ភ្នំពេញ ៖ សាកសពបុរសម្នាក់ ស្ថិតក្នុងសភាពហើមស្អុយរលួយ អណ្តែតទឹកតាមដងទន្លេសាប ត្រូវបានប្រជា នេសាទ ដែលចេញរកត្រីតាមដងទន្លេ ប្រទះឃើញ កើតមានការភ្ញាក់ផ្អើល និងរាយការណ៍ប្រាប់សមត្ថកិច្ចចុះអន្តរាគមន៍ ស្រង់ឡើងគោក ពិនិត្យភ្លាមៗ។
ហេតុការណ៍ប្រទះឃើញសាកសពអណ្តែតទឹកនេះ បានកើតមានការភ្ញាក់ផ្អើលឡើង កាលពីវេលាម៉ោង ៣និង៣០នាទីរសៀល ថ្ងៃទី០៥ ខែកក្កដា ឆ្នាំ២០២២ ស្ថិតនៅក្រុមទី៩ ភូមិ១ ផ្លូវទន្លេសាប សង្កាត់ជ្រោយចង្វា ខណ្ឌជ្រោយចង្វា។
សពជនរងគ្រោះ នៅមិនស្គាល់អត្តសញ្ញាណនៅឡើយ ដោយសាកសពមានសភាពហើម ធុំក្លិនស្អុយរលួយ ស្លៀកខោខូវប៊យជើងវែងពណ៌ខ្មៅ ពាក់អាវផ្កា។
តាមប្រភពព័ត៌មានពីកន្លែងកើតហេតុ បានឱ្យដឹងថា មុនពេលកើតហេតុ មានបងប្អូនប្រជានេសាទខ្មែរអ៊ិស្លាម បានចេញនេសាទតាមដងទន្លេ ស្រាប់តែមកដល់ត្រង់ចំណុចកើតហេតុ បានប្រទះឃើញសាកសពអណ្តែតទឹកនៅម្តុំគល់ស្ពានជ្រោយចង្វា រួចក៏បានរាយការណ៍ទៅសមត្ថកិច្ចប៉ុស្តិ៍ជ្រោយចង្វា ហើយសមត្ថកិច្ចក៏បានឱ្យកម្លាំងបងប្អូនខ្មែរអ៊ិស្លាម ជួយទាញសាកសពមកខាង។
ក្រោយកើតហេតុ សមត្ថកិច្ចបានចុះពិនិត្យនិងកោសល្យវិច័យសព រួចបញ្ជាក់ថា ជនរងគ្រោះបានស្លាប់ដោយសារលង់ទឹក មិនពាក់ព័ន្ធទៅនឹងករណីអ្វីផ្សេងនោះទេ។
សាកសពត្រូវបានដឹកយកទៅតម្កល់ទុកនៅវត្តទឹកថ្លា ដើម្បីរង់ចាំស្វែងរកសាច់ញាតិ និងក្រុមគ្រួសារ មកទទួលយកទៅធ្វើបុណ្យតាមប្រពៃណី៕