ភ្នំពេញ៖យុគ ចិន្ដា បានលុបចោលគម្រោងធ្វើកូនក្រមុំកាលពីថ្ងៃទី២៣ខែមីនាឆ្នាំ២០២២ ដោយជំនួយការរបស់នាងលោកជីមមី អះអាងថាហេតុផលសំខាន់មានតែមួយគត់នោះគឺដោយសារតែស្ថានភាពកូវីដ មិនទាន់ស្ងប់ស្ងាត់ទាំងស្រុងក្រោយផ្ទុះអូមីក្រុង ទើបធ្វើឲ្យពិធីការិនីជើងចាស់រូបនេះសម្រេចចិត្តឆាចោលមង្គលការរបស់ខ្លួនយ៉ាងទាន់ហន់បែបនេះ។យ៉ាងណានៅពេលនេះទោះជាស្ថានភាពកូវីដ ហាក់ថមថយខ្លាំងហើយមានតារាមួយចំនួនបានរៀបការតាមគម្រោងអស់ទៅហើយក្ដី ប៉ុន្ដែអ្នកនាងចិន្ដា មិនប្ដូរចិត្តនោះទេពោលគឺនាងនៅតែមិនទាន់កំណត់រឿងរៀបការជាលើកទី២ដដែល ខណៈដែលប្រាក់កក់ចុងភៅ សម្អាងការនិងផ្កាភ្ញីទាំងឡាយអ្នកនាងសុខចិត្តខាតបង់ទាំងអស់ដោយគ្មានស្ដាយស្រណោះ។
លោកជីមមី បន្ថែមថារឿងទាំងនោះ(លុយ)អត់បញ្ហាទេ តែសំខាន់អ្នកនាងចិន្ដា មានចិត្តមួយថាចង់រៀបការបែបធំដុំ អីចឹងភ្ញៀវទាំងអស់ដែលមកការនាងគឺអារម្មណ៍សប្បាយរីករាយទាំងអស់គ្នា មិនមែនមកការហើយបារម្ភរឿងហានីភ័យខ្លាចឆ្លងកូវីដទៅផ្ទះវិញនោះទេ។ជំនួយការរបស់អ្នកនាងចិន្ដា រូបនោះនៅតែជឿរថាទោះជាពេលនេះ កូវីសស្ងាត់បន្ដិចក្ដី តែមេលោក(អ្នកនាងចិន្ដា)មិនប្រថុយរៀបការនៅចុងឆ្នាំ២០២២ ដែលជារដូវធ្លាក់ភ្លៀងចូលមកដល់នោះទេ ប៉ុន្ដែលោកប្រាកដក្នុងចិត្តថាពិធីការិនីរូបនេះនឹងអាចគិតគូរឿងរៀបការជាថ្មីនៅដើមឆ្នាំ២០២៣ ដែលពេលនោះកូវីដ អាចនឹងកាន់តែថមថយខ្លាំងជាងពេលនេះថែមទៀតជាមិនខាន។
ជុំវិញការលុបចោលមង្គលការជាបន្ទាន់របស់អ្នកនាងយុគ ចិន្ដា នេះបើទោះជាជំនួយការរបស់នាងអះអាងពីមូលហេតុដោយសារតែកូវីដតែមួយមុខក្ដី ប៉ុន្ដែធ្វើឲ្យទស្សនិកជនមួយចំនួនគិតថាដោយសារតែពិធីការិនីជើងចាស់រូបនេះមិនទាន់មានភាពច្បាស់លាស់ជាមួយគូស្នេហ៍ច្រើនជាង ទើបសុខចិត្តខាតលុយកក់ទាំងឡាយបែបនេះ។តែ assistant របស់អ្នកនាងចិន្ដា នៅតែបញ្ជាក់ថាអ្នកនាងចិន្ដា និងគូស្នេហ៍មានការចុះសម្រុងនិងយល់ចិត្តគ្នាច្បាស់លាស់អស់ទៅហើយ ហេតុនេះហើយគ្មានអ្វីប្រែប្រួលច្រើននោះទេ ពោលគឺឲ្យតែស្ងាត់កូវីដហើយអ្នកទាំងពីរប្រាកដជានឹងរៀបការជាមួយគ្នាជាមិនខាន។
