាន់តែមានក្បាច់រាំសាហាវជាងមុនជាមួយក្រុមរាំអមនាង សុទ្ធតែជាស្រីៗដល់ទៅ៦នាក់ឯណោះ មើលទៅក្បាច់រាំសោភា នាពេលនេះ គឺមិនចាញ់តារាល្បីៗដទៃទៀតឡើយ។
អ្នកតំណាងការប្រគំតន្រ្ដីប៉ុស្ដិ៍លេខ៥ បានឲ្យដឹងថា ជារៀងរាល់ចុង ឬដើមខែនីមួយៗ ស្ថានីយប៉ុស្ដិ៍លេខ៥ តែងតែនាំយកទស្សនីយភាពប្លែកៗខុសពីប៉ុស្ដិ៍ដទៃ មកបង្ហាញឲ្យបងប្អូនបានសប្បាយរីករាយ តាមរយៈការអញ្ជើញតារាល្បីៗរបស់កម្ពុជានិងថៃ មកឡើងឆាកតន្រ្ដី ”ខ្មែរញញឹមConcert” តែមួយ ដើម្បីឲ្យទស្សនិកជនបានទស្សនាដោយរីករាយ យើងមិនបានគិតទៅលើការចំណាយអស់ថវិកាច្រើនឡើយ។ សម្រាប់ពេលឆាប់ៗនេះ បងប្អូននឹងកាន់តែសប្បាយរីករាយថែមទៀតជាមិនខាន ព្រោះយើងនឹងបង្កើនការប្រគំតន្រ្ដីឲ្យបានកាន់តែច្រើនជាងនេះថែមទៀតដើម្បីតម្រូវតាមការសំណូមពររបស់អ្នកគាំទ្ររប៉ុស្ដិ៍លេខ៥ ហើយក្រុមការងារយើងសង្ឃឹមយ៉ាងមុតមាំថា ទស្សនិកជននឹងនៅតែមកផ្ដល់ជាកំលាំងចិត្តដល់តារាសិល្បករទាំងខ្មែរនិងថៃ ឲ្យបានច្រើនកុះករជាមិនខាន ដើម្បីឲ្យកម្មវិធីយើងបន្តដំណើរការរលូនតទៅទៀត៕