ភ្នំពេញ ៖ នារីម្នាក់ បានទទួលទូរស័ព្ទពីប្អូនប្រុសថា មានចោរលួចម៉ូតូរបស់នាងបាត់ទៅហើយ ទើបប្រញាប់ចេញតាមរកភ្លាម គាប់ជួនបានប្រទះឃើញជនសង្ស័យកំពុងជិះម៉ូតូរបស់ខ្លួន តាមផ្លូវ ក៏ប្រដេញតាមចាប់បណ្តើរ ស្រែកចោរ!ៗ តាមផ្លូវបណ្តើរ ធ្វើឱ្យជនសង្ស័យភ័យ ក៏ដួល ម៉ូតូ ទើបត្រូវនារីជាម្ចាស់ម៉ូតូ រួមនិងប្រជាពលរដ្ឋ ចាប់ក្របួចជនសង្ស័យជាចោរលួចម៉ូតូជាប់ រួចក៏ប្រគល់ឱ្យសមត្ថកិច្ច នាំយកទៅចាត់ការតាមច្បាប់។
ករណីនេះ បានកើតឡើងកាលពីវេលាម៉ោង ១០និង៣០នាទីយប់ ថ្ងៃទី២៥ ខែឧសភា ឆ្នាំ២០២២ នៅចំណុចភូមិត្រពាំងល្វា១ សង្កាត់កាកាបទី១ ខណ្ឌពោធិ៍សែនជ័យ។
ជនសង្ស័យជាចោរលួចម៉ូតូ ដែលត្រូវសមត្ថកិច្ចចាប់ឃាត់ខ្លួន មានឈ្មោះឌី សារ៉ាក ភេទប្រុស អាយុ១៧ឆ្នាំ មុខរបរនិងលំនៅមិនពិតប្រាកដ។ ចំណែកជនរងគ្រោះ មានឈ្មោះសៀម សៀវម៉ី ភេទស្រី អាយុ២៣ឆ្នាំ ស្នាក់នៅភូមិត្រពាំងល្វា១ សង្កាត់កាកាបទី១ ខណ្ឌពោធិ៍សែនជ័យ។ ចំពោះវត្ថុតាងដកហូតបាន មានម៉ូតូ ១គ្រឿង ម៉ាកនិច ពណ៌ក្រហមលាយខ្មៅ ពាក់ស្លាកលេខ ភ្នំពេញ 1DP-0035 (ជារបស់ជនរងគ្រោះ)។
យោងតាមរបាយការណ៍របស់សមត្ថកិច្ច បានឱ្យដឹងថា មុនពេលកើតហេតុ ជនរងគ្រោះកំពុងដឹកអីវ៉ាន់ឱ្យភ្ញៀវ ពេលនោះមានប្អូនប្រុស ជាជនរងគ្រោះ បានទូរស័ព្ទមកប្រាប់ថា មានគេលួចម៉ូតូបាត់ហើយ។ ភ្លាមនោះជនរងគ្រោះ ក៏ជិះម៉ូតូជាមួយមិត្តភក្តិ ដើររកនៅម្តុំមុខព្រលានយន្ត ហោះអន្តរជាតិភ្នំពេញ ស្រាប់តែឃើញជនសង្ស័យចំនួន២នាក់ កំពុងជិះម៉ូតូរបស់ខ្លួន ក៏ស្រែកថាចោរ!ៗ ហើយជិះតាមពីក្រោយ រហូតទៅដល់បុរីសន្តិភាព២ សង្កាត់ចោមចៅទី២ ទើបជនសង្ស័យដួលម៉ូតូ ក៏ត្រូវប្រជាពលរដ្ឋដេញឃាត់បានម្នាក់ ប្រគល់ជូនសមត្ថកិច្ចតែម្តង។
ជនសង្ស័យ ត្រូវបានកម្លាំងប៉ុស្តិ៍មូលដ្ឋាននគរបាលកាកាបទី១ រៀបចំកសាងសំណុំរឿង បញ្ជូនទៅផ្នែកជំនាញនៃអធិការដ្ឋាននគរបាលខណ្ឌពោធិ៍សែនជ័យ ដើម្បីចាត់ការតាមនីតិវិធី៕