ខេត្តស្ទឹងត្រែង : បុរសម្នាក់ បានប្រើឧបករណ៍ឆក់ត្រី ចៃដន្យអាក្រក់ភ្លាត់ស្នៀត ឆក់ខ្លួនឯង ស្លាប់ នៅចំណុចក្រុមហ៊ុនចម្ការចេក ស្ថិតក្នុងភូមិរិទ្ធីសែនជ័យ២ ឃុំអូរស្វាយ ស្រុកបុរីអូរស្វាយសែនជ័យ កាលពីវេលាម៉ោងជាង ១២ថ្ងៃត្រង់ ថ្ងៃទី១៥ ខែកក្កដា ឆ្នាំ២០២២។
តាមប្រភពសមត្ថកិច្ច បានឱ្យដឹងថា ជនរងគ្រោះ មានឈ្មោះ វ៉ាន់ ថងម៉ៃ ភេទប្រុស អាយុ៣២ឆ្នាំ ជនជាតិខ្មែរ មុខរបរកម្មករចម្ការចេក មានស្រុកកំណើតនៅភូមិថ្មី សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង។
ប្រភពដដែល បន្តថា មុនកើតហេតុ ជនរងគ្រោះ បានដើរឆក់ត្រី ក្នុងបរិវេណទំនប់ទឹករបស់ក្រុមហ៊ុនចម្ការចេក ស្រាប់តែត្រូវឆក់ខ្លួនឯង បណ្តាលឲ្យស្លាប់តែម្តង។
ក្រោយពីទទួលព័ត៌មានខាងលើនេះ សមត្ថកិច្ចនគរបាលនៃអធិការដ្ឋានស្រុកបុរីអូរស្វាយ សែនជ័យ បានចុះមកកន្លែងកើតហេតុ ធ្វើកោសល្យវិច័យសព ដោយពិនិត្យឃើញថា មិនមានពាក់ព័ន្ធករណីផ្សេងៗ ក៏បានប្រគល់សពជូនសាច់ញាតិ យកទៅធ្វើបុណ្យតាមប្រពៃណី៕