ខេត្តក្រចេះ ៖ ជនសង្ស័យម្នាក់ ទើបនឹងចេញពីពន្ធនាគារ ក៏បែកគំនិតធ្វើសកម្មភាពគំរាម និងសម្លុតក្មេងស្រី ២នាក់បងប្អូនបង្កើត រួចដោះយកក្រវិល ១គូ និងទូរស័ព្ទដៃ ១គ្រឿង ខណៈឪពុកនិងម្តាយចេញទៅស៊ីឈ្នួលគេ ទុកកូនស្រីទាំងពីរឱ្យនៅចាំផ្ទះ ស្ថិតនៅដាច់ស្រយាលពីអ្នកភូមិ ទីបំផុតត្រូវសមត្ថកិច្ចស្រាវជ្រាវតាមចាប់ខ្លួន នាំយកទៅចាត់ការតាមច្បាប់។
ករណីកំហែងយក (សម្លុតយកក្រវិល និងទូរស័ព្ទពីក្មេងស្រី) ខាងលើនេះ បានកើតឡើង កាលពីថ្ងៃទី១៣ ខែមិថុនា ឆ្នាំ២០២២ នៅចំណុចភូមិស្រែត្រែង ឃុំក្បាលដំរី ស្រុកសម្បូណ៌។ លុះមកដល់ថ្ងៃទី១៤ ខែមិថុនា ឆ្នាំ២០២២ សមត្ថកិច្ចក៏ស្រាវជ្រាវតាមចាប់ខ្លួនជនសង្ស័យ ដល់ផ្ទះតែម្តង។
ជនសង្ស័យដែលត្រូវសមត្ថកិច្ចចាប់ឃាត់ខ្លួន មានឈ្មោះកែវ សេងហុង អាយុ២៤ឆ្នាំ មានលំនៅ ភូមិអូរពោរ ឃុំក្បាលដំរី ស្រុកសម្បូណ៌ ជាមុខសញ្ញាចាស់ធ្លាប់ជាប់ពន្ធគារកន្លងមក។ ចំណែកក្មេងស្រីរងគ្រោះទាំង២នាក់ ទី១-ឈ្មោះប្រាល់ សុភ័ណ្ឌ អាយុ១១ឆ្នាំ និងទី២-ឈ្មោះប្រាល់ សុផៃ អាយុ៨ឆ្នាំ រស់នៅក្នុងបន្ទុកគ្រួសារ និងមានលំនៅក្នុងភូមិកើតហេតុខាងលើ។
តាមប្រភពពីសមត្ថកិច្ច បានឱ្យដឹងថា នៅមុនពេលកើតហេតុ ឪពុកនិងម្តាយរបស់ក្មេងស្រីរងគ្រោះទាំង២នាក់ បាននាំគ្នាចេញទៅដើរឈ្នួលធ្វើការឱ្យគេ ដោយទុកកូនស្រីទាំងពីរនៅចាំផ្ទះតែពីនាក់បងប្អូន។ លុះក្រោយមក ស្រាប់តែលេចមុខជនសង្ស័យខាងលើ បានចូលទៅធ្វើ សកម្មភាពសម្លុតគំរាមដោះយកក្រវិល ១គូ និងទូរស័ព្ទ ១គ្រឿង បន្ទាប់មកក៏រត់គេចខ្លួនបាត់តែម្តង។
ក្រោយកើតហេតុ ក្មេងស្រីរងគ្រោះទាំង២នាក់ ត្រូវបានឪពុកម្តាយនាំមកដាក់ពាក្យបណ្តឹង ដើម្បីសុំអន្តរាគមន៍ពីសមត្ថកិច្ច និងឈានដល់ការឃាត់ខ្លួនជនសង្ស័យខាងលើ នាំយកមកសាកសួរ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា មុនពេលកើតហេតុ រូបគេឃើញផ្ទះជនរងគ្រោះ នៅដាច់ស្រយាលពីគេ ក៏ចូលទៅធ្វើសកម្មភាពដោយស្រែកសម្លុតនិងគំរាមឱ្យក្មេងស្រីជនរងគ្រោះទាំងពីរនាក់បងប្អូន ដោះក្រវិលម្នាក់ ១គូ (ប្លាទីន) ស្មើទម្ងន់ ១ជី និងទូរសព្ទ័ចុចពិល ចំនួន១គ្រឿង ក្រោយពីបានធ្វើសកម្មភាពរួច ក៏បានរត់គេចខ្លួន ប៉ុន្តែត្រូវបានកម្លាំងសមត្ថកិច្ចកំណត់មុខសញ្ញា និងតាមចាប់ខ្លួនបានតែម្តង។
ជនសង្ស័យត្រូវបានសមត្ថកិច្ចជំនាញ រៀបចំកសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធី៕
