ភ្នំពេញ ៖ នាព្រឹកថ្ងៃព្រហស្បតិ៍ ១០កើត ខែជេស្ឋ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី០៩ ខែមិថុនា ឆ្នាំ២០២២ នៅទីស្ដីការក្រសួង លោកបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ និងលោក Rho Hyunjun នាយកទីភ្នាក់ងារសហប្រត្តិការអន្តរជាតិកូរ៉េ (KOICA) ប្រចាំនៅកម្ពុជា បានអញ្ជើញចុះហត្ថលេខា
លើកំណត់ហេតុនៃកិច្ចពិភាក្សាគម្រោងកសាងសន្តិភាព និងភាពរុងរឿងក្នុងភូមិ តាមរយៈការអភិវឌ្ឍសហគមន៍ចម្រុះ ដែលជាជំនួយឥតសំណងរបស់រដ្ឋាភិបាលនៃសាធារណរដ្ឋកូរ៉េ ។
គម្រោងខាងលើ នឹងអនុវត្តរយៈពេល ៥ឆ្នាំ ពីឆ្នាំ ២០២២-២០២៦ នៅក្នុងខេត្តគោលដៅចំនួន ៣ រួមមាន ខេត្តបាត់ដំបង បន្ទាយមានជ័យ និងខេត្តប៉ៃលិន មានគោលបំណងជាអាទិភាពចំនួន ៣ គឺ ៖
១- កែលម្អបរិស្ថានរស់នៅរបស់ប្រជាពលរដ្ឋនៅតាមជនបទ
២- បង្កើនប្រាក់ចំណូលដល់ប្រជាកសិករ និង
៣-ពង្រឹងអភិបាលកិច្ចនៅសហគមន៍ជនបទ។
គម្រោងនេះ មានបេសកកម្មប្រែក្លាយអតីតតំបន់សមរភូមិប្រយុទ្ធ ឲ្យទៅជាភូមិដ្ឋានដែលមានសន្តិភាព និងភាពសម្បូររុងរឿង ដោយផ្តោតលើការអភិវឌ្ឍសហគមន៍ជនបទ ប្រកបដោយចីរភាព៕