ខេត្តកំពង់ឆ្នាំង ៖ បុរសវ័យចំណាស់ម្នាក់ បានចេញទៅលើកមង តាំងពីព្រឹកព្រលឹម រួចក៏បាត់មិនឃើញត្រឡប់មកផ្ទះវិញ លុះកូនៗនឹកឆ្ងល់ ក៏នាំគ្នាចេញទៅតាមរកនៅកន្លែងដែលឪពុកធ្លាប់ចេញទៅរាយមង ស្រាប់តែទៅដល់ ប្រទះឃើញឪពុកស្លាប់ក្នុងទឹកបាត់ទៅហើយ។
ហេតុការណ៍នេះ បានកើតឡើង កាលពីវេលាម៉ោង ១១ព្រឹក ថ្ងៃទី១៤ ខែកក្កដា ឆ្នាំ២០២២ នៅចំណុចជិតស្ពានតង្កៀបក្តាម ស្ថិតក្នុងភូមិស្តុកកប្បាស ឃុំបន្ទាយព្រាល ស្រុករលាប្អៀរ។
បុរសរងគ្រោះ មានឈ្មោះអ៊ិន អ៊ុល អាយុ៦៣ឆ្នាំ មុខរបរកសិករ មានប្រពន្ធឈ្មោះស៊ុម សុខ និងមានកូនក្នុងបន្ទុកចំនួន ៥នាក់ (ប្រុស៣ ស្រី២) មានលំនៅ ភូមិទ័ពត្បែង ឃុំបន្ទាយព្រាល ស្រុករលាប្អៀរ។
តាមប្រភពពីក្រុមគ្រួសារជនរងគ្រោះ បានឱ្យដឹងថា មុនពេលកើតហេតុ ជនរងគ្រោះបានចេញផ្ទះ ម៉ោងប្រមាណជាង៥ទៀបភ្លឺ ដើម្បីទៅលើកមង ចាប់ត្រី នៅចំណុចជិតស្ពានតង្កៀបក្តាមដូចសព្វដង។ ប៉ុន្តែលើកនេះ ជនរងគ្រោះបានចេញទៅបាត់យ៉ាងយូរ មិនឃើញត្រឡប់មកផ្ទះវិញសោះ រហូតដល់ម៉ោងជាង ១១ព្រឹក ថ្ងៃដដែល ដោយមានការសង្ស័យ ទើបក្រុមគ្រួសារ បាននាំគ្នាដើរទៅរក ស្រាប់តែទៅដល់ចំណុចកើតហេតុ ក៏បានប្រទះឃើញជនរងគ្រោះស្លាប់នៅក្នុងទឹក ក្បែរគុម្ពោតព្រៃ ជិតស្ពានតែម្តង ធ្វើឱ្យកើតមានការភ្ញាក់ផ្អើល និងរាយការណ៍ប្រាប់សមត្ថកិច្ច ចុះអន្តរាគមន៍តែម្តង។
ក្រោយកើតហេតុ សមត្ថកិច្ចជំនាញ បានចុះពិនិត្យនិងធ្វើកោសល្យវិច័យសព រួចបញ្ជាក់ថា ជនរងគ្រោះ បានស្លាប់ដោយសារលង់ទឹក មូលហេតុអាចដោយសារជនរងគ្រោះដើរធ្លាក់អន្លង់ជ្រៅ ហើយប្រហែលជាខ្យល់គរផង ទើបបណ្តាលឱ្យលង់ស្លាប់បែបនេះ។
សពជនរងគ្រោះ ត្រូវបានសមត្ថកិច្ចប្រគល់ឱ្យក្រុមគ្រួសារ ដើម្បីរៀបចំធ្វើបុណ្យតាមប្រពៃណី៕