គេកត់សម្គាល់ថាអំឡុងពេលដែលអ្នកនាងយុគ ចិន្ដា បានខកខានគ្រងឈុតកូនក្រមុំព្រោះកូវីដនេះតារាមួយចំនួនទៀតបានប្រថុយរៀបការមានដូចជាមូល សារ៉ាវ៉ាន់,វីរៈ និច្ច ,វ៉ាន់ នីឡា និងទឹម រដ្ឋា ជាដើម។ចំពោះអ្នកនាងចិន្ដា វិញក្រោយបរាជ័យមង្គលការនោះគេសង្កេតឃើញនាងងាកទៅរកស៊ីអចលនទ្រព្យបន្ថែមពីលើអាជីពសិល្បៈ ទើបធ្វើឲ្យនាងនៅតែត្រូវបានគេគិតថាជាតារាផ្ដោតទៅលើការធ្វើជំនួញធំជាងស្នេហាដដែល។ប៉ុន្ដែមិត្តភក្ដិនៅជុំវិញខ្លួនអ្នកនាងចិន្ដា ពួកគេសុទ្ធតែជម្រុញឲ្យពិធីការិនីរូបនេះគូរតែគិតគូរឿងរៀបមង្គលការឲ្យបានច្បាស់លាស់ជាងនេះព្រោះថាពេលនេះនាងឈានចូលវ័យ៤៧ឆ្នាំទៅហើយ ហេតុនេះបើពន្យាពេលឬលុបចោលមង្គលការក្រោយៗទៀតនោះអាចថា១ជីវិតនេះនាងមានអ្វីៗគ្រប់បែបយ៉ាងទាំងអស់ តែនាងមិនអាចធ្វើរឿងដែលស្ដ្រីទូទៅអាចធ្វើបានទៅវិញនោះគឺការរៀបការតាមប្រពៃណីខ្មែរ។
គូរបញ្ជាក់ថាមុនអ្នកនាងយុគ ចិន្ដា បានជួបគូស្នេហ៍ថ្មីជាអ្នកជំនួញវ័យចំណាស់រហូតឈានដល់ការគិតគូរឿងរៀបការនេះអ្នកនាងបានជួបរឿងស្នេហាមិនសមប្រកបជាច្រើនលើកច្រើនសារមកហើយដូចជាកន្លងមកធ្លាប់ប៉ៈស្នេហ៍លោកឧកញ៉ាម្នាក់,Dj ឃ្លាំង និងពោះម៉ាយជាអាណិកជនខ្មែរមកពីអាមេរិកលោកលោកសុទ្ធី បណ្ឌិត ហៅសម័យ ជាដើម។ប៉ុន្ដែអ្នកនាងចិន្ដា មិនយកស្នេហាជាធំនោះទេហើយនាងនៅតែរឹងមាំទាំងការងារសិល្បៈ និងមុខជំនួញទើបធ្វើឲ្យតារាផ្សេងៗពិបាកប្រៀបធៀបរឿងទ្រព្យធនជាមួយនាង។យ៉ាងណាចម្ងល់របស់មហានលើកឡើងជាច្រើនឆ្នាំមកហើយនោះថាហេតុអីបានជាអ្នកនាងចិន្ដា មិនដែលរៀបការម្ដងណាសោះ ម៉េចបាននាងមានកូនស្រីឈ្មោះយុគ ដាពេជ្រ ហៅស្រីអម អាយុ១៨ឆ្នាំទៅហើយ?តើឪពុករបស់កូនក្រមុំអ្នកនាងចិន្ដា ជាបុរសរូបណាទៅ?នេះជាសំណួរដែលគ្មានចម្លើយព្រោះអ្នកនាងចិន្ដា មិនដែលលាតត្រដាងរឿងស្នេហារបស់ខ្លួនជាសាធារណៈម្ដងណាឡើយ៕