ភ្នំពេញ៖អតីតតារាចម្រៀងRock ម៉ូលីកា ទើបតែបានធ្វើពិធីឡើងផ្ទះវីឡារស្កឹមស្កៃតម្លៃ៣០ម៉ឺនដុល្លារនៅបុរីវារីណា កាលពីថ្ងៃទី៧ខែកក្កដាឆ្នាំ២០២២ សោះស្រាប់តែពេលនេះនាងបង្ហាញផ្ទះវីឡារទោលថ្មី១ទៀតកំពុងសាងសង់ដែលបានទិញនៅបុរីML ហើយបើផ្អែកតាមទំហ៊ុំផ្ទះនោះគឺប្រាកដជាមានតម្លៃខ្ពស់ជាងផ្ទះចាស់របស់នាងជាមិនខាន។តែម៉ូលីកា មិនប្រាប់ពីតម្លៃផ្ទះថ្មីរបស់នាងឡើយតាមរយៈការឆាតសួរកាលពីពេលថ្មីៗនេះ។ទោះជាយ៉ាងណាគេកត់សម្គាល់ឃើញថាតាំងពីកូវីដថមថយ នេះអាជីពOnline របស់ម៉ូលីកា ហក់ឡើងវិញធ្វើឲ្យនាងមមាញឹកនិងកាន់តែកាក់កបជាមួយអាជីវកម្មនេះថែមទៀតទើបក្នុងពេលតែមួយសោះនាង អាចទិញផ្ទះវីឡារបានដល់ទៅ២ផ្សេងគ្នាបែបនេះ។
ម៉ូលីកា បានចេញសារថាការមានជីវភាពធូធារបែបនេះត្រូវបានស្វាមីនាងលោកហុង មានុណ ថាមិនធ្លាប់គិតនោះទេ ព្រោះលោកថារូបលោកមិនល្អគ្រប់គ្រាន់សម្រាប់នាង។ប៉ុន្ដែម៉ូលីកា ថានៅពេលដែលនាងជួបមនុស្សដែលនាងស្រលាញ់ ទោះជាល្អមិនគ្រប់គ្រាន់ ទោះនរណាមើលមិនឃើញពីតម្លៃ តែនាងអាចមើលឃើញយ៉ាងច្បាស់ពីតម្លៃរបស់ស្វាមីនាង។នាងបន្ថែមថារហូតមកដល់ពេលនេះលោកមានុណ ល្អបំផុតហើយគ្រប់គ្រាន់សម្រាប់រូបនាង ព្រោះកាន់តែរស់នៅជាមួយកាន់តែស្រលាញ់ និងកាន់តែខ្វះគ្នាមិនបាន ដោយសារបេះដូងបានផ្សារភ្ជាប់គ្នារួចហើយ។
គូររំលឹកថាម៉ូលីកា បានរៀបការជាមួយតារាសម្ដែងហុង មានុណ ហៅឆានុណ កាលពីថ្ងៃទី១៨ខែមករាឆ្នាំ២០២០ ហើយនាងបានសម្រាលកូនស្រីដំបូងថ្ងៃទី៥ខែកក្កដាឆ្នាំ២០២០ ដោយដាក់ឈ្មោះថានុណ ច័ន្ទម៉ូនីតា ។តាមរយៈការចាប់ដៃគ្នាជាង២ឆ្នាំនេះម៉ូលីកា មានជីវភាពប្រែប្រួលដូចមេឃនិងដីបើប្រៀបធៀបពីមុននាងធ្លាប់រស់នៅផ្ទះជួលគេនិងផ្ដើមទុនតែត្រឹម៣០០ដុល្លាររកស៊ីលក់ជ្រក់ជើងមាន់តែពេលនេះនាងមានអាជីវកម្មផ្ទាល់ខ្លួនតាមរយៈការបើកក្រុមហ៊ុនម៉ូលីកា ប៊ីយូធី ត្រេឌីង ឯ.ក ដែលធ្វើឲ្យនាងមានប្រភពចំណូលជាប្រចាំរហូតសល់លុយទិញបានផ្ទះវីឡារទាំងពីរខាងលើនិងមានរថយន្ដទំនើបៗជិះឆ្លាស់គ្នាដូចជាFord Raptor, Range Rover ,Alphard និងJaguar ជាដើម។
គូរបញ្ជាក់ថាក្រៅពីម៉ូលីកា-ឆានុណ តារាដែលជ្រើសគូស្នេហ៍ជាតារាដូចគ្នាមានដូចជាយក់ ថិតរដ្ឋា-ឃុំ ប៉ុណ្ណាដែត,ទេព បូព្រឹក្ស-ងួន ចាន់ដេវីត,កុល ដាវី-សុខ រក្សារ,ម៉ានីកា -ចន ,សេង សុខគីម-នាយចឺម ,នាងព្រលិត-នាយក្រឹម,និងសួស វីសា-ថមមី ជាដើម៕
